Ni Shani Fintu Wingalenga Amapepo Yobe Ukubamo Ubupilibulo?
PA KUPAYANYA kwa kwa Yehova Lesa konse ipepo lyaliibela. Bakakaanya kuti bakupokolola Baibolo nelyo ukukulesha ukuya ku kulongana na bakapepa banobe, lelo takuli uwingakupokolola ipepo. Ipepo lyaliba ilyaumo mutengo icine cine. Fintu caba icakatama kanshi, kuli umo na umo uwa ifwe ukuteesa ili shuko no kulibomfya mu kukumanina. Cinshi cingakwaafwa ukulenga amapepo yobe ukubamo ubupilibulo?
Baibolo te citabo ca mapepo. Nalyo line, kuti twailondolola nge citabo ca mutundu wa muntu ica kusambililamo amapepo icakulisha. Amalembo ya ciHebere yeka yeka yabamo amapepo ukucila pali 150. Yamo yepi; yambi na yo yatali. Yapepelwe pa cintubwingi nelyo pa mbali, ku shamfumu nelyo bankole, mu kucimfya nelyo mu bucushi. Nga fintu Davidi aimbile mwi Ilumbo 65:2, “abantunse bonse” baya kuli Yehova, “Komfwa we pepo” (NW). Mulandu nshi Lesa apuutiilemo bakalemba ba Baibolo ukulemba amapepo yalekanalekana ayafulishe fyo?
Pa kwasuka ico cipusho, languluka 2 Timote 3:16. Asosa ukuti: “Amalembo yonse yantu yapuutwamo kuli Lesa, kabili ya mulimo.” Kanshi, amapepo ya mu Baibolo yabelamo ku kututungulula, kwati fye fintu amasesemo ya mu Malembo, ifishinte, ne lyashi lya kale fyabelako ku kututungulula. Ni shani fintu aya mapepo yengatunonsha?
Ukupitila mu kubebeta amapepo ya mu Malembo, kuti twaishiba ayapepelwe na baali mu mibele iyapalana ne yesu. Kuti twasambilila ifyo amapepo yapusana ukulingana ne mifwaile ne mibele ishingulwikeko. Ukulundapo, twalasambililako inumbwilo shipya isha kulumba no kutootela kabili tukasanga inumbwilo shiine ishabomfiwe ilyo tulelomba no kupaapaata. Mu kwipifya, amapepo ya mu Baibolo kuti yatwaafwa ukulenga amapepo yesu ukubamo ubupilibulo.
Maria, uwaishileba nyina wa kwa Yesu, mu kumonekesha aali muntu uyo wanonkelemo mu numbwilo shabomfiwe mwi pepo lyalembwa mu Baibolo. Atandalile lupwa lwakwe Elisabete pa numa bonse babili babe nabemita abana baume mu kuba no kwaafwa kwa bulesa. Maria aninike ukulumba no kutootela kuli Lesa, kabili amashiwi yakwe yamo yalipalana nga nshi na yalya ayaba mwi pepo lya mu Amalembo ya ciHebere. Cilemoneka kwati Maria aali uwabeleshanya ne pepo lyapepelwe na Hana, nyina wa kwa Samwele kasesema. Hana na o wine aimite umwana mwaume mu kuba no kwaafwa kwa kwa Lesa, imyaka ukucila pali 1,000 pa ntanshi ya nshita ya kwa Maria. Bushe napamo kuti cabe fyo Maria aleetetula pali ili pepo pa mulandu wa kuti lyalebelebesha ukuyumfwa kwakwe na o?—1 Samwele 2:1-10; Luka 1:46-55.
Ni shani pa lwa iwe? Bushe kuti waibukishako ipepo lya mu Baibolo ilyapepelwe mu mibele iyapalana ne yo ulimo? Ukusanga amapepo ya musango yo, ukuyabelenga, no kwetetula pali yene kukakwaafwa ukulenga ukulanshanya kobe na Lesa ukubamo ubupilibulo. Mu cipande cikonkelepo, twakulaalika ukubebeta amapepo yatatu aya mu Amalembo ya Mushilo. Yapepelwe mu mibele yapusanapusana, napamo iyapalako ku mibele ulimo.