Iseni kwi Bungano lya Citungu Ilileti “Bakalumbanya ba Buseko”

UMUTWE ubusuma uusalilwe uwa mabungano ya citungu aya 1995 uwa kuti: “Bakalumbanya ba Buseko”! Mu kushininkisha ifi e fintu Inte sha kwa Yehova shaba. Balumbanya nani? Yehova Lesa, kwena!

Yehova takwata uwalingana nakwe, alicila pali bonse, tengalinganishiwako, alibo waibela mu nshila ishingi. Wa maka yonse, uwaishiba fyonse, uwapwililika mu bulungi, kabili icipasho cine ica kutemwa. Awaminwa ukupokelela ukupepa kwesu no kulumbanya, ukucila bonse bambi.

Mu kushininkisha tulefwaya ukuba bakalumbanya bakwe aba buseko! Ku kutwaafwilisha, Ibumba Litungulula ilya Nte sha kwa Yehova nalitantika programu we bungano ushaiwamina uwa nshiku shitatu, ukutendeka mu lusuba lwa 1995. Ishi nshiku shitatu mu kushininkisha shikaletako ubuseko, kabili Nte ya kwa Yehova uuli onse akafwaya ukucita apapela amaka yakwe ku kusangwako ku lwimbo lwa kwiswila pali Cisano ulucelo ukufikila ulwimbo lwa kwisalila ne pepo pa Mulungu icungulo.