Bushe mu Cine Cine Mulatesekesha Amapaalo ya kwa Yehova?

KENICHI, umwaume wa mushinku wa pa kati, aile kwi tuuka lya miti mu kushita umuti wa cifine. Lintu abomfeshe ulya muti, utupumba utubaba ne myoco fyamufulwime umubili onse. Te kuti tupape ukuti Kenichi atendeke ukutwishika nampo nga kashitisha wa miti alibikileko amano ku fyo alekabila.

Bamo pambi kuti batontonkanya ulwa kwa Yehova Lesa nga fintu Kenichi amwene kashitisha wa miti. Balatwishika nga Lesa wa maka yonse, Yehova, mu cine cine alasakamana umo umo uwa ifwe. Nangu cingati balishibo kuti Lesa musuma, tabashininwa ukuti alasakamana umo umo uwa ifwe. Pali bufi nga ni lintu ifintu fyababipila atemwa baponenwa na mafya yakosa pa mulandu wa kubaka ifishinte fya Baibolo. Pa mulandu wa kukanakwata umucetekanya, bamona amafya yabo ngo tupumba utubaba ne myoco ifyafulwime Kenichi ilyo talecenekela, kwati fye mu nshila imo mulandu wa kwa Lesa.—Amapinda 19:3.

Yehova tengalinganishiwa ku bantunse abashapwililika. Abantunse bakwata ukwishiba na maka ifyapelebela. Ukupala uwashitishe imiti kuli Kenichi, balafilwa ukwiluka bwino bwino ifyo bambi bakabila. Mu kupusanako, takwaba icishingamonwa ku menso ya kwa Yehova. Ilingi line Yehova alatwaafwa ukwabula ifwe ukuti twiluke no kutesekesha cene pantu twalitemwa ukupoosesha amano pa fintu ifyo tushakwata e lyo no kusuula amapaalo ayengi twakwata. Mu cifulo ca kubepesha Yehova pa mafya ayo tukumanya, tulingile ukweshako ukwiluka amapaalo tuipakisha ukufuma kuli Yehova.

Ukulingana na Webster’s Ninth New Collegiate Dictionary, “ipaalo” kuti lyalondololwa nge “cintu iciletako insansa nelyo imikalile isuma.” Bushe mulatesekesha ukuti ici e fyo ciba maka maka ukukuma ku mapaalo ayafuma kuli Yehova?

Kapayanya Uushingalinganishiwako

Lintu umukashi atila umulume wakwe ni kapayanya musuma, ilingi line alosha mu kuti umulume alasakamana bwino ulupwa mu fintu lukabila, alapayanya ifya kulya ifyakumanina, umwa kwikala, ne fya kufwala pa kuti ulupwa lukwate nsansa ne mikalile isuma. Bushe Yehova aba shani Kapayanya musuma? Lolekesheni fye planeti wesu uwe Sonde, uwaba e mushi wa muntunse. Abela apalepa amakilomita 150 milioni ukutaluka ku kasuba, iyi ni ntamfu iyalinga iiletako icikabilila calinga pa kuti ubumi bubeko pe sonde. Ukusendeka amadigri 23.5 ukwa cibulungwa cesu kwapangilwe mu kulinga, kabili e kuletako ukwaluka kwa fiputulwa fya mwaka ifisangwilako ku busomboshi busuma. Icifumamo ca kuti isonde lilaliisha abantu ukucila pa mabilioni yasano. Mu cine cine Yehova ni Kapayanya wa kusungusha!

Ukulundapo, Baibolo itwebekesho kuti Yehova alasakamana sana umo umo uwa ifwe na fintu twikala. Tontonkanyeni, Yehova aliishiba ishina lya lumo lumo ulwa mabilioni ya ntanda, kabili takuli nangu lumo uluseba ulwingapona pa nshi ukwabulo kuti eshibe. (Esaya 40:26; Mateo 10:29-31) Fintu engacilapo ukusakamana abantunse abamutemwa kabili abashitilwe ku mulopa uwaumo mutengo uwa Mwana wakwe, Yesu Kristu! (Imilimo 20:28) Umuntu wa mano asosele bwino ati: “Ipaalo lya kwa Yehova lyene lilacindamika, kabili talundako ukulungulula.”—Amapinda 10:22.

