Bushe mu Cituntulu Kuti Mwatemwa Lesa?

“UMUNTUNSE takamone, no kuba no mweo,” e fisosa Lesa. (Ukufuma 33:20) Ukulundapo, ukutula fye pantu Baibolo yalembeelwe no kupwishishiwa takwabako ubushinino bwa kuti umuntunse uuli onse alilandile na wene mu kulungatika. Bushe tacilemoneka icayafya—kabili nangu fye icishingacitika—ukukusha icitemwishi cashika kuli umo untu ushatala aulungatana nankwe ukumumona nelyo ukumumfwa? Bushe mu cituntulu kuti cacitika ukuba no kwampana kwabamo kutemwa na Kabumba wa kubumbwa konse?

Takulingile ukubako ukutwishika ifyo kuti cacitika ukukusha ukuikuminishako mu cikabilila kuli Lesa. Pa Amalango 6:5, tubelengapo ukuti uluko lwa bena Israele lwakambishiwe ukuti: “Muletemwa Yehova Lesa wenu imitima yenu yonse, ne myeo yenu yonse, na ku maka yenu yonse.” Yesu Kristu pa numa aishilekosha ili funde ku bakonshi bakwe no kulundako ati: “Ifunde ili likulu kabili lya ntanshi.” (Mateo 22:37, 38) Bushe Baibolo kuti yatukonkomesha ukutemwa Lesa nga ukwampana kwa musango yo kwali ukushingafikwapo?

Lelo bushe Yehova atwenekela ukumutemwa pa mulandu fye wa kuti alitukambisha ukumutemwa? Iyo. Lesa abumbile abantunse ba kubalilapo babili na maka ya kuti bengamutemwa. Adamu na Efa tabapatikishiwe ukwingila mu kwampana kwabamo kutemwa na Kabumba wabo. Mu cifulo ca ico, Lesa abashingulwishe ne mibele yawamisha umo bengakusha icitemwishi cashika ukulola kuli wene. Baali no kusalapo—ukupalamina kuli Lesa nelyo ukutalukako kuli wene.

Adamu na Efa basalilepo ukupondoka. (Ukutendeka 2:16, 17; 3:6, 7) Intuntuko shabo, nangu cibe fyo, shali no kuba na maka ya kulundulula ukwampana kwabamo kutemwa na Kabumba.

Ukwenda na Lesa wa Cine

Ku ca kumwenako, mu Baibolo, calondololwa ukuti Abrahamu aali ko nga “cibusa” wa kwa Lesa. (Yakobo 2:23) Lelo nalyo line Abrahamu mu cituntulu taali eka fye uwaipakishe ukwampana kwabamo isenge na Lesa. Baibolo ilanda ulwa bantunse bambi abashapwililika abalangishe icitemwishi cine cine kuli Yehova kabili ‘abaendele na Lesa.’—Ukutendeka 5:24; 6:9; Yobo 29:4; Ilumbo 25:14; Amapinda 3:32.

Ababomfi ba kwa Lesa aba pa kale tabafyelwe no kutemwa ne citemwishi ukulola kuli Lesa. Bali no kufilundulula. Mu nshila nshi? Ukupitila mu kufika ku kumwishibila kwi shina lyakwe, Yehova. (Ukufuma 3:13-15; 6:2, 3) Ukupitila mu kwiluko kuti eko aba no kwiluka bulesa bwakwe. (AbaHebere 11:6) Ukupitila mu kwetetula lyonse pa milimo yakwe iyabamo kutemwa. (Ilumbo 63:6) Ukupitila mu kulumbulula mwi pepo kuli Lesa ifyo baaletontonkanya lwa nkati. (Ilumbo 39:12) Ukupitila mu kusambilila pa lwa busuma bwakwe. (Sekaria 9:17) Ukupitila mu kulundulula akatiina ka kukanafwaya ukumufulwisha.—Amapinda 16:6.

Bushe kuti mwasanguka cibusa wa kwa Lesa no kwenda na wene? Ca cine, tamwingamona Lesa nelyo ukumfwe shiwi lyakwe. Nangu ni fyo, Yehova alemulaalika ukuti mube ‘umulebeshi mwi hema lyakwe,’ cibusa wakwe. (Ilumbo 15:1-5) Kanshi, kuti mwamutemwa Lesa. Lelo ni shani mwingalundulula ukwampana kwe senge ne citemwishi na wene?