‘Cilacincimusha Umutima no Muntontonkanya’

“Tapali amashiwi ningalondolwelamo insansa no kucincimuka ifisako ilyo ndebelenga icitabo ca kuti Is There a Creator Who Cares About You? Kuti calenga umo ukufwaisha ukwishibilako ifyafulilako. Ndemutasha pa kubuukulula ukucincimuka kwandi mu mutima na mu muntontonkanya.”

E FYO Inte ya kwa Yehova imo iya ku North Carolina, U.S.A, ayumfwile ilyo Watch Tower Society yafumishe icitabo pe Bungano lya Citungu ilya “Imikalile ya Bukapepa” ilya mu 1998/99. Nangu nga tamwakwata ici citabo, umfweni ifyo bambi balandile.

Inshiku fye shinono pa numa ya kupokako ici citabo pe bungano lya ku San Diego, California, U.S.A, umwaume alembele ati: “Ici citabo cilakosha icitetekelo nga nshi. Cinenga ukutesekesha nga nshi imilimo ya kwa Yehova iya bubumbo. Nomba mfikile pe bula 98 kabili nshifuluka ukucipwisha. Cilandetela insansa shine shine.”

Umwanakashi uwa ku fyalo fya ku Kabanga alembele ati: “Ifyo kalanda wa pe bungano alondolwele icitabo, cine cine bulya bulondoloshi bwalingana ne fyabamo ubwa kuti ‘icitabo caibela.’ Icapulamo sana ca kuti icitabo tacipatikisha kabelenga ukusumina ukuti Lesa e ko aba, lelo cilanda ifishinka.”

Cabamo ifishinka fya kucebusha ifyo basayantisti basangasanga pa lwa bubumbo bwesu, ubumi, na pa lwa ifwe. Ici citemuna abengi. Umwanakashi wa ku California alembele ati: “Nshingalondolola mu kukumanina ifyo ici citabo cinono cayambukila ubumi bwandi. Nalefilwa ukuleka ukucibelenga pantu ibula limo na limo lyalesokolola ifingi ifyo basangasanga pa lwa bubumbo bwesu no bumi bwine. Mwandi fingi nasambilile! Ndi no kuteesa ici citabo cinono no kupeelako abengi ukufika apo ningapesha.”

Abengi batemenwemo ifyo icitabo cilondolola bwino Baibolo, ne fyo cikomaila pa fyo Kabumba aba. Umwaume umo atile: “Ubulondoloshi bwa mu cinkumbawile ubwa Baibolo ubwaba ku nkupo ya kulekelesha iya citabo e bwawamisha ubo nshatalamona.” Lintu fye bapwile ibungano lyabangilile mu New York, U.S.A., na umbi alembele ati: “Ici citabo cipya cifwile ukuba e lupapulo lwacilishapo ukuwama ulo mulembele. Nalicebushiwa no bushininkisho bwa sayansi ubwa kuti Kabumba eko aba. Ubulondoloshi bwa Baibolo ubwa kulungatika ubwine bweka bulenga ifishinka ukumfwika no kukusha icilaka ca kubelengelako ifingi.”

Cilondolola Sayansi Bwino

Mu fipandwa fya kubalilapo kuti pambi cakosa ukumfwikisha ubulondoloshi bwa sayansi ubwabamo lelo pano palipo ifyo bamo bayumfwile mu cine cine.

Umwaume uwa ku Canada alembele ati: “Paliba ubupusano pa fitabo fya kusambililamo sayansi ifyo bakalemba ba fiko besha ukutusekesha ne milembele yabo iya kuitakisha. Amasomo yenu yalipulamo mu kulenga ifisambilisho fya physics, ifya miti miti, DNA, ama chromosome, na fimbi ukulondololwa bwino kuli ifwe. Kanshi nga ni mwe mwalembele ifitabo fya kusambililamo ku yuniversiti ifyo nasambililemo imyaka yapitapo!”

Profesa wa ku yuniversiti uwa fya physics alembele ati: “Icitabo cilalondolola mu kushika nga nshi ifyabimbwamo mu fya sayansi ukwabula ukupelenganya. Icitabo cilapelulula na kabelenga kabili calyambula ifya basayantisti balumbuka abengi. Cifwile ukubelengwa no uli onse uufwaya ukwishiba ukwafumine ububumbo no bumi, nampo nga ni sayantisti nelyo umuntu yaweyawe.”

