Icitabo Cipya Cacincimusha Amamilioni

ULUBALI lwamonekesha ulwa Mabungano ya “Bakatemwa ba Buntungwa” ayo yatendeke June wapwile lwali lyashi “Umuntu Wakulisha Uwabalile Abako Uwa Mweo.” Ulubali lwa liko ulwakatama lwali kukakulwa kwa citabo mu kuba no mutwe umo wine. Ukucila pa bantu amamilioni mutanda mu kusaalala kwa calo kale kale balisangwa kuli uku kukonkana kwa mabungano no kumfwa ilyashi, ililemoneka mu kuba no kwalula kunono mu fipande fibili ifitangilileko ifya uno magazini.

Ukucila pa makope amamilioni 12 aya citabo Umuntu Wakulisha Uwabalile Abako Uwa Mweo yalipulintwa mu ndimi shimo 60. Na kabili cilesangwa fye na mu ndimi sha ku Europe wa ku Kabanga isha ciAlbania, iciCroatia, iciHungary, iciMacedonia, iciPolish, iciRussia, iciSerbia, ne ciSlovenia. Ukucilisha ifyo babele aba nsansa abacilile pali 74,000 abasangilweko ku mabungano cinelubali mu Soviet Union ukucipokelela mu lulimi lwa ciRussia.

Intulo ya Citabo

Ifyebo mu citabo fyalimoneke mu kutendekelako mu musango wa kukonkana uwa shafumine 149 isha Ulupungu lwa kwa Kalinda, ukutendeka no lwafumine ulwa April 1, 1985. Bakabelenga abengi basosele ukuti balyumfwile ubulanda lintu ukukonkana kwafikile ku mpela mu kuba no lwafumine ulwa June 1, 1991. Melissa, uwa myaka ya bukulu 12 mu Italy, akwete ifilamba mu menso yakwe lintu abelengele ubulondoloshi bwa kulekelesha mu Ulupungu lwa kwa Kalinda. “Inshita ya bushiku pa ntanshi ye bungano lyesu,” e fyo asosele, “napepele kuli Yehova ukwipusha icitabo pa lwa bumi bwa kwa Yesu. Lintu icitabo catambikwe, nalitootele ukufikila nshali na maka ya kucite co mu kutwalilila.”

Ifyebo fyalembelwe mu kukonkana mu Ulupungu lwa kwa Kalinda fyalilembulwilwe no kubikwa pamo mu citabo icipya ica fikope fyayemba, ica mabula 448 ica fipandwa 133. Ukubombesha kwalicitilwe ku kupeela ilyashi ilili lyonse ilyo Yesu apeele ne ca kucitika icili conse icalembwa mu bumi bwakwe ubwa pe sonde, ukusanshako ifilangililo fyakwe fyonse ne fipesha amano. Ukufika apo cingapela, icili conse cashimikwa mu kukonkana umo cacitikile. Pa mpela ya cipandwa cimo cimo pali umutande wa malembo ya mu Baibolo apo icipandwa cishimpilwe.

Umo kuti pambi atontonkanya ukuti, ‘Kwena, kale kale nalibelenga icitabo pa mulandu wa kuti nalibelengele ukukonkana mu Ulupungu lwa kwa Kalinda.’ Lelo bakabelenga ba Ulupungu lwa kwa Kalinda bapokelele ubulondoloshi bwa bumi bwa kwa Yesu mu fipimfya finono ifyapeelwe mu fipande ifyalemoneka cila milungu ibili pa ciputulwa ca nshita ukucila pa myaka mutanda. Nangu cingati ifipande fyali ifyaisulamo ifyebo mu musango wa kukonkana, elenganya ukucincimuka kwa kubelenga ubulondoloshi bonse mu nshita iipi no kumona icikope cakumanina ica muntu wakulisha uwabalile abako uwa mweo!

Ca Kukoshe Citetekelo

“Napwishishe ukubelenga ulupapulo mu milungu ibili,” e ficita lipoti umwanakashi ukufuma ku Washington, D.C., U.S.A. “Ilintu nalebelenga, ifilamba fyalekonkoloka mu menso yandi. Naleleka ukubelenga no kupepa no kulila. Canengele ukuyumfwa kwati ndi palya pamo na Yesu, ukucula pamo nankwe. Nelyo fye mulungu umo pa numa ya kubelenga icitabo, ifilamba ficili fyaleisa mu menso lintu naibukishe pa lwa cintu nabelengele. Ndayumfwa uwacila na po kupalamisha kuli Yehova pa kupeela Umwana wakwe.”

“Nacipwa ukubelenga icitabo pa lwa kwa Yesu ilelo,” e fyalembele umwanakashi ukufuma ku Pittsburgh, Pennsylvania, U.S.A. “Cali icawamisha. Nakwete ifilamba mu menso yandi ilintu nalebelenga ifipande fya kulekeleshako finono. Ukubelenga icitabo conse pa muku umo cali icacilapo busuma. Te kuti mu cine cine nondolole ifyo ndeyumfwa pa lwa cene—kano fye ukuti nalicitemwishishe!”

