Mulandu Nshi uwa Kubombela Yehova?

“UBUSHIKU bwa kwa Yehova buli mupepi! ‘Ubucushi bukalamba’ nabupalama, kabili tawakapusunsuke bwene nga ca kuti taubombela Lesa.” Nga ca kuti umuntu umo akwebele ifyo, ni shani fintu wingankulako?—Sefania 2:2, 3; Mateo 24:21.

Ca cine, tulingile ukubika ubushiku bwa kwa Yehova mu muntontonkanya, kabili ukupusunsuka ukupula mu bucushi bukalamba ubusungamine kwashintilila pa mulimo wa busumino kuli Lesa. Lelo bushe ifi fishinka filingile ukuba e milandu ikalamba iyo tubombela Yehova Lesa umulimo washila? Mulandu nshi iwe ubombela Yehova?

Ukukabila kwa Nkuntu Yalinga

Nga ca kuti umuntu tabombela Lesa mu kuba ne nkuntu yalungama, kuti pambi aleka nga ca kuti ukwenekela kwakwe takufikilishiwe mu kati na nkati ka ciputulwa ca nshita. Ku ca kumwenako, abantu bamo baenekele Yesu Kristu ukubwela mu 1843 nelyo mu 1844, imyaka iyapitile ukwabula ukufikilishiwa kwa masubilo yabo. Ku ca kusekesha muli uku kuloshako cintu calembelwe na George Storrs, kasabankanya wa Bible Examiner kabili uyo pa numa aali uwa kwishibana nankwe uwa kwa Charles Taze Russell, presidenti wa kubalilapo uwa Watch Tower Society. Muli Bible Examiner iya September 1846, Storrs alembele ukuti:

“Ukukakililwako kwa kubombela Lesa kwalaala ukucila pa cishinka ca kuti fye ubushiku na bupalamisha nga nshi. . . . Ukwankulako ukukacitikako nga ca kuti ba46 na ba47 bapita nga fintu pambi cingaba, ukwabulo kucitilo bunte ica kucitika, cikaba kayofi akabipisha ukucila pa kwelenganya konse. Ica kukumanya cilashinina ici—ndepilibula ica kukumanya ca ba43 na ba44. Ni kwi nomba kuli icinabwingi cikalamba ica abo, mu kuitunga, ‘bacilimushiwe ku kubombela Lesa’ nga fintu bafwile ukucita kuli kulya kukuuta kwa nshita ukwa kwisa kwa kwa Shikulu? Kabili ndebwekeshapo kusoso kuti—NI KWI!!! Ni umo fye mwi kumi aba bene e ulesangwa aleenda mu kucindika umulimo wakwe uwa Bwina Kristu. Mulandu nshi? Bacincimushiwe ku nkuntu shalubana. Akaso kabo kali e cintu cakulisha icaipukishiwe no kucilimushiwa. Bapalile fye umubembu uuitontonkanya ukupalamina ku mfwa pa busanshi bwa kulwalilapo nelyo pali bemba wa cipuupu. Nga ca kuti afwa, ali no kusanguka Umwina Kristu. Nga ca kuti alishibe ifyo tali mu busanso, aali no kuba uwabulo kwangwako nga kale.”

Ukubomba mu Kuba ne Nkuntu Shalungama

Akaso no mwenso wa bonaushi kuti fyasesha bamo ukucito kufwaya kwa kwa Yehova mu kabepekesho. Bambi nakalimo kuti baba abakuntwa kwi subilo lya bumi muli Paradise ica kuti bali no kubombela Lesa pali uyo wine fye mulandu. Nalyo line, nga ca kuti abantu abakuntwa maka maka ne nkuntu sha musango yo batontonkenye ukuti ubushiku bwa kwa Yehova no bucushi bukalamba tafyali apepi nga nshi, te kuti pambi bakongamine ku kubombela Lesa mu kupimpa.

Kwena, te kaso ukusekelela mu malayo ya kwa Lesa na mapaalo yasobelwa. Alatufwaya ukuba aba nsansa pa lwa filolelo ifyaimikwa pa ntanshi yesu nga bakonshi ba Mwana wakwe, Yesu Kristu. “Sekeleleni mwi subilo,” e fyasosele umutumwa Paulo, ukulundako kuti: “Mu bucushi mube abashishimisha. Beni aba mukoosha mwi pepo.” (Abena Roma 12:12, NW) Ukwendela pamo ne pepo, “ukusekelela muli Yehova” kutwaafwa ukushishimisha amesho kabili mu kutekanya ukulolela ukufikilishiwa kwa malayo ya kwa Lesa. (Nehemia 8:10) Pali ino nshita, twalikwata imilandu iingi iya kubombela Yehova. Ni ili kwi imo iya iyi?

