Nomba E Bushiku bwe Pusukilo!
“Moneni, nomba e nshita ya kupokelelwamo; nomba e bushiku bwe pusukilo.”—2 ABENA KORINTI 6:2.
1. Cinshi cikabilwa pa kuba abasuminishiwa kuli Lesa na Kristu?
YEHOVA alilingo bushiku umo akapingwila abantunse. (Imilimo 17:31) Pa kuti bukabe bushiku bwe pusukilo kuli ifwe, tulekabilo kuba abasuminishiwa kuli Lesa na kuli Kapingula uo asonta, Yesu Kristu. (Yohane 5:22) Pa kuba abasuminishiwa, imibele yesu ilingile ukumfwana ne Cebo ca kwa Lesa kabili icitetekelo cilingile ukutulenga ukwaafwa abantu ukuba abasambi ba cine aba kwa Yesu.
2. Mulandu nshi abantunse babela abanunuka kuli Lesa?
2 Abantunse balinunuka kuli Lesa pa mulandu wa lubembu lwapyanwa. (Abena Roma 5:12; Abena Efese 4:17, 18) E ico, abo tushimikila kuti bakwata fye ipusukilo nga bawikishiwa kuli Lesa. E fyo umutumwa Paulo alondolwele lintu alembele Abena Kristu mu Korinti. Natubebete 2 Abena Korinti 5:10–6:10 no kumone fyo Paulo alandile pa lwa bupingushi, ukuwikishiwa kuli Lesa, ne pusukilo.
“Tunashanasha Abantu”
3. Ni shani Paulo ‘alenashanasha abantu,’ kabili mulandu nshi tulingile ukucitile ifyo ilelo?
3 Paulo aampenye ubupingushi no kushimikila lintu alembele ukuti: “Tuli no kumoneka bonse ku cipuna ca kupingwilapo ca kwa Kristu, ukuti onse umo umo apokelele ku fyacitiilwe mu mubili, umwabele fyo abombele, napamo icisuma napamo icibi. E ico pa kwishibo kutiinya kwa kwa Shikulu, tunashanasha abantu.” (2 Abena Korinti 5:10, 11) Umutumwa ‘alenashanasha abantu’ ukupitila mu kushimikila imbila nsuma. Nga ifwe? Apantu tulolenkene ne mpela ya ino micitile ya fintu iyabipa, tulingile ukubombesha mu kunashanasha bambi ukucita ifilekabilwa pa kuti benganonka ububile bwa kwa Yesu no kuba abasuminishiwa kuli Yehova Lesa, Intulo ye pusukilo.
4, 5. (a) Mulandu nshi tatulingile ukuitakishisha pa fyo tubomba mu mulimo wa kwa Yehova? (b) Paulo aitakishe shani “kuli Lesa”?
4 Nga ca kuti Lesa alipaalo butumikishi bwesu, nalyo line tatulingile ukuitakisha. Mu Korinti bamo abaleituumika nelyo ukutuumika bambi, baletele amalekano mu cilonganino. (1 Abena Korinti 1:10-13; 3:3, 4) E ico Paulo alembele ukuti: “Tatuleitasha kabili kuli imwe, lelo tulepeela imwe apa kututakishishapo; ukuti mukwate umwa kwasukila abatakishe fya mimonekele ne fya ku mutima iyo. Pantu nangu tuli abapena, ni kuli Lesa; nangu tuli no bupanda, ni kuli imwe.” (2 Abena Korinti 5:12, 13) Abaleituumika tabalefwaya icilonganino cibe icaikatana kabili ica bumupashi. Tabaleafwa abasumina banabo ukulundulule mitima isuma kuli Lesa lelo baleitakisha ukulosha ku mimonekele ya ku nse. E ico, Paulo aebawile icilonganino ukutila: “Uutakisha, muli Shikulu e mo atakishishe.”—2 Abena Korinti 10:17.
