Ubushiku bwa Nsansa—Ukupwishe Sukulu Ukwe Kalasi Lyalenga 104 ilya Gileadi

“BUNO, bushiku bwa nsansa, kabili bonse tulesekelela.” E mashiwi yalandilwe na Carey Barber, uwa mwi Bumba Litungulula ilya Nte sha kwa Yehova, pa kwisula programu wa buseko uwa kupwishe sukulu ukwe kalasi lyalenga 104 ilya Watchtower Bible School of Gilead pa March 14, 1998. Abasangilweko 4,945 balilaalikwe ukutendeka programu no lwimbo lwa Bufumu namba 208, ulwa mutwe wa kuti “Ulwimbo lwa Kusekelela.”

Ukufunda Kusuma pa fya kusungilila Insansa

Iciputulwa ca kwiswila ica programu cakwete umutande wa malyashi ayepi yasano ayashimpilwe pali Baibolo, capayenye ukufunda kusuma pa fyo umupashi wa kusekelela uwali pa bushiku bwa kupwishe sukulu wingasungililwa.

Ilyashi lya kubalilapo lyalandilwe na Joseph Eames uwa ku Dipartimenti wa Kulemba. Alandile pa mutwe wa kuti “Pashanyeni Umupashi wa Bantu ba Bucishinka,” uwashimpilwe pa lyashi lya Baibolo ilya muli 2 Samwele ifipandwa 15 na 17, pa lwa kwa Abishalomu, mwana Davidi, uyo ukupitila muli bucisanguka afwaile ukutaasho bufumu bwa kwa wishi ubwapeelwe na Lesa. Nangu cibe fyo, kwali abatwalilile aba bucishinka ku Mfumu Davidi, uwasubwa wa kwa Yehova. Lisambililo nshi bamishonari bapya bengasambililako kuli ici? Munyina Eames asondwelele ati: “Konse kuntu mukatumwa nga bamishonari, mukayelundululo mupashi wa kubombela pamo no kucindiko bulashi bwa teokrasi. Mukafwilisheko bambi ukucita cimo cine.”

Uwakonkelepo pali programu ni David Sinclair, uwalandile pa fintu 10 ifyalumbulwa mu Ilumbo 15, ififwaikwa ku bengalebela ‘mwi hema lya kwa Yehova.’ Ilyashi lyakwe, ilya mutwe wa kuti “Twalilileni Ukulebela mwi Hema Lyenu Ilya Bumishonari,” lyakoseleshe abapwishishe isukulu ukubomfya ili lumbo mu mulimo wabo uwa bumishonari, kuntu bali no kuyalebela. Munyina Sinclair akomaile pa bucindami bwa kwikatisha ifipimo fya bukapepa inshita shonse. Cinshi cingafumamo? Ilumbo 15:5 lilando kuti: “Uucite fi fintu takatelentenshiwe.”

John Barr, uwa mwi Bumba Litungulula, e wakonkelepo kabili alandile pa bukose ubufuma mu nyimbo ishimbwa pa kulongana kwa Bwina Kristu. Lelo bushe lwimbo nshi ulwa kusekelela nga nshi ululeimbwa mwi sonde lyonse ilelo? Ni mbila nsuma iya Bufumu bwa kwa Lesa ubwa buMesia. Cinshi cilefuma mu kwimba kwa musango yu, nelyo mu kushimikila pa lwa Bufumu? Umukululo wa cibili uwa lwimbo namba 208 mu kulinga utila: “Mu kubilisha kusambilisha, kwisa ba kwa Yehova na bo. Apo balemba nyimbo mu nsansa, babilo kuleta aba nko!” Ee, cila bushiku abasambi abapya 1,000 balabatishiwa. Munyina Barr asondwelele ati: “Bamunyina, bushe te cisuma ukutontonkanyo kuti muletumwa ku fifulo uko mukakumanya abantu abakalalolela fye ukumfwo lwimbo lwenu ulwa malumbo?”

Ilyashi lyakonkelepo ilya kwa James Mantz uwa ku Dipartimenti wa Kulemba lyakwete umutwe wa kuti “Kutikeni ku Fyebo fya Bamishonari Babelesha.” Alandile ukuti ifintu fimo kuti fyasambililwa fye mu kuimwena. (AbaHebere 5:8) Nangu cibe fyo, Amapinda 22:17 yatukoselesha ‘ukuteyamiko kutwi, no kuumfwe fyebo fya ba mano,’ nelyo ifya bantu babelesha. Abana be sukulu abalepwisha kuti basambilila ifingi kuli abo ababalilepo ukupwisha. Munyina Mantz alando kuti: “Balishiba ifya kubeleleka abene ba matuuka. Balishiba incende sha masanso ishilingile ukusengaukwa mu musumba. Balishiba ifintu ifingafulwisha abakaya. Bamishonari abakokole balishiba ifyo mwingakabila pa kuti mube ne nsansa no kutunguluka mu mulimo wenu.”