Umulimo ne Shuko

Pamo nga Mulopwe wa Kubumbwa konse, Yehova awaminwa kabili afwaya ukuipeelesha kwapaatulwa. (Ukufuma 20:4, 5) E co Umwina Kristu umo na umo alikwata icipimo cimo cine ica kukakililwako kuli Lesa nampo nga ubucushi bukalamba bukatendeka mailo, umwaka uleisa, nelyo pa numa. Alikakililwako ukubombela Yehova ukwabula akaso pa mulandu wa kutemwa Lesa no mutima wakwe onse, umweo, umuntontonkanya, na maka. (Marko 12:30) Abena Kristu ba mu kubangilila bamo batontonkenye ukuti ubushiku bwa kwa Yehova bwalisungamine, lelo ukwenekela kwabo takwafikilishiwe, kabili balifwile ukwabulo ukumona cilya ca kuponako. (1 Abena Tesalonika 5:1-5; 2 Abena Tesalonika 2:1-5) Nga ca kuti bali aba busumino ukufika ku mfwa, nangu cibe fyo, abo abakonshi basubwa aba kwa Kristu mu kupelako balipokelele icilambu ca kubuukila ku bumi bwa ku muulu.—Ukusokolola 2:10.

Inte shabatishiwa isha kwa Yehova shilingile ukumubombela mu busumino pa mulandu wa kuti mu kuitemenwa balapokelela ukukakililwako kwa kucita ukufwaya kwakwe. Bala tontonkanya! Ukupala bamalaika bashila, kuti twacita ukufwaya kwa kwa Mulopwe wa Kubumbwa konse. (Ilumbo 103:20, 21) Yesu apakalamba ateesele ishuko lya musango yo ica kuti asosele ati: “Ica kulya candi kucito kufwaya kwa wantumine, no kupwisho mulimo wakwe.” (Yohane 4:34) Nga ca kuti twakwata umupashi umo wine, mu kupimpa tukabilisha ukulumbwa kwa kwa Yehova no kwebako bambi pa lwa mifwaile yakwe, nga fintu yasokololwa mu Malembo. Muli iyi nshila, tulakwata ishuko na kabili ku kwaafwa bambi lwa ku mupashi. Kabili mu kushininkisha, ukucita ukufwaya kwa kwa Lesa pa mulandu wa kutemwa kwa kuli wene cili lishuko lyawamisha, ukwabulo kusakamana lintu ubushiku bwa kwa Yehova bukatendeka.

Ukutasha Kulapayanya Ukukunta

Ukutasha pa kutemwa kwa kwa Lesa mu kupayanya ilambo lya cilubula ca Mwana wakwe kulingile na ko ukutukunta ukubombela Yehova. Pa nshita imo twalinunwike kuli Yehova Lesa pa mulandu wa lubembu. Nangu cibe fyo, Yesu atile: “Lesa atemenwe aba [calo, NW] [ca mutundu wa muntu] ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” (Yohane 3:16) Yehova abuulile ukuitendekelako muli kuno kuloshako, nga fintu Paulo alembele ukuti: “Lesa asokololo kututemwa kwakwe kwine, pa kuti ilyo twali tucili ababembu Kristu alitufwilile.” (Abena Roma 5:8) Ukutasha pali uku kulumbulula kwa kutemwa kwa kwa Lesa kulingile ukutukunta ukumubombela no mutima onse.

Ukutesekesha ukupayanya kwa kwa Yehova ukwa ku mupashi no kwa ku mubili kutupeela umulandu walundwako uwa kumubombela mu busumino. Icebo ca kwa Lesa cili butungulushi bwashininkishiwa—ulubuuto ku nshila yesu. Impapulo ishipayanishiwa ukupitila mu “musha wa cishinka kabili uwashilimuka” shilatwaafwa ukubika ubumi bwesu mu kumfwana no kufwaya kwa bulesa. (Mateo 24:45-47; Ilumbo 119:105) Kabili pa mulandu wa kuti tubala ukufwaya Ubufumu, Yehova na kabili alatupayanishisha lwa ku mubili. (Mateo 6:25-34) Bushe ulelangisha ukutesekesha kobe ukwa ifi fintu?

