Umutelelwe wa Cine—Nomba na Kuli Pe na Pe

TAKWINGABA ukutwishika ukuli konse ukwa kuti Yehova Lesa kuti apeela umutelelwe ku bantu bakwe. Aba e “Wa maka yonse.” (Ilumbo 68:14) Ishina lyakwe ilyaibela lyalola mu kuti “Alalenga Ukubako.” Ici cimwishibisha ukuti mu bubumbo bonse E waba fye na maka ya kwansha icipindami icili conse pa kuti engafikilisha amalayo yakwe no kupwilikisha ukufwaya kwakwe. Lesa umwine alondololo kuti: “E fyo cikabe cebo candi icifuma mu kanwa kandi: tacakabwelele ibusha kuli ine, kano cacite co natemwa, no kushuka muli ico nacitumina.”—Esaya 55:11.

Lesa alapeela umutelelwe kuli abo abamutetekela. Icebo Cakwe cilebekeshe ci. “Ishina lya kwa Yehova lupungu ulwakosa, e mo abutukilo mulungami no kuba fye,” e fyasosele Imfumu ya mano Solomone pa kupuutwamo kwa bulesa. Alundilepo ukusoso kuti: “Uutetekela Yehova akaba umwatalala.”—Amapinda 18:10; 29:25.

Umutelelwe ku Babomfi ba kwa Lesa

Yehova lyonse alipeela umutelelwe kuli abo abashintilila pali wene. Ku ca kumwenako, kasesema Yeremia aipakishe ukucingililwa na Lesa. Lintu imilalo ya bena Babele yashingile Yerusalemu umusangu, abantu baali no “[kulye] cilyo ica mu kulingwa kwa kufina, na mu kusakamikwa.” (Esekiele 4:16) Ifintu fyalyafishe nga nshi ica kuti abanakashi bamo baipike abana babo bene no kulya. (Inyimbo sha Bulanda 2:20; 4:10) Nangu cingatila Yeremia pali iyo nshita alindikwe mu cifungo pa mulandu wa kushimikila kwakwe ukwabulo mwenso, Yehova ashininkishe ukuti “[balepeela] kuli wene ubushiku no bushiku umupusa wa mukate wa mu musebo wa bakafumbika, ukufika na ku kupwililila kwa mukate onse wa mu musumba.”—Yeremia 37:21.

Lintu Yerusalemu acimfiwe ku bena Babele, Yeremia taipaiwe nelyo ukusendwa ngo mufungwa ukuya ku Babele. Mu cifulo ca ico, “mushika wa basole [uwa ku Babele] amupeele impao ne ca bupe, no kumuleka aye.”—Yeremia 40:5.

Imyanda ya myaka pa numa Yesu Kristu alaile ababomfi ba kwa Lesa ukuti: “Mwisakamikwa, amuti, Tulelya nshi? nalimo, Tulenwa nshi? nalimo, Tulefwala nshi? Pantu ifi fyonse e fyo Abena fyalo bafwaya. Pantu Shinwe wa mu muulu aishibo kuti mukabile fi fyonse. Lelo mubale mufwaye ubufumu bwa kwa Lesa no bulungami bwakwe, ne fi fyonse fikalundwako kuli imwe.”—Mateo 6:31-33.

Bushe ici cilepilibule fyo ababomfi ba kwa Yehova bali no kuipakisha ukucingililwa ku tuyofi tonse utwa lelo? Iyo, te fyo cilepilibula. Ukucena takutuna mu ba busumino. Abena Kristu ba cine balalwala, balapita mu kupakaswa, balatalwe misoka, balafwa mu masanso, no kucula mu nshila shimbi.

Nangu cingatila Yehova talati apeele umutelelwe wakumanina ukufuma ku kucenwa, amalipoti yalango kuti alabomfya amaka yakwe ukupayanishisha ababomfi bakwe no kubacingilila. Abena Kristu na kabili balacingililwa ku mafya ayengi pa mulandu wa kuti balabomfya ifishinte fya Baibolo mu myeo yabo. (Amapinda 22:3) Ukulundapo, balaipakisha umutelelwe uwaba mu kubishanya kwa mu kusaalala kwa calo ukwa bamunyina na bankashi aba ku mupashi abakwato kutemwa, abaafwana mu nshita sha kukabila. (Yohane 13:34, 35; Abena Roma 8:28) Ku ca kumwenako, mu kwankula ku kumanama kwa bamunyinabo ukwaletele ukupelelwa mu Rwanda walepaulwa ku nkondo, Inte sha kwa Yehova mu Bulaya bwangu bwangu bapeele ifya bupe no kubatumina amatani 65 aya fya kufwala no muti, ifya kulya, na fimbi ifyapayanishiwe apengapooswa amadola ya ku United States 1,600,000.—Linganyako Imilimo 11:28, 29.