Amapaalo Ayatucindamika

Twalikwata icintu icaumo mutengo kabili pali ico tulingile ukutashishapo. Cinshi ico? Baibolo ilondolola cene lintu isoso kuti: “Yawama kuli ine amalango ya ku kanwa kenu, ukucile sha makana isha golde na silfere.” (Ilumbo 119:72; Amapinda 8:10) Nangu golde musuma engabo waumo mutengo, amalango ya kwa Yehova yafwile ukutemwikwa ukucilapo. Ukwishiba kwalungikwa ukwa malango yakwe pamo no kushilimuka no mucetekanya ifyo Yehova apeela ku bafumacumi abafwaya icine e fintu ififwile ukukatamikwa. E fitupangasha ukuti tuleicingilila, tulebomba ne nshita sha macushi, ukucimfya amafya, na muli fyo ukuba abaikushiwa kabili aba nsansa.

Ici e fyo ciba nangu fye ku banono. Langulukeni fintu umukashana munono acimfishe amafya ukupitila mu kukonka amalango ya kwa Yehova. Umukashana uwitwa Akemi ekala mupepi na ku Tokyo. Wishi na nyina babomfeshe ifishinte fya Baibolo pa kumukansha, kabili mu milandile na mu kwimika ica kumwenako bayafwile umwana wabo umwanakashi ukuti alundulule ukutemwa Yehova no mwina mupalamano. Pa kumwena libela amafya ali no kukumanya ku sukulu, balitukwite ukumupangasha bwino. Lintu Akemi atampile isukulu, nangu cibe fyo, abanankwe bamo pa sukulu bamumwene ngo “wapusanako” ico alepepa ilyo talalya kabili mu kukonka kampingu wakwe aletalukako ku ncitilo shimo ishakaanishiwa mu malembo. Tapakokwele ibumba lya bakalulunkanya lyatendeke ukumucusha, lyalemucilinganya pa numa ya kwinuka no kumushengula amapi, ukumupota amaboko, no kumupumya.

Akemi wacaice talandwile, nangu ukukwinda pa ntanshi ya balemulungulusha. Mu cifulo ca kucite fyo, alyeseshe ukubomfya ifyo asambilile. Pa mulandu ne mibele yakwe iisuma no kushipa, abana be sukulu banankwe abengi balimucindike. Bafishishe umulandu kuli kafundisha kabili ukutule lyo, Akemi tacushiwepo na kabili ku sukulu.

Cinshi calengele ukuti Akemi acimfye amafya? Ukwishiba kwalungikwa, ukushilimuka, na mano ayafuma kuli Yehova ifyo abafyashi bakwe bapampamike muli wene. Alishibe ulwa kushipikisha kwa kwa Yesu, kabili e calengele no kuti apashanye ica kumwenako cakwe. Baibolo yalimwaafwile ukwiluko kuti abantu bamo bacita ifyalubana mu kukanaishiba, kabili yamukoseleshe ukupata ifilubo ifyo balya bakalulunkanya bacitile ukwabulo ukupata abantu abene.—Luka 23:34; Abena Roma 12:9, 17-21.

Ukuba kwena, takwingaba abafyashi abengatemwa ukumona umwana wabo alesaalulwa no kucushiwa. Nalyo line, kuti mwaelenganya fintu abafyashi ba kwa Akemi batemenwe lintu baumfwile fyonse ifyacitike. Mu cine cine, abana ba musango yu lipaalo ukufuma kuli Yehova.—Ilumbo 127:3; 1 Petro 1:6, 7.

Ukulolela Yehova mu Kutekanya

Nangu ni fyo, ilyo tamulapokelela amapaalo ya kwa Yehova, limo limo mulingile ukulolele nshita yakwe. Yehova aliishiba imibele yenu kabili akapayanya ico mukabila lintu cingaba ica kunonsha sana kuli imwe. (Ilumbo 145:16; Lukala Milandu 3:1; Yakobo 1:17) Nalimo mwalitemwa ukulya ifitwalo, lelo cinshi mwingatontonkanya pa lwa kwa shibweni uwingamupeela icitwalo ilyo tacilapya? Nampo nga liapele, icungwa, atemwa icitwalo cimbi, kuti mwatemwa icitwalo icipiile, icilimo amenshi kabili icalowa. Ukupalako, Yehova apayanya fintu mukabila pa nshita yalinga—te mu kubangilila sana kabili te mu kuceelwa sana.

