Ubumi Bwawaminako Bwalilaiwa

BUSHE kuti watemwa ukulubuka ku mpika ishilenga ubumi ukuba ubwayafya? Bushe ulafwaya ukwikala mu calo umo ubumi bwaba ubwa kucankwa nge cikope cilangililwe pa nkupo ya pa ntanshi ne ya ku numa iya uno magazini? Lolekesha bwino ico cikope. Abantu bali ne fya kulye fingi. Mu cine cine bali no kuipakishe co ca kulya canunkila. Uuli onse ali uwa nsansa. Abantu ba mishobo yapusanapusana bali aba mutende kuli umo no munankwe. Nangu fye ni nama shili umutende mu shine na shine! Takuli ukulwishanya. Tapali umupiina. Tapali umulwele. Pali amekalo ayacelebuka, imiti yayemba, na menshi ayasuma, ayalengama. We mibele yawamisha ishingulwikeko!

Bushe lino isonde likatala alibapo ifyo? Ee, likaba paradise. (Luka 23:43) Lesa, uwabumbile isonde, aalifwaya ukuti abantunse bakaipakishe ubumi bwawaminako mwi sonde lya paradise. Na iwe wine kuti wabamo!

Bumi Nshi Wingatemwapo?

Bushe Paradise wa pe sonde uwa ku nshita ya ku ntanshi akapusanako shani ku calo cintu twikalamo nomba? Pali ino nshita, ukucila pa bantu amamilioni ikana limo balaale nsala cila bushiku. Lelo mu Paradise intu Lesa afwaya ukuti ikabe pe sonde, uuli onse akakwate fya kulya ifingi. Baibolo ilayo kuti: “Yehova wa milalo akacitile nko shonse umutebeto wa fya mafuta, umutebeto wa myangashi ya pa fisekwa.” (Esaya 25:6) Takwakabe kucepelwa kwa fya kulya, pantu Baibolo itila: “Mube ukupaka kwa ngano mu calo, na pa muulu wa mpili, fifukile.”—Ilumbo 72:16.

Ilelo, abengi bekala mu misakuta na mu mayanda ya babusu, nelyo balashomboka pa kusonkelela umo bekala. Bambi tabakwata umwa kwikala kabili basendama fye mu misolo. Ukulingana na kabungwe ka World Health Organization, ukufika ku bwingi bwa mamilioni 100 aya bana banono aba mu calo tabakwata ukwa kwikala. Lelo muli Paradise uuli no kwisa, uuli onse akakwate ŋanda iyo akatila ni ŋanda yakwe. Icebo ca kwa Lesa citila: “Bakakuula amayanda no kwikalamo, bakalima na ’mabala ya myangashi no kulye fisabo fya yako.”—Esaya 65:21.

Abengi bacucutika ukubombe ncito shintu bashatemwa. Ilingi line balabombesha pa nshita yalepa lelo bapokelela fye ifinono nge cibwesha. Mupepi no muntu umo mu bantu basano aba mu calo ekalila ku malipilo ayacepako pa madola 500 pa mwaka. Muli Paradise uuleisa, nangu cibe fyo, abantu bakaipakisha umulimo kabili bakamone fya kufumamo fisuma muli wene. Lesa alaya ati: “Ne milimo ya minwe yabo abasalwa bandi bakasekelamo pa myaka iingi; tabakacucutikile ibusha.”—Esaya 65:22, 23.

Pali nomba amalwele ne ntenda fili mpanga yonse. Abengi ni mpofu. Bamo ni bankomamatwi. Bambi tabenda. Lelo mu Paradise, abantu bakalubuka ku malwele ne ntenda. Yehova atila: “Umwikashi wa mu calo takasose, ati, Nindwala.” (Esaya 33:24) Kumfwa kuli abo balemana kale, ubulayo bwa kukafyo mutima bwa kuti: “E lyo yakashibulwa amenso ya mpofu, na ’matwi ya bankomamatwi yakakomonwa; e lyo uwalemana amolu akacilauka nge nsebula [impombo ilume], no lulimi lwa kwa cibulu lukaula.”—Esaya 35:5, 6.

Pali ino nshita, kwalibako ukucula no kukalipwa, ubulanda no kufwa. Lelo muli Paradise wa pe sonde, ifi fintu fyonse tafyakabeko. Ee, nangu fye ni mfwa ikaba naiya! Baibolo itila: “Lesa umwine akaba pamo na bo: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 21:3, 4.

Mu kumfwika, lyene, Paradise wa kwa Yehova uwalaiwa uwa pe sonde akapilibula ubumi bwawaminako ku mutundu wa muntu. Lelo ni shani fintu twingashininkisha ukuti akesa? Ni lilali akesa, kabili ni shani akesa? Cinshi cintu ufwile ukucita pa kuti ukabemo?