Ilyashi lya Bakabilisha ba Bufumu
“Abantu Bobe Bakaipeela Kuli Iwe no Kwanga”
MUSHIKA wakwatisha maka uwa bena Syria Naamani nalwale fibashi. Ubu bulwele bwa makankamike nga tabundepwe, kuti bwalenga umubili ukulubana ne mfwa. Cinshi cintu Naamani alacita? Pa bali mu ng’anda ya kwa Naamani pali umukashana munono, ‘uwasendelwe ku calo ca bena Israele.’ Alanda mu kushipa kabili aishibisha kasesema Elisha ukuti e wingaposha Naamani.—2 Ishamfumu 5:1-3.
Pa mulandu wa kushipa kwa uyu mukashana, Naamani afwaya ukwali Elisha no kundapwa aundapwa. Na kabili, Naamani asanguka kapepa wa kwa Yehova! Ici ca kucitika, icalembwa mu Baibolo, caliko mu mwanda wa myaka uwalenga 10 B.C.E. (2 Ishamfumu 5:4-15) Ilelo, imisepela iingi balalangisha ukushipa kwapalako mu kulanda ifya Bufumu mu kushipa. Icacitike icili pano ukufuma ku Mozambique cileshininkishe ci.
Nuno wa myaka ya kufyalwa 6 ni kasabankanya wa mbila nsuma ushabatishiwa. Nangu fye ni lintu Nuno ashilaba kasabankanya ushabatishiwa, alekolonganya abana ba mu bena mupalamano, kabili nga apepa, alabasambilisha Baibolo, ukubomfya Icitabo Candi ca Malyashi ya mu Baibolo.
Ilingi line Nuno ashibuka lucelocelo pa Cibelushi no kucinkulako ulupwa lwakwe ati: “Ilelo twalafumina mu butumikishi bwa mwi bala.” Ukupimpa kwakwe ukwa mu butumikishi kumonekela na mu nshila shimbi. Ilyo ali na bafyashi bakwe mu butumikishi bwa mu musebo mu Maputo, ilingi line Nuno alatununuka abantu umwine pa lwakwe. Pa kashita kamo aka musango yo, shimakwebo umo alipaleme no kumwipusha ati: “Mulandu nshi uleshitishisha aba bamagazini?” Nuno atile: “Nshileshitisha aba bamagazini, lelo ndapoka imisangulo iya kwafwilisho mulimo wa kushimikila.” Uyu shimakwebo ayaswike ati: “Nangu cingatila nshilefwaya, icankunta sana mibele yobe iya mutima no kulamuka. Kuti natemwa ukusangwilako kuli uyu mulimo.”
Pa nshita imbi, Nuno atununwike umwaume mu musebo no kumutambika icitabo ca True Peace and Security—How Can You Find It? Uyu mwaume aipwishe ati: “Bushe iwe tausambilila pali lilye sukulu?” Nuno alyaswike ati: “Ee, e po nsambilila, nomba ilelo ndepeela ubukombe bwacindama ukufuma muli ici citabo. Cilemulange fyo kuti mwaikala mu calo cipya cintu Lesa akaleta, nga fintu cilangililwe pa cikope muli ici citabo.” Nuno taishibe nangu panono ukuti uyu mwaume aalelanda nankwe aali ni kafundisha pantu aalesambilila. Uyu kafundisha tapokele fye icitabo ceka lelo nomba alapokelela lyonse na bamagazini ba Ulupungu lwa kwa Kalinda na Loleni! ukufuma kuli Nuno.
Lintu Nuno bamwipusha umulandu atemenwa ukuibimba mu mulimo wa kushimikila, alando kuti: “Mfwaya ukulanda ku bantu no kubasambilisha pa lwa kwa Yehova no Mwana wakwe, Yesu Kristu.” Alundako ati: “Kabili nga abantu tabalefwaya ukukutika, tauli mulandu wa kufulilwa.”
Apapele calo conse, amakana ya misepela abapala Nuno ‘balaipeela no kwanga’ ku kusambilisha no kushimikila pa lwa Bufumu bwa kwa Lesa. (Ilumbo 110:3) Ici tacicitika fye nga cela mushuke. Abafyashi abasambilisha abana babo pa lwa kwa Yehova ukufuma ku bwaice, abemike ca kumwenako mu butumikishi, no kusupila ifya Bufumu mu kupimpa bakapaalwa apakalamba.