Baacitile Ukufwaya kwa kwa Yehova

Yesu Atuma Abasambi 70

CALI ni muli shinde uwa 32 C.E. Kwashele fye imyeshi 6 ukuti Yesu afwe. E ico, pa kuti akalakashe umulimo wa kushimikila no kukwankwanya ukukansha abakonshi bakwe, asontele abasambi 70 no “kubatuma babili babili bayemutangilila ku mushi onse ne mpanga yonse uko alaswa aye umwine.”—Luka 10:1.a

Yesu atumine abasambi bakwe ukuti “bayemutangilila” pa kuti abantu bengasalapo mu kwangufyanya nampo nga balefwaya Mesia nelyo iyo lintu Yesu umwine ali no kukonkapo. Lelo mulandu nshi abatumine “babili babili”? Mu kushininkisha, pa kuti bengalakoseleshanya lintu bakumanya ukukaanya.

Pa kukomaila ukuti umulimo wa kushimikila wali we pamfya, Yesu aebele abakonshi bakwe ati: “Ukulobolola kwena nakukula, lelo ababomfi nabacepa; e ico lombeni Umwine kulobolola ukuti atume ababomfi ku kulobolola kwakwe.” (Luka 10:2) Ukulinganya uyu mulimo ku kulobolola calilingile, pantu ukulobolola nga kwacelwa ifilimwa ifikabilwa kuti fyaonaika. Ukupalako, nga abasambi balilekeleshe umulimo wabo uwa kushimikila, imyeo iyaumo mutengo kuti yaonaika!—Esekiele 33:6.

Abatumikishi Abashingapumbulwa

Ukulundapo, Yesu asambilishe abasambi bakwe ati: “Mwisenda mbukuli, nangu ni tumba, nangu ni ndyato. Kabili mwiposha muntu nangu umo [“mwikumbatila uuli onse mu kuposha,” NW] mu nshila.” (Luka 10:4) Cali mwata ku mulendo ukusenda tumba ne fya kulya ukubikako fye ne ndyato sha pa mbali, pantu inyantilo sha ndyato shalepwa ne ntambo shaleputuka. Lelo ifintu fya musango yu tafyali no kusakamika abasambi ba kwa Yesu. Mu cifulo ca ico, bali no kucetekela ukuti Yehova ali no kubasakamana ukupitila mu bena Israele banabo, abo bakwete umwata wa kusekelela abeni.

Lelo mulandu nshi Yesu aebele abasambi bakwe ukukanaposha umuntu nangu umo? Bushe bali no kuba abaifinya, nangu fye ukuba ne miciika? Awe nakalya! Ishiwi lya ciGriki a·spaʹzo·mai, ilipilibula ukukumbatila kwa mu kuposha, kuti pambi lyapilibula icacila pa kuposha kwa cikuuku ukwa “mwapoleni” nelyo “mutende.” Kuti na kabili, pambi lyasanshamo umwata uwa kufyompana, ukukumbatana, no kulanshanya kwa nshita ntali ukubako lintu ifibusa fibili fyakumana. Uwa kulandapo umo atila: “Pa kuposhanya, abena Kabanga tabalekontamako cinono nelyo ukutambika ukuboko, nga fintu ifwe tucita, lelo balekumbatana no kukontama imiku iingi, no kuwa panshi ubukupeme. Ifi fyonse fyalefwaya inshita iikulu.” (Linganyeniko 2 Ishamfumu 4:29.) Muli fyo, Yesu ayafwilishe abakonshi bakwe ukusengauka ifya kupumbula ifishalinga nangu cingati fyali myata.

Mu kupelako, Yesu aebele abasambi bakwe ukuti lintu baingila mu ng’anda no kusekelelwa, bali no ‘kulya no kunwa ifyo babapa.’ Lelo nga baingile mu musumba umo tababasekelele, bali no ‘kufumina mu misebo ya uko no kutila, No lukungu lwa mu mushi wenu ulukambatile ku makasa yesu, tulemufuutila lube nte kuli imwe.’ (Luka 10:7, 10, 11) Ukufuuta nelyo ukukunta ulukungu ku makasa calelangilila ukuti abasambi mu mutende balefuma mu ng’anda nelyo mu musumba umo tabalepokelelwa e lyo ubupingushi bwali no kufuma kuli Lesa mu kupelako. Lelo abo balesekelela abasambi ba kwa Yesu mu cikuuku bali no kupokelela amapaalo. Pa nshita imo, Yesu aebele abatumwa bakwe ati: “Uusekelela imwe asekelela ine, no usekelela ine asekelela uwantumine. Kabili umuntu onse uwanwensha umo wa muli aba banono ulukombo lwa menshi ayatalala pantu musambi, ndemwebe cine cine, nati, takabulwe icilambu cakwe.”—Mateo 10:40, 42.

Ifyo Twingasambililako

Ilelo, Inte sha kwa Yehova mwi sonde lyonse abacilile pa mamilioni yasano balebomba umulimo wa kushimikila imbila nsuma iya Bufumu bwa kwa Lesa no kupanga abasambi. (Mateo 24:14; 28:19, 20) Balibukila ukuti ubukombe bwabo bwe pamfya. E ico, balabomfya bwino inshita yabo, ukusengauka ifya kupumfyanya ifingabapumbula ku mulimo wabo uwacindama.

Inte sha kwa Yehova balatukuta ukulanga icikuuku ku bantu bakumanya. Nangu ni fyo, tabaibimba mu fya kusabaila, nangu ukuitumpa mu fikansa fya calo nelyo mu matukuto ya cimpelesha aya cino calo aya kufwaya ukupwisha ulufyengo. (Yohane 17:16) Mu cifulo ca ico, bakomaila pa Bufumu bwa kwa Lesa ukuti e bukapwisha amafya ya muntunse mu kubelelela.

Ilingi line, Inte sha kwa Yehova bamonwa baleshimikila babili babili. Bushe tabengapwishishisha ifingi, nga balebomba umo umo? Nakalimo. Nangu ni fyo, ilelo Abena Kristu balishiba ubusuma bwa kubombela pamo no wasumina munabo. Balacingililwako eyefilya lintu balecitilo bunte mu ncende sha masanso. Na kabili, ukubomba babili kuti kwalenga abapya ukumwenamo mu kulamuka kwa bakasabankanya ba mbila nsuma ababelesha sana. Mu cine cine, bonse babili kuti balekoseleshanya.—Amapinda 27:17.

Ukwabula ukutwishika, umulimo wa kushimikila e mulimo we pamfya nga nshi uulebombwa muli shino “nshiku sha kulekelesha.” (2 Timote 3:1) Inte sha kwa Yehova baliba aba nsansa pa kukwata bumunyina bwa mwi sonde lyonse ububatungilila mu kubomba no “mutima umo ku citetekelo ca mbila nsuma.”—Abena Filipi 1:27.

[Futunoti]