Pa kulanda pa mutwe wa kuti “Tesekesheni Umulimo Wenu uwa Teokrasi,” kalemba we Sukulu lya Gileadi, Wallace Liverance, alondolwele ukuti nangu cingati bamishonari bamo, abali nga Paulo, Timote, na Barnaba, bapeelwe umulimo wabo na Lesa ukupitila mu mupashi wa mushilo nelyo mu fimonwa fya cipesha amano, bamishonari basambilishiwa ne sukulu lya Gileadi bapeelwa icifulo mwi bala lya mwi sonde lyonse ku “musha wa cishinka kabili uwashilimuka.” (Mateo 24:45-47) Alingenye umulimo wa bamishonari ku fifulo ifyo Gideone apeele ku bantu bakwe abali no kulwa na bena Midiani. (Abapingushi 7:16-21) Munyina Liverance abacincishe ati: “Tesekesheni umulimo wenu uwa teokrasi uwa bumishonari. Ukupala abashilika ba kwa Gideone ‘abaiminine umuntu no muntu apo ekele,’ na imwe bene moneni umulimo wenu nge cifulo cenu. Tetekeleni ukuti Yehova kuti amubomfya nga fintu abomfeshe abantu 300 aba kwa Gideone.”

Ukwangwako ku Bantu Kuletako Insansa

Ulupungu lwa kwa Kalinda pa nshita imo lwalandile ukuti: “Mu cifulo ca kwangwa ku fintu ifyapangwa na ku fibombelo fya malaiti ifya cino calo, ifya cimpelesha, kuti cawamapo no kubamo amano ukwangwa sana ku bantu no kusambilila ifya kusango kusekelela kwine kwine mu kucitila bambi ifintu.” Mu kumfwana no ku kufunda, Munyina Mark Noumair, umo uwa bakafundisha be Sukulu lya Gileadi, alanshenye ne bumba lya bana be sukulu pa fya kukumanya fyabo ifya mu mulimo wa mwi bala no kulando kuti: “Ukwangwako kwenu kuli bambi e kukalengo kuti mube bamishonari basuma.”

Amakii ya Kusangilamo Insansa mwi Bala lya Cilendo

Makii nshi yamo ayaletako ukutunguluka ne nsansa mu mulimo wa bumishonari? Munyina Charles Woody uwa ku Dipartimenti wa Mulimo na Munyina Harold Jackson, uwali kale mishonari mu Latin America kabili uwafwilishako muli Komiti wa Kusambilisha, bonse babili baipwishe aba muli Bakomiti ba Maofesi ya Sosaite abasangilweko kwi kalasi lyalenga 9 ilye sukulu lya babomfi ba maofesi ya Sosaite. Pe samba pali imitubululo imo intu aba bapeele:

Albert Musonda uwa ku Zambia alandile ukuti: “Lintu mishonari aitendekelako ukuposha bamunyina, ciletako umupashi uusuma sana pantu bamunyina bakapalama kuli mishonari, na mishonari akapalama kuli bene.”

Rolando Morales uwa ku Guatemala atubulwile ukuti lintu abantu aba cileela batangata bamishonari bapya ne ca kunwa, mu cikuuku kabili mu kucenjela kuti bayasuko kuti: “Ndi mweni muli cino calo. Kwena nga nanwako, nomba umubili wandi tawabelesha nga fintu umubili wenu wabelesha. Ndesubila bushiku bumo nkanwako, kabili nkatemwa icibi.” Bunonshi nshi bwingafuma mu kwasuke fyo? “Abantu tabakafulwe, kabili bamishonari bakaba nabalanga icikuuku kuli bambi.”

