Ni Bani Baba Inkombe sha Cine Cine Isha Mutende?
PA May 31, 1996, bakalemba ba malyashi babilishe icamoneke kwati bukombe bwa mutende. Pa bushiku bwafumineko, kwalifumine ukulandapo kwa bulashi ukwakoseshe cishinka ca kuti Benjamin Netanyahu, uwali no kuba cilolo mukalamba uwa Israel, “alikakililweko nga nshi ku kutwalilila amapekanyo ya kuleto mutende, umutende no mutelelwe, pa kati ka calo ca Israel na bena mupalamano ba ciko, ukusanshako na bena Palestine.”
Ukusalwa kwa kwa Netanyahu ukwasabankanishiwe mpanga yonse kwalengele abengi ukulalanguluka nampo nga umutende mu Middle East uli no kuba uwa cine cine. Nga wali no kuba uwa cine cine, bushe ifyalo fimbi fili no kusendako icipasho, ukusuulako ukupusana kwabo?
Kwena, ukulayo mutende kwalicilapo kwanguka ukucilo kuukwata. Pa kwishibe ci, abengi bamoneke ukutwishika. Nga fintu kalemba wa lyashi Hemi Shalev acilondolwele, “hafu wa bena Israel nomba baleenda no kuyumfwa kwa kuti ukulubuka nakupalama, e lyo abashala basumine ukuti icalo ca Israel ciiketwe mu lukose lwa kushikitika.” Mu kusupula, atile: “Bamo balesekelela; bambi balelila.”
E fyo caba ku kwesha kwa muntu ukwa kufwayo kuleto mutende. Ukucimfya kwa ntungulushi imo na bantu bakwe abamutungilila kupilibula ukucimfiwa kwa abo bali ku lubali lwapusanako. Ukukaanaikushiwa ne fyo ifintu filecitwa e kutungulula ku kufiitwa, kabili ukufiitwa, ilingi line kutungulula ku kupondoka. Nampo nga ni mu Middle East, mu Latin America, mu Bulaya bwa ku Kabanga, nelyo ukuli konse kumbi—ukubombesha kwa mutundu wa muntu ukwa kuleto mutende kwaba ukwa cimbepa nga nshi.
Umutende wa Cine Cine Naupalama!
Pa nshita lintu mu Middle East ilyashi lya pa mutende lyafikile pa cikabe, ubukombe bwa mutende na bumbi bwalyumfwike. Ubu bukombe tabwali lyashi lyasabankanishiwe mpanga yonse ilya fya mapolitiki; kabili tacali cipangano ca mutende pa kati ka fyalo. Mu cifulo ca ico, ubu bukombe bwabilishe umutende uukesako ukupitila fye mu Bufumu bwa kwa Lesa. Ni kwi kwaumfwike ubu bukombe? Pa Mabungano ya Citungu aya “Inkombe sha Mutende wa Bukapepa” ukucila pali 1,900 ayalecitwa ne Nte sha kwa Yehova ukupulinkane calo conse mu 1996/97.
Pali aya mabungano calilengelwe ukumfwika ukuti takwaba kamfulumende wa buntunse uwingaletako umutende wa cine no mutelelwe. Mulandu nshi? Ni pa mulandu wa kuti ici kuti cafwaya ukupwisha ifintu ifitupusula umutende ubushiku no bushiku. Umutende wa cine cipilibula ukulabuuka cila lucelo ukwabula ukutiinishiwa ne nkondo nelyo ulukaakala. Cipilibula ukukanabako na kabili umusoka, ukukanalakoma ifiibi na baloko, ukukanabako na kabili umwenso wa kwendo bushiku mu musebo, indupwa ukukanalabongoloka. Ni kamfulumende nshi pano isonde uwingacite fyo fyonse? Mu cituntulu, ni kamfulumende nshi pe sonde uwingapama fye no kupama ukulaya ica musango yo?
Ubufumu bwa kwa Lesa, nangu cibe fyo, bwaliba na maka ya kuletako ifi fintu kabili bukafileta. Baibolo ilaya ukuti: “Moneni, ubwikalo bwa kwa Lesa buli pamo na bantu, kabili akekalilila pamo na bo; na bo bakaba abantu bakwe, na Lesa umwine akaba pamo na bo: kabili akafuute filamba fyonse ku menso yabo, ne mfwa tayakabeko kabili iyo; takwakabe kabili ukuloosha nangu kukuuta nangu kucululuka; pa kuti ifya ntanshi nafiya.” (Ukusokolola 21:3, 4) Mwandi kwilulukwa kuntu ico cikaleta ku mutundu wa muntu uwacula!
Ubulayo bwa kwa Yehova Lesa tabwaba ubwa fye. Baibolo itwebekesho kuti: “Lesa te muntu ukuti asose ubufi, nangu mwana wa muntu ukuti ateluke. Bushe wene asosa, no kukanacita? bushe alanda, no kukanaimika?” (Impendwa 23:19) Ee, cintu Lesa aalaya cikesabako—icikaletako amapaalo kuli bonse abaibika ku lubali lwakwe.
Inkombe sha Mutende Isha kwa Lesa
Inte sha kwa Yehova shaishibikilwa ku kushimikila kwabo ukwapimpa pa lwa Bufumu bwa kwa Lesa. Umwaka umo na umo, bonse capamo balapoosa ukucila pa maawala bilioni umo ukwebako bambi ubukombe bwa kucincimusha ubwaba muli Baibolo. Ici ciba kufikilisha amashiwi ya kwa Yesu aya kuti: “Imbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.” (Mateo 24:14) Ubukombe buntu Inte shileta bwaba mu cituntulu ni “mbila nsuma,” pantu bubilisha Ubufumu bwa kwa Lesa ubwa mu muulu ukuti e subilo fye lyeka ilya mutundu wa muntu. Kabili mwandi lyaliba lisubilo lyakosa ilya nshita ya ku ntanshi!
Nangu fye ni nomba line Ubufumu bwa kwa Lesa buleletako mu batekwa ba buko icikakilo ca cine cine ica mutende no kutemwa kwa bumunyina. Yesu atile: “Muli ici e mo bonse bakeshibilo kuti muli basambi bandi, nga mwaba no kutemwana.” (Yohane 13:35) Inte sha kwa Yehova shilatukuta ukwikalila kuli ici cifwaikwa ca kutendekelako ica buKristu bwa cine. Pali uyu mulandu, baba na bumunyina bwa kusungusha ubwikatanya abaYuda na Balungwana, abena Croatia na bena Serbia, abaHutu na baTutsi. Uyu mutende uo ku cinabwingi ica mutundu wa muntu waba ciloto fye, amamilioni ya Nte sha kwa Yehova nomba baliukwata ukushinguluke calo.
Ukukoselesha kwalikomailwepo pali programu we Bungano lya Citungu ilya “Inkombe sha Mutende wa Bukapepa” ku kutwalilila ukwikalila ku fishinte fya mu Baibolo no kutwalilila ukushimikila imbila nsuma iya Bufumu bwa kwa Lesa. Twamulaalika ukubelenga lipoti wakonkapo uwe bungano lya kubimbula ilya nshiku shitatu ilyo amamilioni baipakishe.