Ukushimikile Mbila Nsuma ku Bafulilako

LINTU naletontonkanya pa lwa bantu mu calo njikalamo, namwene ukuti abengi baishibile fye Inte sha kwa Yehova mu malyashi ya mu nyunshipepala ne milabasa. Natontonkenye ukuti aba bantu balingile ukutandalilwa pa kuti bengeshiba pa lwa Nte sha kwa Yehova na fintu mu cine cine basuminamo. Lelo ni shani fintu naali no kubaafwa? Umulume wandi ni eluda wa Bwina Kristu, ampeele ubutungulushi bwa mano ne mitubululo.

Twasangile imitubululo yawamisha mu cipande caleti “Bamagazini Basansamusha,” icafumine muli Awake! wa January 8, 1995. Ukukuma ku mibombele ya kwa Nte umo, icipande casosele ukuti: “Nkashi alimiko buyo bwa kukolonganika ba Loleni! ba kale abo Inte shimbi shatuulika mu mayanda. Lyene alatandalila utubungwe twafwilisha abantu uto ayumfwe fyo kuti twatemwa imitwe imo iya malyashi.”

Umulume wandi alingafwile kabili nalonganike imyanda ya bamagazini. Nalisalilemo imitwe ya malyashi iyapusanapusana iyalinga bantu naali no kutandalila.

Nalimwene mu cisontelelo ca matelefoni ne fyalembwa fya cintubwingi, no kulemba amashina ya bemininako ifipatala, ifikuulwa fisendamamo abacaice, ne ng’anda sha kusungilamo abakote. Nasanshishepo na bakalamba balolekesha pa fililo, abalolekesha pa masukulu ne mpanda mano, incenshi sha mu fipatala, na bakalamba ba fifungo ne filye. Pali uyu mutande, nasanshishepo abakalamba abalolekesha pa bantu bakunkuma ku bwalwa ne miti ikola, amabumba yalolekesha pa mibele ya filengwa na Lesa, pa filema ne finakabupalu fya mu nkondo, na basambilila pa fya kulya. Nshalabileko abakalamba ba maofesi ya buyantanshi bwa mikalile, na ya bafwilisha abekashi, na ya basakamana imilandu ya ndupwa.

Cinshi Nali no Kusosa?

Lintu naletandala, nalebalilapo ukuilondolola. Lyene nalebebe fyo nshali no kukokola.

Lintu nalolenkana no mukalamba, nalesosa ukuti: “Ndi Nte ya kwa Yehova. Lelo nshishile mu kulanda pa fya mapepo, ico te kuti cilinge mu nshita ya kubomba.” Ilingi line ninshi aba uwa bucibusa. Lyene nateulwile amashiwi yandi ukulingana ne mibele, no kutila: “Naendele fintu fibili. Ica kubalilapo, ndemutasha pa milimo mubomba. Na kuba, inshita na maka umo abomfya pa kubombela icintubwingi tafilingile ukumonwa mu kwanguka. Ndemutashe cine cine pa mibombele yenu.” Ilingi line abantu balisungwike pa kulanda nabo muli iyi nshila.

Umuntu nomba aletontonkanya umulandu wa bubili naendele. Nalekonkanyapo kuti: “Umulandu wa bubili naendela ni uyu: Nalisalile amalyashi ayalanda pa mulimo fye mubomba na mafya yabamo ukufuma muli magazini wesu uwa Loleni! uusabankanishiwa mu fyalo ifingi. Ninjishiba kuti mwatemwa ukwishiba fintu magazini asabankanishiwa mu fyalo ifingi alandapo pa mafya aya. Kuti natemwa ukumushila aba bamagazini.” Ilingi line baletasha pa kubombesha kwandi.

Ifya Kufumamo fya Kusungusha Kabili Ifya Kulambula

Lintu nalandile muli yi nshila, abengi balikutike muli bucibusa; umuntu umo fye e wakeene mu bantu 17. Nalikumenye ifingi ifyali ifya kusungusha kabili ifya kulambula.