Cinshi cingaafwa bamishonari ukushipikisha mu mulimo wabo? Munyina Paul Crudass, uwali mu kalasi lyalenga 79 ilya Gileadi, kabili uwabomba mu Liberia pa myaka 12 iyapita, alandile ukuti: “Nalishibo kuti abafyashi balafuluka abana babo. Lelo kulaba inshita shimo lintu mishonari aleeshaesha ukubelesha icalo, imibele, intambi, na bantu. Kuti nalimo aleyumfwa ukufwayo kuleko mulimo. Nga ca kuti apokelela kalata ukufuma ku mwabo uwa mashiwi ya kuti, ‘Tulakufuluka icibi; tatwishibe ifyo tukacita ukwabula iwe,’ ico cine fye kuti calenga ukuti alonge ifipe fyakwe no kubwelela ku mwabo. Kanshi cili icacindamisha kuli balupwa abali muno ilelo ukwibukisha ici.”

Lintu ifya kwipusha fyapwile, ilyashi lya kulekelesha lyalandilwe na Theodore Jaracz, uwa mwi Bumba Litungulula. Alandile pa mutwe wa kuti: “Tangisheni Ubufumu mu Bumi Bwenu.” Ni shani fintu bamishonari bengatwalilila ukwangwako ukwabula ukupusaulwa ku mulimo wabo? Abakoseleshe ukutantika isambililo lya Baibolo ilya pa lwabo, ukukabafwilisha ukutangisha ifya Bufumu mu bumi bwabo. Lyene pakonkele ukucinkula kwa pa nshita yalinga ukwa kuti: “Bamishonari bamo balilekeleshe sambililo lya pa lwabo pa mulandu wa kupumbukila ku fibombelo fya malaiti, kuli E-mail, na kuli bakompyuta. Tulingile ukupingulapo bwino no kuba abashikatala mu mibomfeshe ya cibombelo icili conse kabili te kulapoose nshita ikalamba ku cintu icingafulunganya isambililo lya pa lwesu ilya Cebo ca kwa Lesa.”

Pa numa ya lyashi lya kwa Munyina Jaracz kwali ukupeela amadiploma no kubelenga kalata wa kutasha ukufuma ku bana be sukulu. Umwiminishi we kalasi alandile pa fyo bonse baleyumfwa ati: “Twamwene ubushinino bwine bwine ubwa kutemwa kuntu Yesu alandile ukuti abasambi bakwe bakakwata, kabili ici nacilengo kuti tucetekele ukuti te mulandu na kuntu twingaba, natukwata ukuteyanya ukwa cikabilila, ukwa kutemwa kabili ukwapala mayo ukututungilila. Apo natukwata ukutungililwa kwa musango yu, natuipekanya ukuya ku mpela sha pano isonde.” Kwali kusondwelela kwa kucincimusha ukwa bushiku bwa nsansa ubwa kupwishe sukulu ukwe kalasi lyalenga 104 ilya Gileadi.

[Akabokoshi pe bula 24]

Ukulondolola Ikalasi

Ifyalo bafumineko: 9

Ifyalo baleyako: 16

Abasambi bonse: 48

Abaupana: 24

Avareji wa myaka ya bukulu: 33

Avareji wa myaka mu cine: 16

Avareji wa myaka mu butumikishi bwa nshita yonse: 12

[Icikope pe bula 25]

Ikalasi Lyalenga 104 Lyalepwisha Isukulu lya Watchtower Bible School of Gilead

Mu mutande uli pe samba, imitande ipeelwe amanambala ukufuma pa ntanshi ukuya ku numa, kabili amashina yatantikwe ukufuma ku kuso ukuya ku kulyo mu mutande umo umo.

(1) Romero, M.; Howarth, J.; Blackburne-Kane, D.; Hohengasser, E.; West, S.; Thom, S. (2) Colon, W.; Glancy, J.; Kono, Y.; Drews, P.; Tam, S.; Kono, T. (3) Tam, D.; Zechmeister, S.; Gerdel, S.; Elwell, J.; Dunec, P.; Tibaudo, H. (4) Taylor, E.; Hildred, L.; Sanches, M.; Anderson, C.; Bucknor, T.; Hohengasser, E. (5) Howarth, D.; Ward, C.; Hinch, P.; McDonald, Y.; Sanches, T.; Thom, O. (6) Drews, T.; Tibaudo, E.; Elwell, D.; Dunec, W.; Blackburne-Kane, D.; Ward, W. (7) Anderson, M.; Zechmeister, R.; McDonald, R.; Bucknor, R.; Glancy, S.; Gerdel, G. (8) Romero, D.; Hinch, R.; Hildred, S.; Taylor, J.; Colon, A.; West, W.

[Icikope pe bula 26]

Bamunyina abafundileko ikalasi lyalenga 104: (ukufuma ku kuso) W. Liverance, U. Glass, K. Adams, M. Noumair