Ifikope fyayemba mu citabo fisangwila ku kwebekesha kwa mu nkuntu, nge fyo kabelenga uutesekesha amwene ukuti: “Cinenga ukuyumfwa kwati kuti nabomfwa balelila umwana wafwile (icipandwa 47) nelyo ukuti natwishiba ico Yesu aletontonkanya lintu umwanakashi uwalefuma umulopa amukumishe kabili alipolele (icipandwa 46). Ukulumbulula pa menso yabo kwa cine cine ica kuti cilacena. . . . Mu cifulo ca kubelenga ukuba ngo mulimo, ici citabo cilenga ukubelenga ukumoneka kwati ca kusekesha nelyo ica kupembesula pa mpela ya kasuba. Umusango wabamo ukukunta icitabo calembelwamo tautweba fye cintu Yesu acitile lelo utupeela imimwene ya cintu atontonkenye no kuyumfwa.”

Imibomfeshe Yalekanalekana

Abengi balitendeka ukubomfya icitabo mwi sambililo lyabo ilya Baibolo ilya lupwa. “Twakwata abana abanono batatu,” e fyalemba abafyashi ukufuma ku Silverton, Oregon, U.S.A., “kabili ici citabo cisuma ‘kwi sambililo lya cila nshita ya bushiku ilya lyonse ilya lupwa.’ Mu cine cine, fintu caba icalinga ukuti tusambilile mu kusakamanishisha icikulilo ca Mfumu yesu iyakwato kutemwa, Kristu Yesu.”

Umupungwe ukufuma ku Japan alondolola ukuti: “Tata alatubelengela ilintu tulekokoloka pa numa ya ca kulya cesu ica mu cungulo. Ngo lupwa, tulebelenga ukufuma ku kutendeka, lelo napingwilepo ukubelenga icipandwa cimo cila nshita ya bushiku ukufuma ku nkupo ilyo nshilaya ku kusendama. Nangu cibe fyo, icitabo cilacincimusha nga nshi ica kuti ilingi line inshita ifika 1 koloko ya ku maca ilyo nshilaibukila inshita.”

Abengi balasungushiwa pa bwingi bwa fyebo fya kulonsha fyasanshiwamo mu bulondoloshi. “Nasambilile ifintu ifingi ifyo nshaishibe,” e fyalembele Nte umo. Kalata ukufuma ku California, U.S.A., yasosele ukuti: “Umukashi wandi na ine twaliba mu cine ukucila pa myaka 35, kabili kuti twasosa mu bufumacumi ukuti tatwabala atukwata ulupapulo ulwaba ulwa kucincimusha ifyo nga luno.”

Icitabo cilingile ukwaafwa ukubongaula ubufi bwa kuti Inte sha kwa Yehova tabasumina muli Yesu. Kabelenga umo uwa kutasha alandilepo muli iyi nshila ukuti: “Nshali na kucibika pa nshi, pantu cali kusuusha kukalamba ku bumbuulu bwa abo abasoso kuti abantu ba kwa Yehova tabasumina nelyo ukucindika Yesu Kristu. Ico tulekabila ukucita nomba kubapeela fye ici casuko ku bumbuulu bwabo.”

Mu kushininkisha ici citabo cikakwata icifulo cacindama mu butumikishi bwa Nte sha kwa Yehova. “Napeele kope ku mwanakashi untu nsambilila nankwe Baibolo,” e fyalembele Nte umo, “kabili ukwambukila cikwete pali wene kulemoneka kwati cipesha amano. Alisambilila pa mwaka, kabili nakwata impika ya kumuleta ku kulongana.” Pa numa umusambi abelengele ifipandwa 45 ifya citabo cipya, Nte alondolwele ukuti, “anjebele ukuti aali no kusangwa ku kulongana pa Mulungu pa mulandu wa kuti yali e nshita ya kubuula ukwiminina kwakwe.”

Imbali Shacindama

Nge ca kufumamo, Umuntu Wakulisha Uwabalile Abako Uwa Mweo cipayanya ukulandapo pa Malandwe. Ubulondoloshi ubwa fintu ifingi ifyo Yesu asosele no kusambilisha fyalipayanishiwa, e co icitabo kuti cabomfiwa nge cibombelo cacindama ica kusapika, apantu cikakatila mu kupalamisha ku bulondoloshi bwa Baibolo.

Ulubali lushaiwamina ukucilisha lwa kuti mu kutendekelako icili conse cashimikwa ukulingana no mutande wa nshita. Ukupilibula fye amabula ukupulinkana cene mu kuba ne ci mu muntontonkanya kuti cashinina ukuba ica kwaafwa ca cine cine mu kwishiba ni lilali, mu nshita ya butumikishi bwa kwa Yesu, ifya kuponako fimo fyacitike. Bakabelenga ba Malandwe ilingi line bakumanya icimoneka ukuba ukupilikana. Icitabo cipya, mu kukanakabilwa ukwabula ukulosha ukusakamana kuli ifi, campanya kwene mu mipeelele ya ciko.

Pamo nga Bena Kristu, mu kushininkisha tatulingile ukulekelesha isambililo lyasakamanisha ilya bumi bwa Ca Kumwenako cesu ica citetekelo, Yesu Kristu. Shi, lyene, natulanguluke mu kupalamisha ubulondoloshi bwa Malandwe mu kuba no kwaafwa kwa citabo cipya Umuntu Wakulisha Uwabalile Abako Uwa Mweo.