Mulandu Nshi uwa Kutetekela Yesu Kristu?

“NANGU fye bantu abengi abashili Bena Kristu balisumina ukuti Ali ni kasambilisha mukalamba kabili uwa mano. Cine cine pa bantu abalengele abantu bambi ukwalula imitontonkanishishe, wena alicilile bonse bene.” (The World Book Encyclopedia) Bushe nani uyu wine? Ni Yesu Kristu, katendeka wa buKristu.

Nangu cibe fyo, te mulandu na fintu ici citabo ca encyclopedia cisosa, Yesu Kristu taishibikwa ku minshipendwa ya bantu aba ku fyalo fya ku Kabanga na mu ncende shimbi, kuti baibukisha fye ukuti balyumfwapo ilyo ishina mu fitabo fya ku sekondari. Nangu fye ni mu macalici ya Kristendomu, mwaliba bashimapepo abasoso kuti tabaishiba Yesu bwino kabili balatwishika no kutwishika nga ca kuti amabuuku yane ayacilipo ayalanda pa lwa bumi bwakwe (e kuti Amalandwe) ayasangwa mu Baibolo ya cine cine.

Bushe abalembele Amalandwe kuti baelengenye fye ilyashi lya pa bumi bwa kwa Yesu? Nakalya! Kalemba wa lyashi lya kale uwalumbuka Will Durant, pa numa ya kupituluka muli ayo Malandwe, alembele ati: “Ukutungo kuti abantu yaweyawe kabili abanono abaikeleko mu nkulo fye imo e bengelenganya umuntu wapulamo ngo yu kabili uwatemwikwa, uwa mibele iisuma nga nshi kabili uwalangilile abantunse bumunyina bwine bwine, kuti caba cipesha amano icingacila na pa fipesha amano fyonse ifyalembwa mu Malandwe. Pa numa ya myaka 200 iya Kuceeceeta kwa Kulengulula, casangwo kuti, ubumi, imisango, ne fisambilisho fya kwa Kristu, na lelo ficili fye ifyaumfwika, kabili e lyashi limo ilyatemwikwa nga nshi mu lyashi lya kale ilya ba ku fyalo fya ku Masamba.”

Nalyo line, e ko bali abengasuula Yesu Kristu ukumumona ngo ushingakabila ukwangwako pa mulandu wa fintu abaitunga ukuti balamukonka baacita. Abekashi ba mu Japan bamo kuti batila, ‘aba bamukonka baliponeshe ibomba lya atomiki pa musumba wa Nagasaki. Kabili uyu musumba e wakwatishe na Bena Kristu abengi ukucila imisumba iingi mu Japan.’ Lelo bushe kuti mwapeelo mulandu dokota nga ca kuti umulwele akaana ukukonka ifyo dokota amwebele? Abantu abengi abaitunga ukuba Abena Kristu balisuula ifyo Yesu abeba pa lwa kukalulula amafya ya bantu. Lelo, Yesu alilangilile ifyo twingapwisha amafya ya cila bushiku no kucula kwa bantu mu calo conse. E mulandu wine twamulaalikila ukubelenga icipande cakonkapo no kuimwena umusango wa muntu ali.