Umukashana uwalesambilila ifya bu nasi alandilepo ati: “Nafililwe ukushininkisha ilyo nakupukwile icitabo pa cipandwa 4 no kubelengapo ifyayambwilwe mu citabo twalebomfya mu kalasi! Napeele profesa wesu icitabo kabili namwebele ukuti ali no kusangamo ifyebo ifisuma. Namulangile ibula 54 pa lwa bongobongo. Alibelengele kabili atile, ‘Fisuma! Mfwile ukucibebeta.’”

Shicilye wa mu ng’anda ya mafunde uwa ku Belgium alembele ati: “Icankuntile kabili no kuncebusha ni fintu icisambilisho ca muli Baibolo ica kuti Lesa eko aba tacipinkana no bulondoloshi bwa sayansi ubukomailwapo na sayansi wa muno nshiku, lelo filomfwana. Iyi ili mimwene yapulamo.”

Ukwishiba Kabumba Bwino Bwino

Icitabo caafwilishe abantu mu fyalo ifingi ukwishiba Lesa bwino bwino ku kuyumfwa abapalamina sana kuli wene. Kabelenga ku musumba wa Fukuoka City mu Japan, atile: “Cali kwati amenso yatontele mu kulungatika pali Yehova pa muku wa kubalilapo. Icitabo cilashinina bwino nga nshi. Nali na maka ya kwishiba Yehova ifyo nshatalantontonkanyapo ukufika pali nomba.” Umwina El Savador umo alembele ati: “Mulalondolola mu kumfwika nga nshi ifyo Lesa aba uwa nkumbu, uwa kusenamina, uukokolo kukalipa, kabili uwafulo luse. Cine cine ifi efyo tukabila pa kupalamisha kuli wene na ku Mwana wakwe. Citabo cabalilapo ukulondolola imibele ya kwa Yehova kabili no kuyumfwa kwa buntunse ukwa Mwana wakwe Yesu.” Kabelenga mu Zambia ayankwileko ati: “Nalyumfwikishe Yehova nomba mu nshila na imbi.”

Cine cine Inte sha kwa Yehova shili sha nsansa ukupeelako bambi icitabo ca kuti Is There a Creator Who Cares About You? Umo atile: “Natile nshipwa fye ukubelenga icipandwa 10 [icitila “If the Creator Cares, Why So Much Suffering?” (Nga ca Kuti Kabumba Alasakamana, Mulandu Nshi Ukucula Kwafulile Fi?)], nafililwe ukushipikisha kabili napundile ukuti, ‘Cine cine e citabo tulekabila muno Japan!’ Ndefwaya ukubelesha ifyebo fya muli cino cipandwa no kufibomfya mu mulimo wa mwi bala imiku ne miku.” Umwanakashi umbi alesambilila Baibolo no mukashana uwasambilishiwe mwi tempele lya baBuddha umo wishi ali ni shimapepo. “Calimukosele ukusumina ukuti Kabumba eko aba. Ubulondoloshi bwa muli ici citabo tabupatikisha lelo bupeela ifishinka, e co ndetontonkanya ukuti nangu fye baBuddha kuti bacibelenga ukwabula ukushimba. Na kabili citulenga ukumona sana ukutemwa kwa kwa Yehova.”

Ku England, umwanakashi umo atashishe ati: “E lyo napwishishe fye ukubelenga icitabo ca Creator kabili ndi mupepi no kutendeka ukucibelenga na kabili. Mwandi citabo cawamisha! Nga ulecibelenga kuti watemwa fye Yehova eka. Nalipeelako cimo umwina mupalamano wandi uyo pa numa ya kubelenga ifipandwa fye fibili atile, ‘Te kuti ndeke ukucibelenga pantu caliwamisha.’ Ninshininkisha ukuti cili no kwafwilisha abantu ukwishiba no kutemwa Kabumba wesu Uwakulisha.”

Umwaume wa ku Maryland U.S.A., atile: “Cine cine cilafwilisha bumupashi bwandi mu kulungatika. Ndepanga ukupeelako bonse abo mombela incito. Limo limo cilankosela ukutendeka ubunte ku bantu abapamfiwa nga aba kabili abasoma. Nomba apo ndi ne ci citabo, nalasangako inshila isuma no kuipangasha pa kubatununuka.”

Cine cine icitabo ca kuti Is There a Creator Who Cares About You? cili no kutemwikwa ku bantu ba mwi sonde lyonse.

[Abatusuminishe Ukubomfya Icikope pe bula 25]

Icikope caba pa nkupo icili pa muulu, Eagle Nebula: J. Hester na P. Scowen (AZ State Univ.), NASA