5 Bushe Paulo taleitakisha? Bamo e fyo nalimo baletontonkanya pa mulandu wa fyo asosele pa butumwa bwakwe. Lelo aleitakisha “kuli Lesa.” Aitakishe pa butumwa bwakwe, pa kuti abena Korinti befutukako kuli Yehova. Paulo acitile fyo pa kuti ababweseshe kuli Lesa pantu balilufiwe ku batumwa ba bufi. (2 Abena Korinti 11:16-21; 12:11, 12, 19-21; 13:10) Lelo, Paulo talefwayo kutemuna abantu ku milimo yakwe.—Amapinda 21:4.
Bushe Ukutemwa kwa kwa Kristu E ko Mwaobelwa?
6. Ni shani ukutemwa kwa kwa Kristu kulingile ukutwambukila?
6 Pamo ngo mutumwa wa cine, Paulo asambilishe bambi ilambo lya cilubula ilya kwa Kristu. Lyaambukile Paulo, e ico alembele ukuti: “Ukutemwa kwa kwa Kristu e ko twaobelwa; pa kupingule ci, ukuti apo umo afwilile bonse, ninshi bonse balifwile, kabili afwilile bonse ukuti abali no mweo beikalila abene, lelo bekalile uwabafwilile no kubuuka pa mulandu wabo.” (2 Abena Korinti 5:14, 15) Mwandi Yesu alitutemenwe pa kutufwila! Cine cine tulingile ukoobelwa kuli ici. Ukutasha Yesu pa kutufwila kulingile ukulenga tube abapimpa mu kubila imbila nsuma ye pusukilo Yehova apayanya ukupitila mu Mwana wakwe uwatemwikwa. (Yohane 3:16; linganyeniko Ilumbo 96:2.) Bushe “ukutemwa kwa kwa Kristu” kumulengo kupimpa mu mulimo wa kushimikilo Bufumu no kupanga abasambi?—Mateo 28:19, 20.
7. Cipilibula cinshi ‘ukukanaishiba muntu nangu umo umwabelo buntunse’?
7 Mu kubomfyo bumi bwabo mu nshila iilangisho kutasha pa fyo Kristu abacitiile, abasubwa ‘tabaikalila abene, lelo bekalila wene.’ Paulo atile: “E ico ifwe ukufuma pali nomba, tatwaishiba muntu nangu umo umwabelo buntunse; nelyo twaishibe Kristu umwabelo buntunse, lelo nomba tatwamwishibe fyo kabili iyo.” (2 Abena Korinti 5:16) Abena Kristu tabafwile ukumono muntu umwabelo buntunse, nalimo ukumona abaYuda nga bacindama ukucila Abena fyalo nelyo abakankaala ukucila abapiina. Abasubwa ‘tabaishiba muntu nangu umo umwabelo buntunse,’ pantu balicindamiko ukubishanya kwa ku mupashi na basumina banabo. ‘Abaishibe Kristu umwabelo buntunse’ tabali fye bantunse bamwene Yesu ilyo ali pano isonde. Nangu cingati bamo abasubile muli Mesia pa nshita imo balemona Kristu umwabelo buntunse, nomba tabalekabila ukumumone fyo. Apeele umubili wakwe nge cilubula kabili abuushiwe ngo mupashi uupeelo umweo. Bambi ababuushiwilwa ku bumi bwa mu muulu bali no kushe mibili ya buntunse ukwabulo kumonapo Yesu Kristu mu buntunse.—1 Abena Korinti 15:45, 50; 2 Abena Korinti 5:1-5.
8. Ni shani bamo besa mu kuba “muli Kristu”?
8 Ukulosha ku basubwa, Paulo alundapo ati: “E ico ngo muntu ali muli Kristu, abe cibumbwa cipya: ifya kale nafiya; moneni, fyayalulwe fipya.” (2 Abena Korinti 5:17) Ukuba “muli Kristu” cipilibulo kuipakisha buumo na wene. (Yohane 17:21) Uku kwampana kwaishileko ku muntu lintu Yehova amukulile ku Mwana wakwe no kumusubo mupashi wa mushilo. Pamo ngo mwana wa kwa Lesa uwafyalwa ku mupashi, aba “cibumbwa cipya” no kuba ne cilolelo ca kuba na Kristu mu Bufumu bwa mu muulu. (Yohane 3:3-8; 6:44; Abena Galatia 4:6, 7) Aba Bena Kristu basubwa balipeelwe shuko lya mulimo ilikalamba.