Ukutasha pa buntungwa bwapeelwa na Lesa ukufuma ku butotelo bwa bufi kupayanya umulandu na umbi ku kubombela Yehova mu busumino. Cilende wa butotelo Babiloni Mukalamba ‘aikala pa menshi ayengi,’ ukupilibula “imisango ya bantu, na mabumba, ne nko, na ba ndimi.” (Ukusokolola 17:1, 15) Nalyo line, taikala pa babomfi ba kwa Yehova, ukubasonga no kubalama mu nshila ya butotelo. Ku ca kumwenako, balakaana icifundisho ca bufi ica butotelo ica kuti umweo wa buntunse ni umunshifwa. Balishiba ukuti umuntu abumbilwe nge “cibumbwa ca mweo,” ukuti abafwa “bantu abashaishiba kantu nangu kamo,” no kuti kukabako ukubuuka. (Ukutendeka 2:7; Lukala Milandu 9:5, 10; Imilimo 24:15) E co tabatiina nelyo ukupepa abafwa. Bushe ukutasha pa kulubuka kwa ku mupashi ukwa musango yo kulakulenga ukucincintila ubusangu no kukakatila ku kupepa kwasanguluka ukwa kwa Yehova?—Yohane 8:32.

Ukutesekesha ukutungilila kwa kwa Yehova ukwa cila bushiku kulingile ukwingilishako umupampamina wesu ku kumubombela muli bucishinka. Kemba wa malumbo Davidi abilishe ukuti: “Abe uwacindikwa [Yehova, NW] . . . ubushiku no bushiku atusenda.” (Ilumbo 68:19) Ku cifulo cimbi kemba wa malumbo atile: “Ilyo tata na mayo bandekelesha, e lyo Yehova ambuula.” (Ilumbo 27:10) Ee, umuntu uo mu busumino alebombela Yehova kuti apoosa icisendo cakwe ica mampalanya, pamo nga amasakamika na mesho, pali Lesa. Bushe ulelangisha ukutesekesha pa kutungilila kwa kwa Yehova ukushifilwa pa kumubombela mu busumino?—Ilumbo 145:14.

Tonda Yehova na Bumfumu Bwakwe

Ukufwaisha kwa kukatamika Yehova kulingile nako ukutusesha ku kumubombela. Ifibumbwa fya mu muulu fyaimininwako nge filekatamika Lesa mu kuba na mashiwi ya kuti: “Mwaliwamina, mwe [Yehova, NW] Lesa wesu, ukupokelelo bukata no mucinshi na maka; pantu ni mwe mwalengele ifintu fyonse: kabili mulandu wa kufwaya kwenu fyabeleleko no kulengwa.” (Ukusokolola 4:11) Imfumu Davidi yatondele Lesa pa kusosa ukuti: “Fyenu, mwe Yehova, ubukulu na bumpalume no kuyemba no kupulama na bukatebebe, . . . ubufumu bwenu, mwe Yehova, . . . Kabili ubucindami no bukata fifuma kuli imwe, mwe Kateka wa bonse . . . E ico nomba, mwe Lesa wesu, ifwe tulemutootela, no kutashe shina lyenu ilyalumbuka.” (1 Imilandu 29:10-13) Pamo nga babomfi ba kwa Yehova, bushe kuti twacita icacepako pa kumukatamika mu cebo na mu ncitilo ilintu tulelolela ukufikilishiwa kwa malayo yakwe?—1 Abena Korinti 10:31.

Ukucincisha kwakosa ku kulanda pa lwa Bufumu bwa kwa Lesa na ko kwine kupayanya ica kutuninkisha na cimbi ku kubombela Yehova. Iyo nkuntu ishaiwamina yalilumbululwa bwino mu mashiwi ya kwa kemba wa malumbo ati: “Fyonse ifyo mwacita filemutootela, mwe Yehova, na babile benu balemucindika; ubukata bwa bufumu bwenu balebulanda, na bumpalume bwenu balebusosa, ku kulenga abana ba bantu beshibe ifya bumpalume fyakwe, no bukata ubwacindama bwa bufumu bwakwe. Ubufumu bwenu bufumu bwa muyayaya, no kuteka kwenu kwa mu nkulo ne nkulo.” (Ilumbo 145:10-13) Ukubilisha ubukombe bwa Bufumu kwaba kutumwa kwa Bwina Kristu kabili umulimo wacilishapo kucindama uulecitwa mu kasuba kesu. (Mateo 24:14; 28:19, 20) Bushe walikwata ukufwaisha kwabilima ku kutootela Yehova no kwebako bambi pa lwa Bufumu bwakwe?