Nangu line Yehova alasuminisha ifya kwesha ukuponena Abena Kristu ba cine, balikwata ubulayo bwa kuti akabapeela ubukose, ukwaafwa, na mano ya kushipikisha. Ilyo alelembela abasumina banankwe, umutumwa Paulo atile: “Ica kwesha tacamusanga kano ica buntuuntu fye; lelo wa cishinka Lesa, uushakamuleke ukweshiwa ukucila muli ico mwinganasha; lelo pamo ne ca kwesha akacita na ’pa kufuminamo, ukuti mube na ’maka ya kucishipikishako.”—1 Abena Korinti 10:13.

Ico Lesa Acitila Abantu Bakwe

Ilelo, amamilioni ya bantu balabekelwa mu kucito kufwaya kwa kwa Lesa. Tabapatikishiwa ukubombela Lesa; bamubombela pa mulandu wa kuti balimwishiba kabili balimutemwa. Mu kukonkapo, pa mulandu wa kuti Yehova alitemwa ababomfi bakwe aba bucishinka, afwaya ukwalule sonde ukuba paradise umo umutundu wa muntu uwa cumfwila ukaipakisho mutende, ubutuntulu bwa bumi, no mutelelwe kuli pe na pe.—Luka 23:43.

Lesa akacite ci ukupitila muli kamfulumende wa ku muulu, uwakwate Mfumu yakwe iyasontwa, Yesu Kristu, nga Kateka wa uko. (Daniele 7:13, 14) Baibolo ilosha kuli uyu kamfulumende pamo nga “ubufumu bwa kwa Lesa” kabili nga “ubufumu bwa mu muulu.” (1 Abena Korinti 15:50; Mateo 13:44) Ubufumu bwa kwa Lesa bukapyana pa makamfulumende yonse aya buntunse. Mu cifulo ca kukwata amakamfulumende ayengi pe sonde, kukaba fye kamfulumende umo fye epela. Akateka mu bulungami pe sonde lyonse.—Ilumbo 72:7, 8; Daniele 2:44.

Yehova alatambulwila ubwite kuli bonse ukuti bakekale pe samba lya Bufumu. Inshila imo atambulwilamo ubwite yaba kupitila mu kwananya mu ncende ishingi, Baibolo icitabo icilondolola cintu Ubufumu bukacitilo mutundu wa muntu. Baibolo e citabo casalanganishiwa mpanga yonse, kabili nomba ilesangwa, yonse nelyo lubali, mu ndimi ukucila pali 2,000.

Yehova Lesa mu kutemwa alaafwa abantu ukumfwikisha cintu Baibolo isambilisha pa lwa Bufumu. Acite fyo ukupitila mu kufunda no kutuma abantu ukuya ku kulondolwelako bambi Amalembo. Ukucila pa Nte sha kwa Yehova amamilioni yasano nomba balebilisha imbila nsuma ya Bufumu bwa kwa Lesa mu fyalo ukucila pali 230.

Bushe Umutelelwe Ukaba wa Bonse?

Bushe ni bonse bakasumina ubwite bwa kuti bakasanguke abatekwa ba Bufumu bwa kwa Lesa ukupitila mu kwalukila ku fipimo fyakwe ifyalungama? Iyo, pantu abantu abengi tabasekelela mu kucito kufwaya kwa kwa Lesa. Ukubombesha konse ukwa kwesha ukubafwilisha ukuti bawamyeko imyeo yabo balakukaana. Mu cituntulu, bailanga abene ukuba kwati ni balya bantu Yesu alosesheko ukuti: “Imitima ya aba bantu yalikutwa, na matwi yabo bomfwa no bwafya, na menso yabo nabashibatika, epali bamona ku menso yabo, no kuumfwa ku matwi, no kwiluka ku mitima, no kwaluka no kuleka [Lesa abaposhe].”—Mateo 13:15.

Ni shani kwingabako umutelelwe wa cine pe sonde ilyo pali abo abakaana ukwikala mu kumfwana ne nshila sha kwa Lesa isha bulungami? Tawingabako. Abantu babulwa bukapepa balatiinya umutelelwe wa abo bafwaya ukubombela Yehova.

Lesa tapatikisha abantu ukuti baaluke, lelo kabili takatekeleshe ububifi ku ciyayaya. Nangu cingatila Yehova mu kutekanya atwalilila ukutuma Inte shakwe ku kusambilisha abantu pa lwa nshila shakwe ne mifwaile yakwe, takatwalilile ukucite fyo pa nshita yalepa na imbi. Yesu Kristu asobele ati: “Imbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.”—Mateo 24:14.

