Ifipusho Ukufuma ku Babelenga

Bushe kuti twasosa ukuti ababomfi ba kwa Lesa ilelo abakwata isubilo lya pe sonde balikwata umupashi wa kwa Lesa umo wine nge fyakwata Abena Kristu basubwa no mupashi?

Ici cipusho tacili icipya. Uyu mulandu umo wine walilandilwepo muli “Questions From Readers” (Ifipusho Ukufuma ku Babelenga) muli The Watchtower ya April 15, 1952. Ukutule lyo bengi basanguka Inte, e co kuti twalanguluka ici cipusho na kabili, na lintu tulecite fyo twalapituluka mu cintu ifyebo fya mu kubangilila fyasosele.

Mu kwipifya, icasuko ni, ee, bamunyina na bankashi aba busumino aba mwi bumba lya mpaanga shimbi kuti bakwata umupashi wa mushilo uwa kwa Lesa umo wine fye nga abasubwa.—Yohane 10:16.

Ici, kwena, tacilepilibula ukuti umupashi ubombela mu nshila imo ine pa bantu bonse. Ibukisheni ababomfi ba busumino aba mu nshita sha pa ntanshi ya buKristu, abo mu kushininkisha bapokelele umupashi wa kwa Lesa. Mu kuba na maka ya mupashi, bamo aba bene baipeye ifiswango fyakalipisha, baundepe abalwala, kabili babuushishe fye na bafwa. Kabili bakabile umupashi pa kulemba amabuuku yapuutwamo aya mu Baibolo. (Abapingushi 13:24, 25; 14:5, 6; 1 Ishamfumu 17:17-24; 2 Ishamfumu 4:17-37; 5:1-14) The Watchtower yatile: “Nangu cingati tabaali mwi bumba lya basubwa, balisushiwemo umupashi wa mushilo.”

Mu nshila imbi, langulukeni abaume na banakashi ba mu mwanda wa myaka uwa kubalilapo abasubilwe no mupashi wa mushilo, ukusanguka abana baume ba ku mupashi aba kwa Lesa mu kuba ne subilo lya ku muulu. Bonse balisubilwe, lelo ico tacilepilibula ukuti pa numa ya ico umupashi wabombele mu nshila imo ine pali bonse bene. Ico cabe camonekesha muli 1 Abena Korinti icipandwa 12. Mulya umutumwa Paulo alelanda pa fya bupe fya mupashi. Mu 1Co 12 fikomo 8, 9, na 11 tubelengamo kuti: “Kuli umo kwapeelwa mu Mupashi icebo ca mano, na kuli umbi icebo ca kwishiba, umwabelo Mupashi umo wine; na kuli umbi kwapeelwe citetekelo mu Mupashi umo wine, na kuli umbi ifya bupe fya kuundapila mu Mupashi umo wine. . . . Lelo fyonse ifi Umupashi umo kabili uyu wine e ufitukuta, ukwakanya kuli onse umo umo ifyo wafwaya.”

Icacindamisha, te basubwa bonse ku numa kulya abakwete ifya bupe fya mupashi ifya kucite fipesha amano. Muli 1 Abena Korinti icipandwa 14, Paulo alandilemo ulwa kulongana kwa cilonganino apo umo akwete ica bupe ca kulandila mu ndimi, lelo tapalipo uwakwete ica bupe ca kupilibula. Nangu ni fyo, mu kubangilila, bonse bene balisubilwe no mupashi. Bushe kuti cabamo kupelulula ukusoso kuti munyina uwakwete ica bupe ca kulandila mu ndimi alikwete umupashi wafulilako ukucila bambi abaaliko? Iyo. Abo bambi abasubwa tabaali abapelebela, kwati nalimo balefilwa ukumfwikisha Baibolo bwino ukucila ulya nelyo balifililwe ukulolenkana ne fya kwesha bwino bwino. Umupashi wabombele mu nshila yaibela pali munyina uwalelandila mu ndimi. Nalyo line, wene e lyo na bambi balekabila ukwikala mu kupalamisha kuli Yehova no kutwalilila ‘ukwisulamo Umupashi,’ nga fintu Paulo alembele.—Abena Efese 5:18.

Ukukuma ku bashalapo ilelo, mu kushininkisha balipokelela umupashi wa kwa Lesa. Pa kashita kamo walibombele pali bene mu nshila yaibela—pa nshita lintu basubilwe no kupokelelwa nga bana baume aba ku mupashi. Pa numa ya ico batwalilila ‘ukwisulamo Umupashi,’ ukwaafwiwa na wene lintu balefwaya ukumfwikisha Baibolo mu kucilapo kulengama, ukutungulula mu mulimo wa kushimikila, nelyo ukulolenkana na mesho—aya pa lwabo nelyo aya kuteyanya.

Ifilundwa fya “mpaanga shimbi,” nangu ca kuti tabasubwa, balapokelela umupashi wa mushilo mu mbali shimbi. The Watchtower wa April 15, 1952, alandilepo kuti:

“‘Impaanga shimbi’ ilelo balabomba umulimo wa kushimikila umo wine ngo ubomba abashalapo, pe samba lya mibele ya kwesha imo ine, kabili balangisha bucishinka bumo bwine na bumpomfu. Baliila pe tebulo lya ku mupashi limo line, ukulya ica kulya cimo cine, ukufipilila icine cimo cine. Ukuba mwi bumba lya ba pe sonde, mu kuba na masubilo ya pe sonde no buseko bwaswatuka mu fintu fya pe sonde, kuti basanga ubuseko sana mu malembo yakumine ku mibele ya pe sonde iya mu calo cipya; ilintu abashalapo basubwa, abakwata amasubilo ya ku muulu no buseko bwa pa lwabo ubwaluma mu fintu fya mupashi, kuti basambilila mu kucilapo kuswatuka ifyo fintu mu Cebo ca kwa Lesa. . . . Lelo icishinka ca kuti icine cimo cine no kumfwikisha kumo kwine e ko fyaba ku mabumba yonse yabili, kabili caba ni nshila abantu umo umo baibikilishako abene ku kusambilila e cipima ukumfwikisha kwa fintu fya ku muulu ne fya pano isonde ifyo banonka. Umupashi wa kwa Shikulu e ko waba mu fipimo fyalingana ku mabumba yonse yabili, kabili ukwishiba no mucetekanya filapeelwa mu kulinganya kuli bonse, mu kuba na mashuko yamo yene aya kulya cene.”