Ubuntungwa bwa Bukata Buli Mupepi Ku Bana ba kwa Lesa

“Ifibumbwa fyalengelwe ukulamba ku kuicusha fye, . . . pa kucetekelo kwa kuti ifibumbwa na fyo fikalubulwa ku busha bwa kubola no kutwalwa mu buntungwa bwa bukata bwa bana ba kwa Lesa.”—ABENA ROMA 8:20, 21.

1. Ni shani fintu ilambo lya kwa Yesu lyalangililwe pa Bushiku bwa Kukonsolwela?

YEHOVA apeele Umwana wakwe uwafyalwa eka ukube lambo lya cifuta mulandu ku kwiswila abantunse ba 144,000 inshila ya ku bumi bwa ku muulu ne filolelo fya bumi bwa ciyayaya ku bantu bonse. (1 Yohane 2:1, 2) Nga fintu casoselwe mu cipande citangilileko, ilambo lya kwa Yesu ku Bena Kristu basubwa no mupashi lyalangililwe lintu shimapepo mukalamba uwa mu Israele apeele ing’ombe ilume nge ca kuninika ca pa lubembu ulwa mwine wine, ulwa ba mu ng’anda yakwe, no mukowa wa kwa Lebi pa Bushiku bwa pa mwaka ubwa Kukonsolwela. Pa bushiku bumo bwine, apeele imbushi nge ca kuninika ca pa lubembu ica bena Israele bonse abashala, nga fintu fye ne lambo lya kwa Kristu likanonsha abantu mu cinkumbawile. Sawe umumi mu mampalanya asendele imembu sha bantu bonse pamo isha mwaka wafumineko, no kulubila mu matololo.a—Ubwina Lebi 16:7-15, 20-22, 26.

2, 3. Bushe amashiwi ya kwa Paulo ayalembwa pa Abena Roma 8:20, 21 yalola mwi?

² Pa numa ya kulondolola isubilo lya bantu abali no kusanguka “abana ba kwa Lesa,” umutumwa Paulo atile: “Ifibumbwa filolela no kufulukisha ukusokololwa kwa bana ba kwa Lesa. Pantu ifibumbwa fyalengelwe ukulamba ku kuicusha fye, te ku kuitemenwa iyo, lelo pa mulandu wa wafilamfishe, pa kucetekelo kwa kuti ifibumbwa na fyo fikalubulwa ku busha bwa kubola no kutwalwa mu buntungwa bwa bukata bwa bana ba kwa Lesa.” (Abena Roma 8:14, 17, 19-21) Bushe aya mashiwi yalola mwi?

³ Lintu Adamu shifwe abumbilwe ngo muntu wapwililika, aali ni “mwana Lesa.” (Luka 3:38) Pa mulandu wa kubembuka, aishileba mu “busha bwa kubola” no kwambukishako umushobo wa bantu iyo ine mibele. (Abena Roma 5:12) Lesa asuminishe abantu ukufyalwa no kulolenkana no “kuicusha fye” pa mulandu wa kukanapwililika kuntu bapyana, lelo alipeele isubilo ukupitila mu “bufyashi,” Yesu Kristu. (Ukutendeka 3:15; 22:18; Abena Galatia 3:16) Ukusokolola 21:1-4 kulosha ku nshita lintu ‘imfwa, ukuloosha, ukukuuta, no kukalipwa fishakabeko na kabili.’ Apo ubu bwaba bulayo ubo “umuntu” alaiwa, cilatwebekesha ukuti ubwikashi bupya ubwa pe sonde ubwa bantunse abakekala mu kuteka kwa Bufumu bukamonako ukubweshiwa kwakumanina ukwa butuntulu bwa muntontonkanya no mubili no bumi bwa muyayaya nga “bana ba kwa Lesa” aba pe sonde. Mu Kuteka kwa Myaka Ikana Limo ukwa kwa Kristu, abantu ba cumfwila “[bakalubulwa] ku busha bwa kubola.” Nga baishininkisha ukuba aba cishinka kuli Yehova mu kweshiwa kwa kupelako, bakalubuka kuli pe na pe ku lubembu lwapyanwa na ku mfwa. (Ukusokolola 20:7-10) Abakaba pe sonde pali iyo nshita ‘bakatwalwa mu buntungwa bwa bukata bwa bana ba kwa Lesa.’

