Ikalasi lya Gileadi Ilyalenga 101—Ilyacincilile Milimo Isuma

KABUMBA wesu, Yehova Lesa, alicincilile milimo isuma, kabili e fyaba no Mwana wakwe, Yesu Kristu. Pa kuba ica kumwenako cesu, Yesu alangishe ukucincila pa kubomba umulimo wakwe uwapeelwe na Lesa, uwasanshishemo ukuipeela umwine “pali ifwe, ukuti . . . [aisangulwile] abantu bakwe bene abacincilile milimo isuma.” (Tito 2:14) Abantu 48 abaali mwi kalasi lyalenga 101 ilya Watchtower Bible School of Gilead mu cine cine balilangisha ukuti balicincilile milimo isuma. Programu wa kupwishe sukulu kuli aba bamishonari aali pa September 7, 1996, ku Watchtower Educational Center mu Patterson, New York.

Ukufunda Kubomba Ukwa Kutwalilila Ukuba Abacincila

Ceyamani wa programu wa kupwishe sukulu aali ni Carey Barber, icilundwa ce Bumba Litungulula, uwabomba imyaka ukucila pali 70 mu butumikishi bwa nshita yonse. Mu kulandapo kwakwe ukwa kwiswila, Munyina Barber akomaile pa mulimo wa kushimikila no kusambilisha uwa kwa Yesu, uwali e “lubuuto lwa calo.” (Yohane 8:12) Alondolwele ukuti Yesu tabombele ulya mulimo wabamo umucinshi eka fye lelo acincishe abasambi bakwe na bo bene ukuleka ulubuuto lwabo ukubalika. (Mateo 5:14-16) Ili shuko lya mulimo lilenga ubumi bwa Mwina Kristu ukubamo bupilibulo kabili liletako icishingamo cafina kuli abo ‘baleenda nga bana ba lubuuto.’—Abena Efese 5:8.

Pa numa ya ayo mashiwi ya kwiswila, Don Adams uubombela mu Maofesi ya Bwangalishi pa maofesi yakalamba aya ku Brooklyn alitilwe. Alandile pa mutwe wa kuti “Ukuselela ku Ntanshi, Te Kubwelela ku Numa Iyo.” Munyina Adams atontomeshe pe Sukulu lya Gileadi iline ne mifwaile ya liko—iyaba kutanununa ukushimikila kwa mbila nsuma ku fyalo fya cilendo. Alandile ulwa kulunduluka kwa kuteyanya kwa kwa Lesa, ukwasabankanya impapulo sha Baibolo ukupulinkane sonde lyonse mu ndimi ukucila pali 300. Icitabo Ukwishiba Uko Kutungulula ku Mweo wa Muyayaya, icasabankanishiwe mu 1995, e ko caba mu ndimi 111 kabili cili no kupulintwa mu ndimi shalundwako na shimbi. Kale kale cilebomfiwa ku kwaafwa abasambi bapya aba kwa Yesu ukufika ku kuipeela no lubatisho mu myeshi fye iya kupenda. E co bamishonari abapya bali no kukwata ifya kwaafwa ukusambilila Baibolo ifipya ifya kubomfya mu mulimo wabo.

Mu kukonkapo, Lyman Swingle, icilundwa ce Bumba Litungulula, alandile pa mutwe wa kuti “Twalilileni Ukubombela Yehova Umulimo Washila,” ukushimpwa pa Ukusokolola 7:15. Apantu Yehova umwine ni Lesa wa nsansa, ukumubombela lyonse e kulenga umuntu ukuba uwa nsansa. (1 Timote 1:11, NW) Pa mulandu wa uyu mulimo wa buseko, ibumba likalamba ilya bantu ukufuma mu mbali shonse ishe sonde baliisa mu kumupepa. Pa myaka iingi, abakanshiwa mwi Sukulu lya Gileadi balyaafwako abengi pali aba ukufika ku kwishiba icine mu kulungikwa. Kanshi twalikwata imilandu iingi iya kucetekelo kuti Yehova akatwalilila ukupaala abo nomba baletumwa ukulonganika ifilundwa fyafulilako ifye bumba likalamba ililetanunuka.