Ukushishiwa kwe shina lya kwa Yehova no kwebelwa kwa bumulopwe bwakwe kulingile ukuba ukwa bucindami bwa musango yo kuli ifwe ica kuti tufwaye ukumubombela mu busumino. Kuti twapepela ukushishiwa kwe shina lya kwa Yehova no kwebelwa kwa bumulopwe bwakwe. (Mateo 6:9) Kuti twatungilila amapepo yesu pa kuibimba mu butumikishi bwa Bwina Kristu lyonse na pa kwananya icine pa lwa fintu fyakatama nga nshi ifya musango yo.—Esekiele 36:23; 39:7.

Ubuseko no Kwikushiwa

Pa kubombela Yehova mu busumino, tulakwata ukwikushiwa kwa kulenga umutima wakwe ukusamwa no kushinina Ciwa ukuba uwa bufi. Nangu ca kuti Satana mu bufi atunga ukuti abantu babombela Lesa pa milandu ya kaso, umulimo wesu uwa bucishinka kuli Yehova, uupeelwa ukufuma ku kutemwa, ushinina uko kutunga kwa kwa kaseebanya ukuba ukwa bufi. (Yobo 1:8-12) Ici citupeela umulandu usuma ku kutwalilila ukucita icasoswa pa Amapinda 27:11 ukuti: “We mwana wandi, ube uwa mano, ulenge umutima wandi ukusamwa, ukuti njasuke ku ulenseebanya.” Mu kulundapo, lintu twabombela Yehova muli bucishinka te mulandu na conse cintu Satana acita ku kutucilikila, inshila yesu iya kusunga bumpomfu mu kupalishako ili no kukosha abasumina banensu.—Abena Filipi 1:12-14.

Ubuseko no kwikushiwa kwa kwakana mu kulobolola kwa ku mupashi filingile na fyo ukutukunta ku kubombela Yehova mu busumino. Yesu alisangile insansa mu kwaafwa abantu, ukucilisha mu nshila sha ku mupashi. E fisosa Mateo 9:35-38 ukuti: “Yesu aendawike mu mishi yonse iikalamba ne inono, alesambilisha mu masunagoge yabo, alebila ne mbila nsuma ya bufumu no kuposho bulwele bonse no kunakuka konse. Lelo pa kumona amabumba, abekatilwe inkumbu; pa kuti bali abalulunkaniwa kabili abapaswa, nge mpaanga ishishaba na kacema. E lyo atile ku basambi bakwe, Ukulobolola kwena kukalamba, lelo ababomfi nabacepa. E ico lombeni Umwine wa kulobolola, ku kuleka atume ababomfi mu kulobolola kwakwe.” Nga ca kuti umulimo wa kulobolola wakokola ukucila fintu twaenekele, ici cikatupeela ishuko lya mu nshita ilyakulilako ku kusango buseko no kwikushiwa mu kwaafwa bambi lwa ku mupashi. Iyi na kabili ni nshila ya kulangishishamo ukutemwa kwa mwina mupalamano uko kwenekelwa ukufuma kuli ifwe.—Mateo 22:39.

Mulandu Nshi Ubombela Lesa?

Twalanguluka inono fye iya milandu iikunta ku kubombela Yehova mu busumino. Caliba icisuma ukupeelako itontonkanyo lyabamo ipepo ku milandu yesu iya kubombela Lesa, apantu umo na umo uwesu akaba no kulubulula kuli wene. (Abena Roma 14:12; AbaHebere 4:13) Kabili abo abatwalilila ukukwata fye inkuntu sha kaso tabakaipakishe ububile bwa bulesa.

Cinshi cingenekelwa nga ca kuti tuli abayangwako apakalamba ku kushishiwa kwe shina lya kwa Yehova kabili tulebombela Lesa umulimo washila mu kuba ne nkuntu shishili sha kaso? Kwena, Yehova akatupaala no butumikishi bwesu! (Amapinda 10:22) Na kabili tukapokelela ubumi bwa ciyayaya apantu twalibombela Yehova mu busumino.

[Icikope pe bula 9]

Amakana balabombela Yehova mu Japan

[Icikope pe bula 10]

Ukubombela Yehova mu Côte d’Ivoire

[Abatusuminishe Ukubomfya Icikope pe bula 8]

SIX SERMONS, kuli George Storrs (1855)