Baletila “Iseni”

4. Bushe calola mwi ‘ukubuulapo ica bupe amenshi ya mweo’?

⁴ Mwandi lisubilo lya kusungusha ilyatambikwa ku bantu! E mulandu wine Abena Kristu bafyalwa ku mupashi abacili pe sonde babela na pa ntanshi mu kulanda pali lyene kuli bambi! Pamo nga abakaba ulubali lwa kwa “nabwinga” wa Mwana wa mpaanga uwakatamikwa, Yesu Kristu, aba bashalapo basubwa balibimbwa mu kufikilishiwa kwa aya mashiwi ya mu busesemo aya kuti: “Umupashi na Nabwinga batila, Iseni: no uleumfwa asose, ati, Iseni; no uleumfwe cilaka ese, uulefwaya abuulepo ica bupe amenshi ya Mweo.” (Ukusokolola 21:2, 9; 22:1, 2, 17) Ukumwenamo mwi lambo lya kwa Yesu ilya cifuta mulandu takwapelela fye ku basubwa ba 144,000 beka iyo. Umupashi wa kwa Lesa utwalilila ukubombela mu bashalapo abe bumba lya kwa nabwinga abali pe sonde mu kusosa abati “Iseni.” Onse uuleumfwa uuli ne cilaka ca bulungami aleitwa ukusoso kuti “Iseni,” ukushukila ukupayanya kwapaka ukwa kwa Yehova ukwe pusukilo.

5. Inte sha kwa Yehova baliba aba nsansa ukuba na bani pa kati kabo?

⁵ Inte sha kwa Yehova balitetekela ukupayanya kwa kwa Lesa ukwa bumi ukupitila muli Yesu Kristu. (Imilimo 4:12) Baliba aba nsansa ukuti pa kati kabo pabapo aba mitima ya bufumacumi abafwayo kusambilila pa lwa mifwaile ya kwa Lesa no kucito kufwaya kwakwe. Amayanda yabo aya Bufumu yalisuka ku kupokelela bonse abafwaya ‘ukwisa no kubuulapo ica bupe amenshi ya mweo’ muli ino “nshita ya ku mpela.”—Daniele 12:4.

Ukwaluka Ukulingana ne Nshita

6. Ni shani fintu umupashi wa kwa Lesa wabomba pa babomfi ba kwa Yehova pa nshita shalekanalekana?

⁶ Lesa alikwate nshita ya kubombelapo imifwaile yakwe, kabili ici calikuma ku nshila abombelamo na bantu. (Lukala Milandu 3:1; Imilimo 1:7) Nangu cingatila umupashi wa kwa Lesa waleisa pa babomfi bakwe aba pa ntanshi ya buKristu, tabaafyelwe nga bana bakwe aba ku mupashi. Nangu cibe fyo, ukutendekela pali Yesu, inshita ya kwa Yehova yalifikile iya kubomfya umupashi wa mushilo ku kufyala abaume na banakashi baipeela ku kuyapyana imyulu. Ni shani muno nshiku shesu? Umupashi umo wine ulebombela pa “mpaanga shimbi” isha kwa Yesu, lelo taulebimbula muli bene isubilo no kufwaisha ubumi bwa ku muulu. (Yohane 10:16) Apo isubilo Lesa abapeela lya kuba no bumi bwa ciyayaya pe sonde lya paradise, mu nsansa balatungilila abashalapo basubwa mu kushimikila muli ino nshita ya kusela ukufuma ku calo cikote ukuya ku calo cipya ica kwa Lesa ica bulungami.—2 Petro 3:5-13.

