“Icine Cikamulenga Abantungwa”
“Mukeshibe cine, ne cine cikamulenga abantungwa.” Ifi e fyasosele Yesu lintu alesambilisha ibumba lya bantu mwi tempele lya mu Yerusalemu. (Yohane 8:32) Abasambi ba kwa Yesu bwangu bwangu balishibe ukuti ifyo alefunda e cine. Baliimwenene ubushininkisho ubwingi nga nshi ubwa kuti kafundisha wabo afumine kuli Lesa.
NOMBA kwena, pali ndakai cilemoneke fyo abengi kuti cabafya nga nshi ukwishiba icine ico Yesu alandilepo. Ino nshita na yo ili fye filya cali ilyo Esaya kasesema alipo, kuli bamo “abasoselo bubi batila busuma, abasoselo busuma batila bubi; abatile mfifi lubuuto, abatilo lubuuto ni mfifi; abatile calula calilowa, abatile calowa calilula.” (Esaya 5:20) Shino nshiku umo abantu balemwena ifintu namufula, balesoma sana amano ya buntunse, ne mikalile ili ya kuti onse umo alefwaila. Kanshi abengi bamona fye ukuti ifintu fyonse kweshako fye, takwaba ico twingatila e cine.
Lilye bumba lya bantu Yesu aebele fyo icine kuti cabalenga abantungwa, lyamwaswike aliti: “Tuli bufyashi bwa kwa Abrahamu, kabili tatwatala atutekwo busha ku muntu nangu umo. Uleti shani iwe, Mukaba abantungwa?” (Yohane 8:33) Tapaali apo balemwene fyo kuti bakabila ukulubulwa. Nomba Yesu abalondolwelele ati: “Ndemwebe cine cine, nati, umuntu onse uucito lubembu musha wa lubembu.” (Yohane 8:34) Yesu alelanda pa cine icingalubula umuntu ukufuma mu lubembu. Yesu asosele ati: “Ngo Mwana amulenga abantungwa, mukaba abantungwa cine cine.” (Yohane 8:36) Kanshi icine icilubula abantu, cine pa lwa kwa Yesu Kristu, Umwana wa kwa Lesa. Icitetekelo mwi lambo lyakwe lintu alufishepo umweo wapwililika, e cingalubula umuntu ukufuma mu lubembu ne mfwa.
Inshita imbi, Yesu atile: “Bashishisheni ku cine cenu: icebo cenu e cine.” (Yohane 17:17) Icebo ca kwa Lesa, ukucikonka fye ifyo caba muli Baibolo, e cine icingalubula umuntu ku kutiine mipashi, no kupepa kwa bufi. Baibolo ilatweba icine pa lwa kwa Yesu Kristu, e cilenga abantu ukumutetekela lyene balaba ne subilo lya kuti ku ntanshi cikesabawamina nga nshi. Awe kanshi takwaba icingacila pa kwishibe cine icaba mu Cebo kwa Lesa!
Ukwishibe cine kwacindama shani? Mu macalici muntu abengi baya pali ndakai, abene batila balakonka ifyaba mu Baibolo, nomba ifingi fyo bafunda mano ya buntunse ne fishilano. Ilingi line abapepesha mu macalici tabapooseshako amano ku kushininkisha ukuti ifyo balefunda tamuli filubo, kulila fye abo balefunda balefisumina. Bamo bamona fye ati konse fye uko wingalapepa cili fye bwino kuli Lesa, cikulu fye ulekonka amafunde. Nomba Yesu Kristu alondolwele ukuti: “Inshita ileisa, na nomba e ko ili, ilyo bakapepa bene bene bakapepela Tata mu Mupashi na mu cine; pantu na Tata afwaya aba musango uyu babe aba kumupepa.”—Yohane 4:23.
Nga tulefwaya Lesa ukulatumona ukuti tulapepa bwino, tufwile ukwishiba icine. Uyu mulandu ukankaala nga nshi. E wingalenga ukuti ku ntanshi tukasangalale. Kanshi bonse tufwile ukuipusha ukuti: ‘Bushe imipepele yandi Lesa alaimona ukuti yaliba fye bwino? Bushe cine cine, ndafwaisha ukwishibe cine icaba mu Cebo ca kwa Lesa, nangu ndetiina fye ukuti nga nafwailisha fimbi fikapusana ne fyo naishiba?’