Ilyashi lya Bakabilisha ba Bufumu

“Icebo ca kwa Lesa Calelunduluka”

ICILONGANINO ca Bwina Kristu calilundulwike ukufuma pa bantu 120 ukufika ku bacilile pali 3,000 mu maawala fye ayanono pa numa ya kupangwa kwa ciko. (Imilimo 1:15; 2:41) Baibolo ilondololo kuti “icebo ca kwa Lesa calelunduluka; yalefushiwa apakalamba ne mpendwa ya basambi mu Yerusalemu.” (Imilimo 6:7) Pa numa ya myaka fye iinono, icilonganino cipya icapangilwe caishileba ukuteyanya kwalesangwa pa fyalo fikalamba fimbi mu kuba na Bena Kristu mu Africa, Asia, na ku Bulaya.

Icilonganino ca Bwina Kristu ilelo mu kupalako cilelunduluka lubilo lubilo. Ku ca kumwenako, mu Mexico, impendwa ya bakabilisha ba Bufumu yalikula mu myaka fye isano ukulundwako abacilile pali 130,000 ukufika kuli 443,640! Mu 1995, umo pa bantu bonse 59 aba mu Mexico alisangilwe ku Cibukisho ca mfwa ya kwa Kristu ilyo calesefiwa ne Nte sha kwa Yehova. Nalyo line, ukulobolola kwa ku mupashi muli cilya calo takulapwa, nga fintu cilelangililwa ku ca kukumanya cakonkapo.—Mateo 9:37, 38.

Mwi tauni limo mu citungu ca Chiapas, takwali nangu umo uwasumine ukulasambilila Baibolo ne Nte sha kwa Yehova mu ŋanda, nangu cingati baali nabashimikila imbila nsuma muli ilya ncende pa myaka mupepi na 20. Cilemoneka kwati abantu abengi muli lilye tauni baletiinishiwa ku mwaume umo uwaleshimikwa ukuti mukali. Balisakamikwe pa fyo aali no kubacita nga ca kuti aishibe fyo balesambilila Baibolo ne Nte.

Inte shakosa shibili ishakuukile muli iyi ncende shapingwilepo ukubomba pali iyi mpika pa kuya mu kulungatika ku mwaume wine uyo. Lintu bafikile pa ŋanda pa mwakwe, umukashi wakwe e wafumine ku mwinshi no kukutikisha ku bukombe ukufuma kuli Nte. Alitemenwe nga nshi cintu Baibolo isosa ukucilisha pa lwa kwikala muli paradise pe sonde. Lelo asumine ukuti umulume wakwe aali no kumucululusha nga ca kuti atendeke ukusambilila Baibolo. Inte shalondolwele ukuti taali na kwishiba ifya kubombela Lesa no kuipakisha ubumi pe sonde kuli pe na pe ukwabula ukubebeta mu kusakamanishisha cintu Baibolo isosa. Alisumine ukusambilila Baibolo.

Nga fintu caleenekelwa, umulume wakwe tatemenwe ifyacitile umukashi. Amubindile ukubomfya motoka pa kuyasangwa ku kulongana kwa Bwina Kristu, nangu cingati alisuminishiwe ukuibomfya ku mifwaile imbi. Te mulandu no kukaanya kwa mulume wakwe, uyu mwanakashi aleenda pa makasa lyonse ukuya ku Ŋanda ya Bufumu iya Nte sha kwa Yehova iyali lwa mupepiko, apalepele bakilomita 10. Mu kwangufyanya bambi muli lilye tauni balimwene ubukose bwakwe no mupampamina. Abantu batendeke ukukutika Inte nga shaya ku mayanda yabo. Bamo batampile fye no kukonka uyu mwanakashi ku kulongana. Pa numa ya kashita akepi, Inte shaletungulula amasambililo ya Baibolo mupepi na 20 muli lilye tauni!

Cibusa wa uyu mwanakashi na o apingwilepo ukusambilila Baibolo te mulandu no kukaanya kwa mulume wakwe. Ku ca kupapusha, uwamukoseleshe ukucite fyo aali mulume wa ulya mwanakashi wa ntanshi. Pa numa ya kulanda no mulume wakwe, ukukaanya kwalipwile. E fyo kanshi cali, pa numa ya myaka 20 ulubuto lwa cine ca Baibolo mu kupelako lwalilimbwike, mu kuba na bantu abacila pali 15 ukusambilila Baibolo no kusangwa ku kulongana kwa Bwina Kristu, ukusanshako aba banakashi babili, abo nomba balesabankanya imbila nsuma.