7. Mulimo nshi uwa kulobolola untu Abasambi ba Baibolo bayangilweko, lelo cinshi cintu baishibe pa lwa paradise?

⁷ Lesa atendeke “ukutwala abana abengi ku [bukata, NW]” pa kupongolola umupashi wa mushilo pa Pentekoste 33 CE., kabili cimoneke fyo alimikeko inshita ilyo impendwa yonse pamo 144,000 iya kwa “Israele wa kwa Lesa” uwa ku mupashi yali no kukumanina. (AbaHebere 2:10; Abena Galatia 6:16; Ukusokolola 7:1-8) Ukutendeka mu 1879, umulimo wa kulobolola uwabimbilemo Abena Kristu basubwa e walelumbulwa libili libili muli uno magazini. Lelo Abasambi ba Baibolo (nomba abetwa Inte sha kwa Yehova) na kabili balishibe ukuti Amalembo yalatambika isubilo lya bumi bwa ciyayaya pe sonde lya paradise. Ku ca kumwenako, Ulupungu lwa kwa Kalinda ulwa ciNgeleshi ulwa July 1883 lwatile: “Ilyo Yesu akaba naimiko bufumu, no kupwisha ububifi ne fintu fimbi, lino isonde likasanguka paradise, . . . na bonse ababa mu nshishi e mo bakesa. Kabili pa kuba abanakila ku mafunde yakabamo kuti pambi baikalilila pe na pe muli lyene.” Mu kupita kwa nshita, ukulobolola abasubwa kwaleya kuleshiminina, kabili panono panono abantu abashali ne subilo lya ku muulu baalelobololwa ukuletwa mu kuteyanya kwa kwa Yehova. Pali iyi nshita, Lesa apeele ababomfi bakwe abasubwa, Abena Kristu bafyalwa libili, ukushilimuka kukalamba.—Daniele 12:3; Abena Filipi 2:15; Ukusokolola 14:15, 16.

8. Ni shani fintu ukumfwikisha isubilo lya pe sonde kwaleya kulekulilako ku kutendeka kwa ba 1930?

⁸ Ababa ne subilo lya pe sonde balibishanya ne cilonganino ca Bwina Kristu maka maka ukutula mu 1931. Muli ulya mwaka, Yehova alisanikile abashalapo Abena Kristu bafyalwa ku mupashi ukumono kuti Esekiele icipandwa 9 alosha kuli ili bumba lya pe sonde, abaleshilwa kashilwa ku kupusunsukila mu calo cipya ica kwa Lesa. Mu 1932 basondwelele ukuti abapale mpaanga aba muno nshiku aba musango yo baimininweko na Yonadabu (Yehonadabu) uwabishenye na Yehu. (2 Ishamfumu 10:15-17) Mu 1934 cali icaumfwiko kuti “baYonadabu” balingile “ukushishiwa,” nelyo ukuipeela abene kuli Lesa. Mu 1935 “cinkupiti mukalamba,” nelyo “ibumba likalamba”—akale ilyalemonwa nge bumba lya ku mupashi ilya bubili ilyali no kuba ‘abanabo’ kuli nabwinga wa kwa Kristu mu muulu—lyaishibikwe nge mpaanga shimbi ishakwata isubilo lya pe sonde. (Ukusokolola 7:4-15; 21:2, 9; Ilumbo 45:14, 15) Maka maka ukutula mu 1935 abasubwa baaliluminisha ukusapika abantu batambalala abafwaisha ukwisaikala pe sonde lya paradise kuli pe na pe.

9. Pa numa ya 1935, mulandu nshi Abena Kristu bamo baalekeele ukulyako ifimpashanya pa Mulalilo wa kwa Shikulu?

⁹ Pa numa ya 1935 Abena Kristu bamo abaalelyako ku mukate no kunwako umwangashi pa Mulalilo wa kwa Shikulu balilekele. Mulandu nshi? Pantu balishibe ukuti isubilo lyabo lyali lya pe sonde, te lya ku muulu. Umwanakashi umo uwabatishiwe mu 1930 atile: “Nangu ca kuti [ukulyako] kwalemonwa ukuti kwali ukwalinga, maka maka ku batumikishi ba nshita yonse abapimpa, ine nshashininwe ukuti nalikwete isubilo lya ku muulu. Lyene, mu 1935, twaishileumfwikisha ukuti kwalelonganikwako ibumba likalamba ilyakwete isubilo lya kwikala kuli pe na pe pe sonde. Ubwingi bwesu twalisekelele ukumfwikisho kuti twali ulubali lwe bumba likalamba, kabili twalilekele ukulyako ifimpashanya.” Nangu fye ifyalelembwa mu mpapulo sha Bwina Kristu fyalyalwike. Ilintu impapulo sha myaka ya kale shalelembelwa maka maka abakonshi ba kwa Yesu abafyelwe ku mupashi, ukutula mu 1935 no kuya ku ntanshi Ulupungu lwa kwa Kalinda ne mpapulo shimbi isha “musha wa cishinka” shalepayanya ica kulya ca ku mupashi icalekumanisha ukukabila kwa bonse abasubwa na balebishanya na bo abaali ne subilo lya pe sonde.—Mateo 24:45-47.