“Ukubelebesha Ubuseko bwa kwa Yehova” wali e mutwe wakomailwepo na Daniel Sydlik, na o uuli cilundwa ce Bumba Litungulula. Alondolwele ukuti ababomfi ba kwa Lesa bonse, ukusanshako bamishonari abapya, balikwata ishuko lya kusambilisha abantu inshila iitwala ku mweo wa muyayaya ne nshila iingabalenga ukunonkelamo ifingi nga nshi mu bumi bwa ndakai. Munyina Sydlik alondolwele ukuti: “Ukusambilisha waba mulimo wa kuilambula we mwine. Cilamonekela pa finso fya bantu abasambilisha na pa finso fya bantu abasambilila.” (Ilumbo 16:8-11) Ayambwile mishonari umo mu Estonia uwatile, “Twalikwata ubukombe bwawamisha mwi sonde lyonse, kabili ifinso fyesu e filangisha ubu bukombe.” Ukulumbulula kwa pa mpumi shesu kuti kwalenga abantu abengi ukukutika no kuba abasekelela. Abantu balafwaya ukwishiba icilenga ababomfi ba kwa Yehova ukuba aba nsansa. “E co sakamaneni ifinso fyenu,” e fyafundile Munyina Sydlik. “Abantu balaipakisha ukumona abantu ba nsansa.”

Ulysses Glass, uwasambilishako abasambi ba Gileadi ukutula fye pe kalasi lyalenga 12 mu 1949, alandile kwi bumba pa mutwe wa kuti “Mu Kutekanya, Lindeni Imyeo Yenu.” Ukutekanya cinshi? Kupeela itontonkanyo lya kupembelela icintu cimo mu mutalalila, ukulangisha ukushipikisha lintu mwakalifiwa nelyo ukulangisha ukuilama. Umuntu watekanya atwalilila ukuba uwafundinkana; uushatekanya alasuswa kabili alakalifiwa. “Abengi batontonkanya ukuti ukutekanya kulangilila ubunake nelyo ukuba ne mitima ibili,” e fyasosele Munyina Glass, lelo “kuli Yehova kulangilila ubukose ne mifwaile.” (Amapinda 16:32) Filambu nshi fifuma mu kutekanya? “Ukutekanya mu nshita ya bukali kukakupokolola ku nshiku umwanda isha nkumbabulili,” e fisosa ipinda limo ilya ciChinese. “Ukutekanya kulakusha ubuntu bwa muntu,” e fyalandilepo Munyina Glass. “Mu cishinka, kubambilila imibele imbi iishaiwamina mu kuba na penti uubelelela. Kulenga icitetekelo ukuba icifwaikwa, e lyo umutende ulakokola, no kutemwa takutelententa.”

“Caba lishuko ukupokelela umulimo ukufuma kuli Yehova ukupitila mu kuteyanya kwakwe,” e fyalondolwele Mark Noumair, uwabombele nga mishonari mu Kenya pa myaka 11 kabili pali nomba ni kafundisha wa ku Gileadi. Ilyo alelundulula umutwe wa kuti “Tamwakafike Apatali nga ca Kuti Tamukwete Icitetekelo,” Munyina Noumair akomaile pa ca kumwenapo ca Mfumu Ahasi iya kwa Yuda. Esaya aebekeshe iyi mfumu ukuti Yehova alemutungilila mu mulimo wakwe, lelo Ahasi nalyo line tatetekele Wene. (Esaya 7:2-9) Munyina Noumair lyene alondolwele ukuti bamishonari—mu cine cine, ifwe bonse—tulakabila ukukwata icitetekelo muli Yehova pa kuti twingafika apatali mu mulimo wesu uwa teokrasi. Amafya yaibela aya mulimo wa bumishonari yafwaya icitetekelo cakosa. “Lyonse ibukisheni ukuti takwabako imibele yapwililika muli ino micitile ya fintu,” e fyalondolwele Munyina Noumair.

