Ubutotelo Bobe—Bushe Bwaba ni Ngalaba Iyo Ushingapatukamo?
INGALABA yakumanya inkuuka yabipisha. Abali mu kati, abaleesha mu kupelelwa ukupususha ubwato bwabo, balolenkana no kupingulapo kwakulisha: atemwa ukwikala mu kati nelyo ukupatuka mu ngalaba no kuipususha abene. Bushe walishibe ukuti ici cintu ca kutiinya cilabomfiwa nge cilangililo ca masomo ya fya butotelo?
Abasoma ifya butotelo, ukucilisha abasoma ifya ciKatolika, ilingi line balinganya icalici lyabo ku ngalaba ilyo ilepita mu cikuuku. Basoso kuti iyi ngalaba, mu kuba na Yesu nelyo Petro nge ntungulushi, imininako inshila fye yeka iya kupusukilamo. Imimwene ya bashibutotelo ya kuti, ‘Te kwesha ukupatuka mu ngalaba. Icalici lyalikumanyapo amafya ayabipisha, lelo lyaba ni ngalaba iyo yacimfya inkuuka shonse isha mu lyashi lya kale.’ Bamo batila, ‘Mulandu nshi uwa kufuminamo? Nga ni kwi wingaya? Mulandu nshi te kutwalilila ukuba mu kati no kwaafwako ukupindulwila ingalaba ku menshi yatekanya?’
Mu kumfwana ne ci cilangililo, abantu abengi, ababa mu mabutotelo yalekanalekana, bapelulula ukuti, ‘Nalishiba ukuti ubutotelo bwandi bwaliluba mu fintu ifingi, lelo nsubila ukuti bukaluka. Nshilefwaya ukufuma muli bwene. Kuti nafwaya ukwakanako mu kwaafwa bwene ukucimfya amafya ya buko.’ Uyu musango wa kupelulula kuti waba pa mulandu wa kutemwisha kwafumaluka ukwa butotelo bwa fikolwe fya umo nelyo fye ukutiina “ukufutuka” bwene.
Ica kumwenako calinga ni cilya ica kwa Hans Küng, uwaishibikwa bwino ngo ushalesuminishanya na masomo ya fya butotelo bwa ciKatolika, uyo apelulwile ukuti: “Bushe ningile ukupatuka mu bwato lintu kuli icikuuku, ukusha abo naensha na bo ingalaba ku kulolenkana no mwela, ukutandula amenshi, kabili pambi ukushomboke cine cine pa kufwaya ukupusunsuka?” Ayaswike ati: “Te kuti mfume mu calici.” Ica kucita cimbi kuti caba “ukupaatuka kuli ili calici, pa mulandu wa kupelebela kwa liko, pa kufwaya ukwikalila ku fyakatamikwa fyasumbuka, kabili nakalimo, ukufwaya fye ukuba Abena Kristu ba bucishinka.”—Die Hoffnung bewahren.
Lelo bushe umuntu kuti atwalilila ukwikalilila mu bwato bwe calici lyakwe line pa kusubila ukuti Lesa, mu nkumbu shakwe, akasuminisha amabutotelo yonse inshita ishapimwa iya kwaluka? Ico cili cipusho cakakala. Nga fintu cacilangililwa, ukukwankwanya ukufuma mu ngalaba ili mu busanso pa kubutukila mu mato ya kupusukilamo ayashashintililwapo kuti kwaba fye ukwa busanso nga fintu cingaba lintu watwalilila ukuba mu kati ka ngalaba ilebunda. Bushe calibamo amano ukutwalilila ukuba mu calici te mulandu ne cili conse, te mulandu ne mibele ya liko iili yonse? Filolelo nshi ifya kwaluka fintu amabutotelo yakwete ilelo? Ni pa butali bwaba shani Lesa akayasuminisha ukulwisha ukufwaya kwakwe?
[Abatusuminishe Ukubomfya Icikope pe bula 3
Chesnot/Sipa Press