“Shi Muwikishiwe Kuli Lesa”
9. Cinshi Lesa acita pa kuwikisha abantu kuli wene?
9 Mwandi Yehova alisenamina “icibumbwa cipya”! Paulo atila: “Fyonse fyafuma kuli Lesa, uwatuwikishishe ku mwine muli Kristu, no kutupeela bukapyunga [ubutumikishi, NW] bwa kuwikishanya; e kutila, Lesa aali muli Kristu alewikishisha aba pano isonde ku mwine, ukukanalinga kuli bene amampuulu yabo; kabili apeele kuli ifwe icebo ca kuwikishanya.” (2 Abena Korinti 5:18, 19) Abantunse balinunwike kuli Lesa lintu Adamu abembwike. Lelo Yehova umwine mu kutemwa aiswile inshila ya kubawikisha ukupitila mwi lambo lya kwa Yesu.—Abena Roma 5:6-12.
10. Ni kuli bani Yehova aseekeshe ubutumikishi bwa kuwikishanya, kabili cinshi bacita pa kubomba ubu butumikishi?
10 Yehova aliseekesho butumikishi bwa kuwikishanya ku basubwa, e co Paulo atila: “E ico twabela Kristu inkombe, kwati ni Lesa e ulepaapaatila muli ifwe: tumulombela kuli Kristu, atuti, Shi muwikishiwe kuli Lesa.” (2 Abena Korinti 5:20) Ku kale, inkombe shaletumwa maka maka mu nshita sha nkondo ku kukalulula inkondo. (Luka 14:31, 32) Apantu abantunse aba lubembu balinunuka kuli Lesa, alituma inkombe shakwe ishasubwa ku kwebako abantu ifyo bakabilo kucita pa kuwikishiwa. Pamo nge nkombe sha kwa Kristu, abasubwa balapaapaata abati: “Shi muwikishiwe kuli Lesa.” Muli uku kupaapaata kwa nkumbu bacincisha abantu ukufwayo mutende na Lesa no kupokelela ipusukilo apayanya ukupitila muli Kristu.
11. Ukupitila mu kutetekela icilubula, ni bani bapokelela ubulungami kuli Lesa?
11 Bonse abantunse abacetekela icilubula kuti bawikishiwa kuli Lesa. (Yohane 3:36) Paulo atila: “[Yesu] Uushaishibe ulubembu, [Yehova] amucitile ukubo lubembu pa mulandu wa ifwe; ukuti ifwe tube ubulungami bwa kwa Lesa muli wene.” (2 Abena Korinti 5:21) Umuntu wapwililika Yesu abele ica kuninika ca pa lubembu lwa bufyashi bonse ubwa kwa Adamu ukubulubula ku lubembu lwapyanwa. Yesu abalenga babe “ubulungami bwa kwa Lesa.” Ubu bulungami, nelyo ukubo mulungami kuli Lesa, kubalilapo ne mpyani shinankwe sha kwa Kristu, ba 144,000. Mu Kuteka kwa Myaka Ikana Limo, abana ba pe sonde aba kwa Wishi wa Nshita Pe, Yesu Kristu bakaba abalungami pamo nga bantunse bapwililika. Akabalengo kuba abalungami abapwililika pa kuti bakabe aba busumino kuli Lesa no kupokelela umweo wa muyayaya.—Esaya 9:6; Ukusokolola 14:1; 20:4-6, 11-15.
