Ukulanshanya pa Malandwe Kwatwalilila
Bushe Amalandwe yalanda pa lwa kufyalwa kwa kwa Yesu Kristu ya cine?
Bushe Yesu alilandile Ilyashi lya pa Lupili?
Bushe Yesu cine cine alibuushiwe?
Bushe cine cine alisosele ukuti: “Nine nshila ne cine no mweo”?—Yohane 14:6.
ILYASHI lya musango yu lyalilandwapo na bantu basoma mupepi na 80 pa kukumana kwitwa Jesus Seminar, ukubako imiku ibili cila mwaka ukutula mu 1985. Aba bantu basoma balyasuka amepusho yapalako mu nshila yaibela. Lintu bakumana pa Cilye cabo balakwatako utupepala uto babomfya pa kusuminishanya lintu balelanshanya pa mashiwi yalanda pali Yesu ayaba mu Malandwe. Akapepala kakashika kalangilila itontonkanyo lya kuti ayo mashiwi cine cine ni Yesu wayalandile. Akapepala ka pinki kalangilila ukuti amashiwi nayapalako ku yo Yesu napamo alandile. Akabutulukila kalangilila ukuti imfundo nashipalanako ne sha kwa Yesu, lelo amashiwi te walandile. Akapepala kafiita kalangilila ukuti amashiwi te Yesu walandile nangu panono, kabili yafumine ku bantu bambi abaikeleko pa numa.
Ukubomfya iyi nshila, abasangwa pa kukumana kwa Jesus Seminar balikaana ifishinka fine ifilandilwepo ukupitila mu fipusho fipeelwe pa kwamba kwa kuno kulanshanya. Na kuba, pa mashiwi yaba mu Malandwe ayaishibikwa ukuti ni Yesu alandile, paba amapesenti 82 ayabikwapo akapepala kafiita. Batila, amapesenti fye 16 aya fintu fyalandwa pali Yesu mu Malandwe na mu fyalembwa fimbi e yamoneka ukuba aya cine.
Ukusuusha Amalandwe ukwa musango yu kwayambile kale. Ukusansa Amalandwe kwaishile pa bwelu mu 1774 lintu ibuuku lya mabula 1,400 ilyalembelwe na Hermann Reimarus, profesa wa ndimi sha ku Kabanga mu Hamburg, Germany, lyasabankanishiwe libe umwine alifwa kale. Muli ili buuku lyalembelwe na Reimarus mwali amashiwi ya kutwishika nga nshi ukuti Amalandwe tayali ya cine. Insondwelelo yakwe yashimpilwe pa kuceeceeta kwa ndimi na mashiwi yalanda pa bumi bwa kwa Yesu ayaba mu Malandwe yane yantu alemona kwati yalepilikana. Ukutula lilya, bakalengulula balatwishika sana bucishinka bwa Malandwe, kabili basonga ne cintubwingi ukulatwishika ifyalembwa muli yene.
Abo bantu basoma mu cinkumbawile bakwata imimwene ya kuti Amandwe yaba ni nshimi fye isha ba mipepele ishashimikwe na bantu bapusanapusana. Amepusho yalinga ayepushiwa pa mulandu wa kutwishika kwa basoma ya kuti: Bushe fintu basuminemo e fyalengele bakalemba ba Malandwe yane ukuwaminisha icishinka? Bushe amatukuto ya Bena Kristu ba mu kubangilila aya kufwaya ukutungulula bambi e yalengele ukulemba nelyo ukulundapo fimo ku lyashi lya kwa Yesu? Fintu nshi fyashimikwa na bucishinka mu Malandwe ifyacila pa kushika fye kwa nshimi?
Abakuliile kuntu batila Lesa takwaba atemwa ku ncende shalemenena ku fya ku calo basumina ukuti Baibolo—e kuti na Malandwe yene—libuuku lya nshimi sheka sheka. Kabili pa mulandu wa kusuumya umulopa, umutitikisha, ukupaatukana, ne mibele ishili ya bukapepa iicitwa mu Kristendomu, bamo balafilwa ukusumina. Aba musango yu tabasanga umulandu balingile ukupoosela amano ku fyalembwa fintu aba mu Kristendomu bamona ukuti fya mushilo. Batontonkanya ukuti fyonse ifyalenga ukuti kubeko imipepele ya bumyalumyalu fifwile fyashimpwa fye pa nshimi sha cabe cabe.
Nga imwe muletilapo shani? Bushe mufwile ukusuminisha abasoma bamo abatwishika ukuti Amalandwe te ya cine ukumulenga ukutwishika mu nshila yapalako? Bushe lintu mwaumfwa ukutunganya kwa kuti bakalemba ba Malandwe bashikile fye inshimi, mukaleka icitetekelo cenu mu fyo balembele cikacepeleko? Bushe incitilo sha mu Kristendomu ishishili sha bukapepa shilingile ukumulenga ukutwishika bucishinka bwa Malandwe? Twamulaalika ukubebeta ifishinka fimo.
[Icikope pe bula 4]
Bushe ifyaba mu Malandwe ni nshimi atemwa fya cine?
[Abatusuminishe]
Yesu Aleenda pali Bemba/The Doré Bible Illustrations/Dover Publications
[Abatusuminishe Ukubomfya Icikope pe bula 3]
Ku numa, amabula 3-5 na 8: Ukusuminishiwa na ba Freer Gallery of Arts, Smithsonian Institution, Washington, D. C.