Ifya Kukumanya Ifikoselesha Imibombele Yabamo Kucincila

Muli kosi wabo uwa kukansha kwa Gileadi, impela ya mulungu imo na imo abasambi balepoosako inshita imo mu butumikishi bwa ku cintubwingi, ubuli no kuba kabili e kwangwako kwabo ukukalamba mu mulimo wabo uwa bumishonari. Wallace Liverance, uwaba mu ciputulwa cipekanya amasambililo pe Sukulu lya Gileadi, aipwishe abasambi 15, abashimike ifya kukumanya fyabo. Leon Weaver uwa mu Komiti wa Dipartimenti wa Mulimo na Lon Schilling uwaba muli Komiti Wangalila Umulimo wa pa Bethel lyene baipwishe ifilundwa fya bakomiti ba misambo ukufuma ku Afrika na Latin America, abashimike ifya kukumanya ukukuma kuli bumishonari kabili abapeele ukupanda amano kusuma kuli bamishonari balepwishe sukulu. Calondolwelwe ukuti, mu Sierra Leone, amaperesenti mupepi na 90 aya babatishiwe mu mwaka wa mulimo uwa 1995 bayafwilishiwe na bamishonari. Mwandi kushimikwa kusuma ukwa mibombele yabamo kucincila!

Mu kupelako, Milton Henschel, presidenti wa Sosaite, alandile kwi bumba ilya bantu 2,734 pa mutwe wa kuti “Ukuteyanya kwa kwa Yehova Ukumoneka Kwaliibela.” Cinshi cilenga ukuteyanya kwa kwa Lesa ukuba icintu cimo icishingalinganishiwako? Tacaba bukulu nelyo amaka ya kuko lelo cishinka ca kuti kutungululwa na mafunde ne fya bupingushi fyalungama ifya kwa Lesa. Mu nshita sha ku kale cali bantu ba kwa Yehova, uluko lwa kwa Israele, e bapeelwe ifi fisemo fyashila, ifyalengele lulya luko ukuba ulwaibela. (Abena Roma 3:1, 2) Ilelo, ukuteyanya kwa kwa Yehova kwalikatana ilyo kulebomba pe samba lya butungulushi bwa kwa Yesu Kristu. (Mateo 28:19, 20) Kuletemfuma, kulekula. Bushe kwalibako ukuteyanya kumbi pe sonde uko Ibumba lya kuko Ilitungulula lifwayafwaya mu Cebo ca kwa Lesa, Baibolo, ilyo lishilapingulapo ukupingula kwacindama? Muli ishi nshila ne nshila shimbi, ukuteyanya kwa kwa Yehova ukumoneka mu cine cine kwaliibela.

Programu wa kucincimusha asondwelele mu kuba no kupeela badiploma no kubelengwa kwa kalata ukufuma kwi kalasi ukulumbulula ukutasha pa kukansha kwaibela.

[Akabokoshi pe bula 22]

Ifipendo fye Kalasi

Impendwa ya fyalo fyaimininweko: 9

Impendwa ya fyalo batuminweko: 12

Impendwa ya basambi: 48

Avareji wa mushinku: 31.7

Avareji wa myaka baba mu cine: 13.8

Avareji wa myaka baba mu butumikishi bwa nshita yonse: 9.8

[Icikope pe bula 23]

Ikalasi Lyalenga 101 Ilyalepwisha Isukulu lya Watchtower Bible School of Gilead

Mu mutande uli pe samba, imitande naipeelwa amanambala ukufuma ku ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo umo.

(1) Swint, H.; Zezenski, A.; Highfield, L.; Mercado, S.; Diehl, A; Chavez, V.; Smith, J.; Selenius, S. (2) Kurtz, D.; Clark, C.; Leisborn, J.; Mortensen, W.; Bromiley, A.; Toikka, L.; Marten, A.; Smith, D. (3) Zezenski, D.; Bjerregaard, L.; Garafalo, B.; Kaldal, L.; Chavez, E.; Fröding, S.; Khan, R.; Selenius, R. (4) Swint, B.; Bjerregaard, M.; Garafalo, P.; Holmblad, L.; Keyzer, M.; Fröding, T.; Palfreyman, J.; Palfreyman, D. (5) Minguez, L.; Leisborn, M.; Mercado, M.; Kurtz, M.; Diehl, H.; Toikka, J.; Clark, S.; Khan, A. (6) Minguez, F.; Marten, B.; Highfield, L.; Holmblad, B.; Bromiley, K.; Kaldal, H.; Mortensen, P.; Keyzer, R.