“Nomba E Nshita ya Kupokelelwamo”
12. Butumikishi nshi ubwacindama bulebombwa ne nkombe ne ntumi sha kwa Yehova?
12 Pa kunonke pusukilo, tufwile ukukonka amashiwi ya kwa Paulo ayatila: “Pa kuba ababombela pamo na [Yehova], no kupaapaata tulamupaapaata, atuti, mwipokelela ibusha ukusenamina kwa kwa Lesa. Pantu atila, Mu nshita ya kupokelelwamo nalikuumfwile, na mu bushiku bwe pusukilo nalikwafwile. Moneni, nomba e nshita ya kupokelelwamo; nomba e bushiku bwe pusukilo.” (2 Abena Korinti 6:1, 2) Inkombe shasubwa isha kwa Yehova pamo ne ntumi shakwe, “impaanga shimbi,” tabapokelela ibusha ukusenamina kwa kwa Shibo wa mu muulu. (Yohane 10:16) Ku myendele yabo iyalungama na ku butumikishi bwa mukoosha muli ino “nshita ya kupokelelwamo,” bafwaya ububile bwa kwa Lesa kabili bashimikila aba pe sonde ukuti “nomba e bushiku bwe pusukilo.”
13. Fyebo nshi ifyacindama fisangwa pali Esaya 49:8, kabili pa kabala ntanshi fyafikilishiwe shani?
13 Paulo aambula Esaya 49:8, apatila: “E fyo Yehova atila: Mu nshita iyayana nkakwasuka, na mu bushiku bwa kupususha nkakwafwa no kukulinda, nkakupeela ku kube cipingo ca bantu ku kulenge calo ciikale, ku kwakanye fikwatwa ifyapomonwa.” Pa kabala ntanshi ubu busesemo bwalifikilishiwe ilyo abena Israele balubwilwe muli bunkole mu Babele no kubwelela ku calo cabo icapomonwa.—Esaya 49:3, 9.
14. Ni shani Esaya 49:8 afikilishiwe ukukuma kuli Yesu?
14 Pa kufikilisha na kabili ubusesemo bwa kwa Esaya, Yehova apeele “umubomfi” wakwe Yesu ku “kubo lubuuto ku nko, ku kuleko kupususha [kwa kwa Lesa] kube ukufika ku mpela ya pano isonde.” (Esaya 49:6, 8; linganyeniko Esaya 42:1-4, 6, 7; Mateo 12:18-21.) “Inshita iyayana,” nelyo “iya kupokelelwamo,” ilosha kuli Yesu ilyo ali pano isonde. Alipepele, kabili Lesa ‘alimwaswike.’ Ubo bwali “bushiku bwe pusukilo” kuli Yesu pantu alisungile bumpomfu bwapwililika kabili “aishilebo mwine pusukilo lya muyayaya kuli bonse abamunakila.”—AbaHebere 5:7, 9; Yohane 12:27, 28.
15. Ukutula lilali abena Israele batukwite ukushininkisho kuti baliwaminwo kusenamina kwa kwa Lesa, kabili buyo nshi bakwata?
15 Paulo abomfya Esaya 49:8 ku Bena Kristu basubwa, ukubapaapaata ‘ukukanapokelela ibusha ukusenamina kwa kwa Lesa’ ukupitila mu kukaana ububile bwakwe mu “nshita ya kupokelelwamo” na mu “bushiku bwe pusukilo” ubo apayanya. Paulo alundapo ati: “Moneni, nomba e nshita ya kupokelelwamo; nomba e bushiku bwe pusukilo.” (2 Abena Korinti 6:2) Ukutula pa Pentekoste 33 C.E., abena Israele ba ku mupashi balitukuta ukushininkisho kuti baliwaminwa ukusenamina kwa kwa Lesa pa kuti “inshita ya kupokelelwamo” ingaba “bushiku bwe pusukilo” kuli bene.