10. Ni shani fintu pambi uwasubwa wabulwo busumino engapyanikwapo?

¹⁰ Tutile uwasubwa nga aba uwabulwo busumino. Bushe kuti apyanikwapo? Paulo e cintu alangilile lintu alelanda pa muolife wa cimpashanya. (Abena Roma 11:11-32) Nga ca kuti uwafyalwa ku mupashi ali no kupyanikwapo, cilepalishako kuti Lesa kuti apeela ubo bwite bwa ku muulu kuli umo uo icitetekelo cakwe caba ne ca kumwenako cisuma mu kubomba umulimo washila pa myake ingi.—Linganyeniko Luka 22:28, 29; 1 Petro 1:6, 7.

Imilandu Iingi iya Kutashishapo

11. Te mulandu ne fingabe subilo lyesu, Yakobo 1:17 atwebekesho lwa cinshi?

¹¹ Ilyo lyonse twabombela Yehova mu busumino, akekusha ifyo tukabila no kufwaisha kwalungama. (Ilumbo 145:16; Luka 1:67-74) Nampo nga isubilo lya cine cine twakwata lya kuya ku muulu nelyo icilolelo cesu ca pe sonde, twaliba ne milandu iingi iisuma iya kutashishapo Lesa. Fyonse fintu acita filawamina abamutemwa. Umusambi Yakobo alandile ukuti “ica kupeelwa conse icisuma ne ca bupe conse icafikapo cafuma mu muulu, ciika ukufuma kuli Shifwe wa fya lubuuto,” Yehova Lesa. (Yakobo 1:17) Natulangulukepo fimo ifya ifi fya kupeelwa na mapaalo.

12. Mulandu nshi twingasosele fyo Yehova alipeela umo umo uwa babomfi bakwe aba busumino isubilo ilishaiwamina?

¹² Yehova alipeela umo umo uwa babomfi bakwe aba busumino isubilo ilishaiwamina. Bamo alibeeta ku bumi bwa ku muulu. Yehova apeele inte shakwe isha pa ntanshi ya buKristu isubilo lyawamisha ilya kubuukila ku bumi pe sonde. Ku ca kumwenako, Abrahamu alisumine mu kubuuka kabili alelolelo “Musumba uuli ne ca kukuulapo”—Ubufumu bwa mu muulu umo akabuukila ku bumi bwa pe sonde. (AbaHebere 11:10, 17-19) Na kabili, muli ino nshita ya ku mpela, Lesa alepeela amamilioni isubilo lya bumi bwa muyayaya pe sonde lya paradise. (Luka 23:43; Yohane 17:3) Mu kushininkisha, onse uo Yehova aapeelako isubilo ilikankala ilya musango yo alingile ukutasha nga nshi.

13. Ni shani fintu umupashi wa mushilo uwa kwa Lesa wabomba pa bantu bakwe?

¹³ Yehova apeela umupashi wakwe uwa mushilo nge ca bupe ku bantu bakwe. Abena Kristu abaapeelwa isubilo lya ku muulu basubwa no mupashi wa mushilo. (1 Yohane 2:20; 5:1-4, 18) Lelo, ababomfi ba kwa Lesa ababa ne filolelo fya pe sonde balaafwiwa no kutungululwa no mupashi. Mose aali pa kati kabo, uwali no mupashi wa kwa Yehova, uwali na pa baume 70 abasontelwe ku kumwaafwa. (Impendwa 11:24, 25) Pa kukuntwa no mupashi wa mushilo, Besalele abombele nge ntukushi yaishibisha mu mulimo wa pe hema lya kwa Israele. (Ukufuma 31:1-11) Umupashi wa kwa Lesa waishile pali Gideone, Yefta, Samsone, Davidi, Eliya, Elisha, na bambi. Nangu cingati aba bantu tabakatwalwe mu bukata bwa ku muulu, balitungulwilwe no kwafwiwa no mupashi wa mushilo, nga fintu caba ku mpaanga shimbi isha kwa Yesu ilelo. E co kanshi, ukukwato mupashi wa kwa Lesa takupilibula ukuti ninshi umuntu naitwa ku muulu. Lelo umupashi wa kwa Yehova ulatungulula, no kutwaafwa ukushimikila no kubomba imilimo imbi iyo Lesa apeela, ulatupeela amaka ukucila pa ya lyonse, kabili ulaletako muli ifwe ifisabo fya kutemwa, ukusekelela, umutende, ukutekanya, icongwe, ubusuma, icishinka, ukunakilila, no kuteko mutima. (Yohane 16:13; Imilimo 1:8; 2 Abena Korinti 4:7-10; Abena Galatia 5:22, 23) Bushe tatulingile ukutasha pali ici ca kupeelwa ico Lesa apeela mu luse lwakwe?