Cinshi cintu “impela” ikapilibula kuli abo bakaana ifipimo fya kwa Lesa? Ikapilibula ubupingushi bwabipisha no konaulwa. Baibolo ilanda ulwa kulete “cilandushi ku bakaano kwishiba Lesa, na ku bashinakila mbila nsuma ya kwa Shikulwifwe Yesu; bantu abakamono kukandwa, uboni bwa muyayaya.”—2 Abena Tesalonika 1:6-9.

Mu Kupelako—Umutelelwe wa Cine Kuli pe na Pe!

Pa numa ya konaulwa kwa abo abakaana inshila sha kwa Yehova isha mutende, Ubufumu bwa kwa Lesa bukaletako inshita ya lulumbi iya mutelelwe pa kuti abatemwo bulungami aba pe sonde bakamwenemo. (Ilumbo 37:10, 11) Mwandi cilya calo cipya cikapusana ku calo twikalamo ilelo!—2 Petro 3:13.

Ifipoowe ne nsala tafyakabeko na kabili. Uuli onse akakwate ca kulya cakumanina. Baibolo itila ‘abantu na bantu bonse bakaipakisha umutebeto wa fya mafuta.’ (Esaya 25:6) Tamwakabe ukucepelwa kwa fya kulya, pantu “[mukaba] ukupaka kwa ngano mu calo, na pa muulu wa mpili.”—Ilumbo 72:16.

Takwakabe na kabili abantu ukwikala mu misakuta na mu makomboni ya bapiina. Pe samba lya Bufumu bwa kwa Lesa, bonse bakakwata amayanda ayasuma, kabili bakalya icilyo icikalimwa pa mpanga yabo abene. Baibolo yalilayo kuti: “Bakakuula amayanda no kwikalamo, bakalima na mabala ya myangashi no kulye fisabo fya yako.”—Esaya 65:21.

Mu cifulo ca kubulwe ncito ukwa mu kusaalala kwa calo, kukabako umulimo wa kufumamo cimo, kabili abantu bakalamone fisuma ukufuma mu kubomba. Icebo ca kwa Lesa citila: “Imilimo ya minwe yabo abasalwa bandi bakasekelamo pa myaka iingi; tabakacucutikile ibusha.”—Esaya 65:22, 23.

Pe samba lya kuteka kwa ubo Bufumu, abantu tabakalelwala no kufwa ku malwele. Icebo ca kwa Lesa citulayo kuti: “Umwikashi wa mu calo takasose, ati, Nindwala.”—Esaya 33:24.

Muli Paradise wa pano isonde uuli no kubako mu kwangufyanya, ukucula no kukalipwa, ubulanda ne mfwa, fikafumishiwapo. Ee, nangu fye ni mfwa! Abantu bakekala kuli pe na pe muli Paradise! Baibolo itwebo kuti Lesa “akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.”—Ukusokolola 21:4.

Pe samba lya kuteka kwa kwa Yesu Kristu, “Cilolo wa mutende,” ubumi pe sonde mu kupelako bukaba mu cine cine ubwa mutelelwe. Mu cituntulu, umutelelwe wa mu kusaalala kwa calo ukabapo pe samba lya kuteka kwalungama, ukwa kutemwa ukwa kamfulumende umo—Ubufumu bwa kwa Lesa.—Esaya 9:6, 7; Ukusokolola 7:9, 17.

[Amashiwi pe bula 4]

“Umutelelwe wa buntunse ulangililwa pa kucetekela mu fikesa ku ntanshi, . . . [ukucetekela mu] kushikatala kwa mibele ya fya mapolitiki ne fya bunonshi.”—E fyalandile umwanakashi uwikala mu Asia

[Amashiwi pe bula 5]

“Icilenga sana ukukanakwato mutelelwe caba lukaakala no buulungani.”—Umwaume uwikala mu South America

[Amashiwi pe bula 6]

“Nshaleyumfwa ukukwato mutelelwe lintu . . . twacandilwe. Nga mu calo muli inkondo, abantu kuti baba shani no mutelelwe?”—Umwana we sukulu lya ku praimari mu Middle East

[Amashiwi pe bula 7]

“Nkalayumfwa ukuba no mutelelwe lintu nkeshiba ukuti kuti naenda mu musebo ubushiku ukwabula ukwikatwa mu kwampana kwa bwamba ukwa kwikata kama.”—Umwana we sukulu umukashana mu Afrika