‘Ukuishininkisha nga Batumikishi ba kwa Lesa’
16. Ni mu mibele nshi iyayafya Paulo aishininkishe ngo mutumikishi wa kwa Lesa?
16 Bamo abali mu cilonganino ca mu Korinti tabawaminwe ukusenamina kwa kwa Lesa. Baleamba Paulo pa kuti bengonaula ubulashi bwa butumwa bwakwe, nangu cingati tabikile “ica kupunwisha nangu cimo.” Aishininkishe ngo mutumikishi wa kwa Lesa ukupitila “mu kushishimisha ukwingi, mu fya bucushi, mu bwafya, mu fya lumanimani, mu mpumo, mu fifungo, mu mpasase, mu kucucutika, mu kufufiwo tulo, mu kukalipwa ku nsala.” (2 Abena Korinti 6:3-5) Pa numa, Paulo alandile ukuti nga ca kuti abalemulwisha bali batumikishi, ena ‘alicishishepo’ pantu aliculile sana mu fifungo, ku mpumo, ku masanso, na ku kubulisha.—2 Abena Korinti 11:23-27.
17. (a) Ni ku mibele nshi twingaishininkisha nga batumikishi ba kwa Lesa? (b) “Ifyanso fya bulungami” ni finshi?
17 Ukupala Paulo na banankwe, ne fwe kuti twaishininkisha nga batumikishi ba kwa Lesa. Mu nshila nshi? Ukupitila mu kuba ‘abasanguluka,’ nelyo abamusangwela, na mu kubomba mu kumfwana no kwishiba kwalungika ukwa Baibolo. Kuti twaishininkisha ukupitila “mu kutekanya,” ukushipikisha ububi nelyo ulwambo, no kupitila “mu congwe” ilintu tulecitila bambi ifisuma. Kabili, kuti twaishininkisha nga batumikishi ba kwa Lesa ukupitila mu kusumina ukutungululwa no mupashi wakwe, ukulangisha “ukutemwa ukushili kwa cimbepa,” ukulanda icine, no kushintilila pali wene pa kuba na maka ya kubombo butumikishi. Ku ca kusekesha, Paulo na kabili aishininkishe ukuba umutumikishi “ku fyanso fya bulungami ifya ku kulyo na ku kuso.” Mu nkondo sha kale, ukuboko kwa kulyo e kwaleikato lupanga e lyo ukwa kuso kwaleikate nkwela. Mu bulwi bwa ku mupashi ku kulwisha bakasambilisha ba bufi, Paulo talebomfya ifyanso fya mubili wa lubembu pamo ngo kupotama, ubucenjeshi, no kufutika. (2 Abena Korinti 6:6, 7; 11:12-14; Amapinda 3:32) Abomfeshe “ifyanso,” nelyo inshila sha bulungami, ku kulundulula ukupepa kwa cine. Na ifwe e fyo tufwile ukulabomfya.
18. Pa kuba abatumikishi ba kwa Lesa, mibele nshi tulingile ukukwata?
18 Nga tuli batumikishi ba kwa Lesa, tufwile ukuba nga Paulo na bakabomba banankwe. Nangu batucindike nelyo ukutusaalula tukabomba nga Abena Kristu. Ulwambo talwakalenge ukuti tuleke ukushimikila, kabili ukutulumbanya takwakatutuumike. Tukalanda icine no kucindikwa pa mulandu wa milimo ya bukapepa. Lintu twasanswa icabipisha ku balwani, tukacetekela Yehova. Kabili tukalatasha lintu twapokelela ukusalapula.—2 Abena Korinti 6:8, 9.