14. Tumwenamo shani mu fya kupeelwa ififuma kuli Lesa ifya kwishiba na mano?

¹⁴ Ukwishiba na mano fyaba fya kupeelwa ififuma kuli Lesa ifyo tulingile ukutashishapo, nampo nga isubilo lyesu lya ku muulu nelyo lya pe sonde. Ukwishiba kwalungikwa pa lwa kwa Yehova kulatwaafwa ‘ukusuminishe fyacilamo,’ no ‘kwenda umwawamina Shikulu ku kutemuna konse.’ (Abena Filipi 1:9-11; Abena Kolose 1:9, 10) Amano ya bukapepa yabomba nge ca kucingilila ne ca kutungulula mu bumi. (Amapinda 4:5-7; Lukala Milandu 7:12) Ukwishiba kwine kwine na mano fyashimpwa pa Cebo ca kwa Lesa, kabili abashalapo basubwa abanono bacebushiwa maka maka ku cintu cisosa pa lwe subilo lyabo ilya ku muulu. Nangu cibe fyo, ukutemwa Icebo ca kwa Lesa no kucumfwikisha te nshila Lesa alangilamo ukuti twaliitwa ku bumi bwa ku muulu. Abantu pamo nga Mose na Daniele balilembeleko fye ne fiputulwa fimo ifya Baibolo, lelo bakabushiwilwa ku bumi bwa pe sonde. Nampo nga isubilo lyesu lya ku muulu nelyo lya pe sonde, ifwe bonse tupokelela ica kulya ca ku mupashi ukupitila mu “musha wa cishinka kabili uwashilimuka” uwasuminishiwa na Yehova. (Mateo 24:45-47) Fintu bonse twaba aba kutasha pa kwishiba uko twanonka!

15. Cinshi caba e cimo ica fya kupeelwa fyakulisha ifyafuma kuli Lesa, kabili mucimona shani?

¹⁵ Cimo ica fya kupeelwa fyakulisha ifyafuma kuli Lesa caba kupayanya kwabamo kutemwa ukwe lambo lya cifuta mulandu ilya kwa Yesu, ilitunonsha nampo nga twaba ne cilolelo ca ku muulu nelyo twaba ne subilo lya pe sonde. Lesa atemenwe aba pano isonde “ukutemwa kwa kuti apeele Umwana wakwe uwafyalwa eka, ukuti onse uumutetekela eonaika, lelo abe no mweo wa muyayaya.” (Yohane 3:16) Kabili ukutemwa kwa kwa Yesu kwamulengele “ukupeelo mweo wakwe icilubula ca pa bengi.” (Mateo 20:28) Nga fintu umutumwa Yohane aalondolwele, Yesu Kristu “e cikonsolwelo ca pa membu shesu [isha basubwa]; kabili te ca pa shesu sheka, lelo ne ca pa membu sha ba pano isonde bonse.” (1 Yohane 2:1, 2) E ico, bonse tulingile ukutasha mu kushika pali uku kupayanya kwabamo kutemwa ukwe pusukilo ilitwala ku bumi bwa ciyayaya.b

Bushe Mukasangwako?