Ibukisheni ica kukumanya ca kwa Yosefe. Te lubembu lwakwe lwalengele ukuti asangwe mu cifungo ca bena Egupti. Umufungwa munankwe, kasumika wa kwa Farao, aleenekela ukukakulwa, e ico alaile ukufisho mulandu wa kwa Yosefe kuli Farao. Lelo pa numa ya kukakulwa taibukishe Yosefe. Camoneke kwati Yosefe alilekeleshiwe. Nangu cibe fyo, ilyo papitile imyaka ibili iituntulu, asukile na o akakulwa mu cifungo na mu kupelako aishilecitwa ukube nkonkani ya kwa kateka mu Egupti. Mu cifulo ca kukanatekanya, Yosefe alilolelele Yehova. Pali uyu mulandu, alipaalilwe mu nshila iyabakile imyeo ya bena Israele na bena Egupti.—Ukutendeka 39:1–41:57.

Masashi ali ni eluda mu cilonganino cimo ku kapinda ka ku kuso aka Japan. Wena te mu cifungo ali, lelo ali no kulolela Yehova. Mulandu nshi? Ukutula apo Isukulu lya Kukansha Ilya Butumikishi lyatendekele, isukulu ilikansha abatumikishi abafikapo aba Bwina Kristu, Masashi apangile ubuyo bwakosa ukuti akasangweko. Apepele mu mukoosha pa lwa ilyo shuko. Painiya munankwe alilaalikwe, lelo Masashi te mulandu no mupampamina akwete, talaalikwe. Alilengelwe insoni nga nshi.

Nangu ni fyo, alicitilepo fimo pa kuti engacincintila ukuyumfwa kwakwe. Abelengele Baibolo ne mpapulo ishisabankanishiwa na Watch Tower Society, ukutontomesha pa mibele pamo ngo kuicefya no kulama inkuntu. Aliteulwile imitontonkanishishe yakwe na muli fyo asangile ukwikushiwa mu mulimo wakwe. Lyene, lintu taenekele no kwenekela, alilaalikwe kwi sukulu.

Pa kuba nalundulula imibele pamo ngo kutekanya no kuicefya, alimwenenemo mu kucilanapo mwi sukulu. Pa numa, Masashi alipeelwe ishuko lya kubombela bamunyina nga kangalila wenda. Ee, Yehova alishibe ico Masashi alekabila kabili acipayenye lintu fye cali no kumucitila ubusuma.

Fwayeni Amapaalo Yakwe

E ico, Yehova taba nga ulya kashitisha wa miti. Nangu cingati tulafilwo kwiluka fintu Yehova atusunga no kutusakamana, icikuuku cakwe caishile mu misango yalekanalekana—mu nshita na mu nshila isha kutunonsha. E co twalilileni ukufwaya amapaalo yakwe. Ibukisheni ukuti kale kale mwalikwata imilandu iingi iya kutashishapo. Mwalipaalwa ukuba ne fya kupayanya ifikabilwa ukuti muleikala pe sonde. Mwalipeelwa ukwishiba Yehova ne nshila shakwe ishapwililika. Mwalipeelwa ukushilimuka. Kabili mwalinonko mucetekanya. Ifi fyonse e fisangwilako ku busuma bwenu ne nsansa.

Twalilileni ukusambilila Baibolo lyonse pa kuti muleipakishe paalo lya kwa Yehova mu kucilapo. Lombeni kuli Yehova amwaafwilishe ukumfwikisha no kubomfya ifisambilisho ifyaumo mutengo ifyaba mu Cebo cakwe icapuutwamo. Mu cine cine fikamucindamika, ica kuti tamwakabulishe kantu. Ee, pali nomba kuti mwakwate nsansa no kwikushiwa, e lyo mu calo cipya icikesa mukailemena ubumi ubwapaka.—Yohane 10:10; 1 Timote 4:8, 9.

[Icikope pe bula 23]

Amapaalo ya kwa Yehova yalyumo mutengo ukucila golde