Bacitile Ukufwaya kwa kwa Yehova

Mose na Aarone—Bakabilisha Bakosa aba Cebo ca kwa Lesa

ELENGANYA uku kumoneka: Mose uwa myaka ya bukulu 80 na munyina, Aarone, beminine pa ntanshi ya muntu wakwatisha amaka pe sonde—Farao wa ku Egupti. Ku bena Egupti uyu muntu taba fye mwiminishi wa milungu. Basumino kuti umwine wine mulungu. Amonwa nga Horus wafyalwa cipya cipya, umulungu wakwata umutwe wa kwa pungwa. Capamo na Isis na Osiris, Horus apangile balesa batatu abakalamba pa kati ka balesa baume na balesa banakashi ba mu Egupti.

Uuli onse uwalepalama kuli Farao aali no kumona icipasho ca mutwe wa ngoshe uwasolomweke pa kati ka cilongwe cakwe. Catunganishiwe ifyo, iyi nsoka yalefwisa umulilo no konaula abalwani ba kwa Farao abali bonse. Nomba Mose na Aarone beshileiminina pa ntanshi ya iyi mfumu yalemonwa nga lesa mu kulomba icintu cishaikulila—ukuti aleke abena Israele baali mu busha baye pa kuti bengacito mutebeto kuli Lesa wabo, Yehova.—Ukufuma 5:1.

Yehova kale kale aali nasobela ukuti umutima wa kwa Farao wali no kuba uwatalama. E ico, Mose na Aarone tabasungwike pa kwankulako kwakwe ukwa misuula ukwa kuti: “N’ ani Yehova, uo ŋumfwe ishiwi lyakwe ku kuleka Israele aye? Yehova nshimwishibe; kabili na Israele nshakamuleke aye iyo.” (Ukufuma 4:21; 5:2) Muli fyo, icisebele calimikwe ku kushashala kwakulisha. Mu kukumana kwakonkelepo, Mose na Aarone batambike ubushinino bwa kutulumusha kuli Farao ubwa kuti baiminineko Lesa wa cine kabili uwa maka yonse.

Icipesha Amano Cacitika

Nga fintu Yehova amwebele, Aarone acitile icipesha amano ico cashinine ukupulamo kwa kwa Yehova pali tulesa twa mu Egupti. Apoosele inkonto yakwe pa ntanshi ya kwa Farao, kabili ilyo line fye yasangwike insoka ikalamba! Uwapelenganishiwa ne ci cipesha amano, Farao aitile aba buŋanga bakwe.a Mu kuba no kwaafwa kwa maka ya fibanda, aba baume balicitile icapalako ukubomfya inkonto shabo.

Nga ca kuti Farao na bashimapepo bakwe balitungulwike, cali fye ni pa kashita akanono. Elenganya ifyo ifinso fyabo fyamoneke lintu insoka ya kwa Aarone yaminine utusoka twabo, kamo kamo! Bonse abalipo baali no kumona ukuti imilungu ya mu Egupti taingalinganishiwa kuli Lesa wa cine, Yehova.—Ukufuma 7:8-13.

Nangu fye ni pa numa ya ici, nangu cibe fyo, umutima wa kwa Farao watwalilile ukuba uwatalama. Ni pa numa fye Lesa aleteleko impumo sha kupumpunta 10, nelyo ifinkunka, pali Egupti e lyo Farao mu kupelako aebele Mose na Aarone ukuti: “Imeni, fumeni mu kati ka bantu bandi, imwe na ’bana ba kwa Israele; kabiyeni, kabombeleni Yehova, ifyo mwasosele.”—Ukufuma 12:31.

Amasambililo Kuli Ifwe

Cinshi calengele Mose na Aarone ukutununuka Farao wa ku Egupti uwakwatishe amaka? Ica kubalilapo, Mose aimwene ngo ushafikapo, ukutunga ukuba “uwafina akanwa kabili uwafino lulimi.” Nelyo fye pa numa ya kwebekeshiwa ulwa kwaafwa kwa kwa Yehova, apaapeete ukuti: “Shi tumeni ku kuboko kwa muntu uo mwingatuma.” Mu mashiwi yambi, Mose apaapeete ukuti Lesa atume umuntu umbi. (Ukufuma 4:10, 13) Nangu ni fyo, Yehova abomfeshe Mose wafuuka, ukumupeela amano no bukose ifyalekabilwa ku kubombo mulimo wakwe.—Impendwa 12:3.

Ilelo, ababomfi ba kwa Yehova Lesa na Yesu Kristu balefikilisha ikambisho lya ‘kulenga aba nko shonse ukuba abasambi.’ (Mateo 28:19, 20) Pa kubomba ulubali lwesu mu kufikilisha uku kutumwa, tulingile ukubomfya bwino ukwishiba kwa mu Malembo no kulamuka ukuli konse uko pambi twingakwata. (1 Timote 4:13-16) Mu cifulo ca kutontomesha pa kupelebela kwesu, lekeni tupokelele mu citetekelo umulimo uuli onse uo Lesa atupeela. Kuti atulenga ukuba abafikapo no kutukosha ukucito kufwaya kwakwe.—2 Abena Korinti 3:5, 6; Abena Filipi 4:13.

Apantu Mose alelwisha ukukaanya kwa bantunse no kwa fibanda, mu cine cine aalekabila ukwaafwa kwacilo buntunse. Muli fyo, Yehova amwebekeshe ukuti: “Mona, nimpeela iwe ukubo mulungu kuli Farao.” (Ukufuma 7:1) Ee, Mose alikwete ukutungilila kwa bulesa no bulashi. Mu kuba no mupashi wa kwa Yehova pali wene, Mose takwete umulandu wa kutiinina Farao nelyo abaleafwilisha ulya kateka wa cilumba.

Na ifwe bene tufwile ukushintilila pa mupashi wa mushilo uwa kwa Yehova, nelyo amaka yabomba, ku kupwilikisha ubutumikishi bwesu. (Yohane 14:26; 15:26, 27) Mu kuba no kutungilila kwa bulesa na ifwe kuti twasosa amashiwi ya kwa Davidi, uwaimbile ukuti: “Lesa e o natetekela, nshatiine; cinshi ico umuntunse engacita kuli ine?”—Ilumbo 56:11.

Mu nkumbu shakwe Yehova talekeleshe Mose mu mulimo wakwe. Ukucila, Lesa asosele ukuti: “Aarone munonko akaba kasesema obe. Iwe ukasose fyonse ifyo ndekweba; na Aarone munonko akasose kuli Farao.” (Ukufuma 7:1, 2) Fintu cali kutemwa kuli Yehova ukubomba na Mose ukulingana na papelele amaka yakwe!

Lesa alitupayanishisha aba bwananyina abali Bena Kristu banensu abapokelela ukusonsomba kwa kuba Inte sha kwa Yehova, Uwapulishamo. (1 Petro 5:9) Te mulandu ne fipindami ifyo pambi twingakumanya, lekeni, kanshi tube nga Mose na Aarone—bakabilisha bakosa aba cebo ca kwa Lesa.

[Futunoti]

[Icikope pe bula 25]

Mose na Aarone mu bukose baiminineko Yehova pa ntanshi ya kwa Farao