Iseni kwi Bungano lya Citungu Ilya “Akatiina ka Bukapepa”

ABABOMFI ba kwa Yehova mu nshita sha pa kale pe samba lye Funde lya kwa Mose balefwaikwa ukwisa capamo imiku itatu cila mwaka ku mitebeto imo. Utu twali tushita twa nsansa kabili utwa kukuulilila lwa ku mupashi.—Amalango 16:16.

Mu nshita sha muno nshiku ababomfi ba kwa Yehova mu musango umo wine balesa capamo imiku itatu cila mwaka: ku bushiku bwa kulongana kwaibela, ku kulongana kwa muputule ukwa nshiku shibili, na kwi bungano lya citungu ilya nshiku shitatu nelyo shine. Mu mwaka wa mulimo uwa 1994, Inte sha kwa Yehova shikesa capamo kwi Bungano lya Citungu ilya “Akatiina ka Bukapepa.”

Icebo ca kwa Lesa tacisha kutwishika pa lwa kucindama kwa katiina ka bukapepa. Uyu musango wa katiina walilumbulwa mulya mupepi ne miku 200. Akatiina ka bukapepa bucingo, nga fintu cingamonwa ukufuma pa Amapinda 16:6 apatila: “Ku katiina ka kuli Yehova kuli ukufuma ku bubi.” Pantu, twaebwa pe Ilumbo 111:10 ukuti akatiina ka bukapepa e kutendeka kwine ukwa mano!

Kuti casoswa ukuti kwabako imbali shibili isha katiina ka bukapepa. Ica kubalilapo, akatiina ka musango yo katuninkishiwa no kutemwa. Tutiina ukufulwisha Lesa pa mulandu wa kutemwa kwesu ukukalamba kuli wene. (Amapinda 27:11) Lyene na kabili, amano pa lubali lwesu yakaafwa ukupampamika akatiina ka bukapepa muli ifwe, apantu twalishiba ukuti Lesa “wena mulilo uupwisha” kuli bonse abacita ifyalubana.—AbaHebere 12:29.

Pe Bungano lyesu ilya Citungu ilya “Akatiina ka Bukapepa,” tukapokelela ukufunda ukwingi no kukoselesha pa kukula mu katiina ka bukapepa. Ukusambilisha kwa musango yo kukapeelwa ukupitila mu malyashi, ifilangililo, ne cilangililo cikalamba cimo, capamo no kushimika kwa fya kukumanya.

Kwati fye nga fintu abena Israele ba ku kale bakambishiwe ukukanaisa ku kulongana kwabo ukukalamba minwe mikutwa, e co tulingile ukufwaya ukusangwilako ulubali lwesu ku buseko no kutunguluka kwa mabungano yesu. (Amalango 16:17) Kuti twacite ci pa kulangisha umucinshi kwi tebulo lya kwa Yehova. Shani? Pa kufika mu nshita, pa kukutika mu kusakamanisha ku cilelandwa ukufuma pa cisebele, pa kuisanshamo no mutima onse mu kwimba inyimbo. Tatulingile ukuibimba mu kulanshanya nelyo ukwendauka mu kati ka programu. Na kabili tukafwaya ukusangwilako ukufika apo twingapesha pa kuitemenwa ukubomfiwa. Ukuteyanya kwe Bungano kusanshamo amadipartmenti ayengi, ayo yonse ayakabila ababomfi aba kubomba muli yene. Tukafwaya na kabili ukusangwilako indalama, ukufika ku cipimo ico Yehova atupaala.

Lekeni umubomfi wa kwa Yehova umo na umo acite amapange nomba ku kusangwa ku nshiku shonse shitatu ishe Bungano lya Citungu ilya “Akatiina ka Bukapepa,” ukufuma pa lwimbo lwa kwiswila pa bushiku bwa kubalilapo ulucelo ukufika kwi pepo lya kusondwelela pa bushiku bwa kulekelesha icungulo.