16. Ca kucitika nshi icikalamba icikasefiwa pa kuwa kwa kasuba pa April 11, 1998, kabili ni bani balingile ukusangwako?

¹⁶ Ukutasha pa cilubula icapayanishiwa na Lesa ukupitila mu Mwana wakwe kulingile ukutusesha ukusangwa pa Mayanda ya Bufumu nelyo pa fifulo fimbi apo Inte sha kwa Yehova shikalongana pa numa ya kuwa kwa kasuba pa April 11, 1998, ku kwibukisha imfwa ya kwa Kristu. Lintu aimike uku kusefya na batumwa bakwe aba busumino pa bushiku bwa kulekelesha ubwa bumi bwakwe pe sonde, Yesu atile: “Citeni ici ku kunjibukisha.” (Luka 22:19, 20; Mateo 26:26-30) Abasubwa banono abashalapo bakalyako umukate ushatutumuka, uwimininako umubili wa buntunse uwa kwa Yesu uwabulo lubembu no kunwako mwangashi wakashika uushalungwamo nangu cimo uwimininako umulopa wakwe uwaitilwe mwi lambo. Bena Kristu bafyalwa ku mupashi beka fye e balingile ukulyako pantu ni beka fye e baba mu cipingo cipya na mu cipingo ca Bufumu no kukwata ubunte ubushingakaanwako ubwa mupashi wa mushilo uwa kwa Lesa ukuti isubilo lyabo lya ku muulu. Amamilioni bambi bakasangwako nga aba kumonako aba mucinshi abatasha pa kutemwa ukwalangwa na Lesa na Kristu ukukonkana ne lambo lya kwa Yesu ilyalenga ukuti kukabeko ubumi bwa ciyayaya.—Abena Roma 6:23.

17. Cinshi tulingile ukulaibukisha ukukuma ku kusubwa no mupashi?

¹⁷ Ifisumino twasuminemo uko twalepepa kale, ukukuntukilwa kukalamba ukwisa pa mfwa ya mutemwikwa, amafya ayo tukumanya mu bumi bwa pe sonde, nelyo ukuyumfwa kwa kuti walipokelelapo ipaalo ilyaibela ukufuma kuli Yehova, kuti fyalenga bamo mu kuluba ukutungo kuti bali no kuba no bumi bwa ku muulu. Lelo bonse tuli no kwibukisho kuti Amalembo tayatukambisha ukulyako ifimpashanya fya pa Cibukisho pa kulango kutasha pe lambo lya cifuta mulandu ilya kwa Kristu. Na kabili, ukusubwa no mupashi “te ca ufwaya nangu ca ubutuka iyo, lelo ca kwa Lesa,” uwafyele Yesu ngo Mwana wa ku mupashi kabili uutwala abana bambi ba 144,000 fye beka ku bukata.—Abena Roma 9:16; Esaya 64:8.

18. Mapaalo nshi yalepembelela icinabwingi ca abo abalebombela Yehova ilelo?

¹⁸ Isubilo lyapeelwa na Lesa ku cinabwingi ca bantunse abalebombela Yehova muli shino nshiku sha kulekelesha lyaba bumi bwa muyayaya mwi sonde lya paradise. (2 Timote 3:1-5) Mu kwangufyanya fye, bali no kuipakisha uyu paradise wa kusungusha. Bacilolo pali iyo nshita e bakalatungulula ifya pano isonde ukupitila mu mitekele ya ku muulu. (Ilumbo 45:16) Kukabako imibele ya mutende ilyo abekashi ba pe sonde bakalaumfwila amafunde ya kwa Lesa no kusambilila ifyafulilako pa lwa nshila sha kwa Yehova. (Esaya 9:6, 7; Ukusokolola 20:12) Kukabe milimo iingi iya kubomba, pa kukuula amayanda no kunashe sonde. (Esaya 65:17-25) Kabili tontonkanyeni pa lwa kulundana cipya cipya ukwa ndupwa ilyo abafwa bakabwelela ku bumi! (Yohane 5:28, 29) Pa numa ya bwesho bwa kupelako, ububifi bonse bukaba nabupita. (Ukusokolola 20:7-10) Mu kukonkapo, isonde kuli pe na pe likesulamo abantu bapwililika ‘abakalubulwa ku busha bwa kubola no kukwata ubuntungwa bwa bukata bwa bana ba kwa Lesa.’

[Amafutunoti]

Kuti Mwayasuka Shani?

◻ Bushe calola mwi ‘ukubuulapo ica bupe amenshi ya mweo’?

◻ Nampo nga isubilo lyesu lya ku muulu nelyo lya pe sonde, milandu nshi twakwata iya kutashishapo Lesa?

◻ Kusefya nshi ukwa pa mwaka uko bonse tulingile ukusangwako?

◻ Cinshi cintu icinabwingi ca bantu ba kwa Yehova benekela?

[Icikope pe bula 18]

Amamilioni ‘balebuulapo ica bupe amenshi ya mweo.’ Bushe mwaliba pa kati kabo?