19. Ni shani fintu ‘abengi bengacindamikwa’ lwa ku mupashi?
19 Pa kusondwelela ilyashi lya butumikishi bwa kuwikishanya, Paulo alandile ifyo wene na banankwe ‘bali kwati abaikatwo bulanda, lelo bali abasekelela pe; kwati bali babusu, lelo bali abacindamika abengi; kwati bali abashaba na kantu, lelo bali abakwata fyonse.’ (2 Abena Korinti 6:10) Nangu cingati aba batumikishi baleikatwo bulanda pa mulandu wa kucula kwabo, lwa nkati bali abasekelela. Bali abapiina, lelo ‘bacindamike abengi’ lwa ku mupashi. Na kuba, ‘balikwete fyonse’ pa mulandu wa kuti icitetekelo cabo cabaletele ifyuma fya ku mupashi—ne cilolelo ca kuba abana ba kwa Lesa aba ku muulu. Balicindeme kabili bali aba nsansa pamo nga batumikishi ba Bwina Kristu. (Imilimo 20:35) Na ifwe kuti ‘twacindamika abengi’ nga tulebombako ubutumikishi bwa kuwikishanya ilelo—muli buno bushiku bwe pusukilo!
Cetekeleni Ukupususha kwa kwa Yehova
20. (a) Cinshi Paulo alefwaisho kucita mu mukoosha, kabili mulandu nshi yabelele inshita ye pamfya? (b) Cinshi cilangililo kuti nomba tuleikala mu bushiku bwe pusukilo?
20 Lintu umutumwa Paulo alembele kalata wakwe uwa cibili ku bena Korinti mupepi na 55 C.E., kwashele fye imyaka 15 pa kuti imicitile ya fintu iya ciYuda ingapwa. Alefwaisho kuti abaYuda na Bena fyalo bawikishiwe kuli Lesa ukupitila muli Kristu. Bwali bushiku bwe pusukilo, kabili inshita yalipwile. Na kuba, ne fwe bene ukutula mu 1914 twaba mu nshita yapalako iya kusondwelela kwa micitile ya fintu. Umulimo wa mwi sonde lyonse uwa kushimikilo Bufumu uulebombwa nomba ulelangililo kuti buno e bushiku bwe pusukilo.
21. (a) Lilembo nshi ilya mwaka likabomfiwa mu 1999? (b) Cinshi tulingile ukucita muli buno bushiku bwe pusukilo?
21 Ilelo aba nko shonse balekabila ukumfwa pa lwe pusukilo Lesa apayanya ukupitila muli Yesu Kristu pantu inshita naipwa. Paulo alembele ukuti: “Nomba e bushiku bwe pusukilo.” Ayo mashiwi pali 2 Abena Korinti 6:2 yakaba e lembo lya mwaka wa 1999 ilya Nte sha kwa Yehova. Mwandi ili lembo nalilinga, pantu tulolenkene no bonaushi ubwacila pa bonaushi bwa Yerusalemu ne tempele lya uko! Naipalama nga nshi impela ya ino micitile ya fintu iikabimbamo bonse aba pano isonde. Mucitepo cimo nomba line, mwilolela ubwa mailo. Nga twalisumino kuti ukupususha kwa kwa Yehova, kabili nga twalimutemwa, kabili nga twalicindamika umweo wa muyayaya, tatwakapokelele ibusha ukusenamina kwa kwa Lesa. Mu kufwaisha ukucindika Yehova ukufuma ku mutima, tukalangilila ku milandile na ku micitile ukuti tatuletwishika lintu twabilikisho kuti: “Nomba e bushiku bwe pusukilo.”
Kuti Mwayasuka Shani?
◻ Mulandu nshi ukuwikishiwa kuli Lesa kwacindamina?
◻ Ni bani abalebomba nge nkombe ne ntumi sha butumikishi bwa kuwikishanya?
◻ Ni shani twingaishininkisha nga batumikishi ba kwa Lesa?
◻ Cinshi ilembo lya mwaka wa 1999 ilya Nte sha kwa Yehova lipilibula kuli imwe?
[Ifikope pe bula 17]
Ukupala Paulo, bushe mulashimikila mu kupimpa no kwafwilisha bambi ukuwikishiwa kuli Lesa?
United States
France
Cote d’Ivoire
[Icikope pe bula 18]
Muli buno bushiku bwe pusukilo, bushe mwaba pa bengi abalewikishiwa kuli Yehova Lesa?