Ku ca kumwenako, pa numa ya kwesha pa miku ine no kulolela mu kutekanya, nalisuka namonana no mukalamba ulolekesha pa masukulu mu citungu. Aali muntu wapamfiwa nga nshi. Nalyo line, aali uwa bucibusa kabili twalilandileko pa kashita. Ilyo naleya, atile: “Ndetashe cine cine pa kubombesha kwenu, kabili nangu cibe shani nkabelenga aba bamagazini mu mutima nteeka.”

Inshita imbi natandalile icilye ca mu citungu apo nakumenye kapingula mukalamba, uwa mushinku wa pa kati ka 40 na 60. Lintu naingile mu ofesi alinwine umutwe no kundolesha bukali bukali.

Alinsasukile ati: “Pali Cibili ulucelo e nshita ya kumonana na ine, kabili e lyo mwingesa ne fili fyonse fimbi.”

Nalyaswike bwangu bwangu nati: “Mukwai njeleleniko pa kwisa pa nshita ishilingile. Kanshi nkesako limbi. Lelo nacendela fye ifya pa lwandi.”

Nomba kapingula alefwaisha ukwishiba. Anjipwishe cintu nalefwaya, mwi shiwi ilyanakilila. Nabwekeshepo ukumweba ukuti nali no kubwelelako pali Cibili.

Nalisungwike lintu anjebele ati: “Mukwai ikaleniko. Cinshi mulefwaya?”

Lyene twatendeke ilyashi ilyakaba, kabili alombele ukumubelelo luse pa kubulwe cikuuku pa kabala ntanshi, atile nico aali ne ncito sana.

Pa numa kapingula anjipwishe ukuti: “Bushe mwalishibe co natemwa pa lwa Nte sha kwa Yehova? Balikwata ifishinte fyashimpwa pa cine ifyo bashipaasukako. Hitler alyeseshe apo engapesha, lelo Inte shalikeene ukuya ku nkondo.”

Lintu ifwe babili twaingile mwi ofesi limo, basekilitare balitwibukishe. Lyene sekilitare mukalamba alandile mwi shiwi lyafuuka ukuti: “Abakalamba ba bakapingula tabatandalilwa ku bantu ba kabungwe akali konse.”

Nalyaswike mu kutekanya nati: “Baletusuminisha pantu tuli Nte sha kwa Yehova. Tatuletele imilandu, ubutandashi bwesu tabwacishe pa maminiti yatatu.” Lyene napepele no mukoosha mu mutima ati: “Mwe Yehova, shi lekeni tumonane nankwe!”

Sekilitare ayaswike misuula misuula ati: “Cisuma, lekeni njeshe.” E lyo afuminepo aya. Pa numa ya maminiti yabili, ayamoneke kwati alikokwele sana, alibwelele na kapingula mukalamba pa numa. Alitutwele ku ofesi lyakwe cinshinshi, ukupitilila imiputule ibili.

Lintu twatampile ukulanshanya, abeele uwa bucibusa nga nshi. Lintu twamutambike bamagazini baibela aba Loleni! alipokele mu kuitemenwa. Twatashishe Yehova pe shuko ili ilya kucitilo bunte busuma pa lwa mifwaile ya mulimo wesu.

Lintu natontonkanya pa fya kukumanya fishaiwamina ifingi, nalitesekesha nga nshi fintu umutumwa Petro atile: “Cine cine ninkutuluka ukuti Lesa taba na kapaatulula ka bantu, lelo uwa mu luko lonse uwamutiina no kubombo kulungama asekelelwa kuli wene.” (Imilimo 10:34, 35) Ukufwaya kwa kwa Lesa kwa kuti abantu aba fikulilo fyonse, indimi, nelyo ififulo fya mu bwikashi bapeelwe ishuko lya kuumfwa pa lwa mifwaile akwatila abantunse ne sonde.—Casangwilwako.