Ifipusho Ukufuma ku Babelenga
Ni lilali “umwashilisha” mwasubilwe, ukulingana no kusobela kwa pali Daniele 9:24?
Ilembo lya kwa Daniele 9:24-27 lyaba kusesema ukulanda pa kumoneka kwa “wasubwa, cilongoshi” e kutila Kristu. Ukusubwa kwasobelwe ukwa “mwashilisha,” kanshi, takulosha ku kusuba Umwashilisha umwe tempele lya mu Yerusalemu. Ukucila, ishiwi lya kuti “umwashilisha” lilosha ku mwashila mwa mu myulu umwa kwa Lesa, e kutila umwashilisha mu myulu mwine mwi tempele likalamba ilya ku mupashi ilya kwa Yehova.a—AbaHebere 8:1-5; 9:2-10, 23.
Ni lilali itempele lya ku mupashi ilya kwa Lesa lyatendeke ukubomba? Moneni icacitike ilyo Yesu aipeele ku kubatishiwa mu 29 C.E. Ukutula lilya line mu bumi bwakwe, Yesu afikilishe amashiwi yasangwa pa Amalumbo 40:6-8. Umutumwa Paulo pa numa atile Yesu apepele kuli Lesa ati: “Ilambo ne ca kuninika tamwafifwaile, lelo umubili e o mwampekanisha.” (AbaHebere 10:5) Yesu alishibe ukuti Lesa ‘tafwaile’ amalambo ya nama ukuti yatwalilile ukupeelwa pe tempele lya mu Yerusalemu. Lelo, Yehova apekanishishe Yesu umubili wapwililika ukuti e o upeelwe ilambo. Ukulangilila ukuitemenwa kwakwe ukwa kufuma ku mutima, Yesu atwalilile ati: “Moneni, naisa (mu mufungilo we buuku mwalembwo lwa ine) ku kucito kufwaya kwenu, mwe Lesa.” (AbaHebere 10:7) Bushe Yehova ayankwileko shani? Ilandwe lya kwa Mateo litila: “Na Yesu, ilyo abatishiwe, aninine apo pene ukufuma ku menshi; kabili moneni, umuulu wamucenamina, amona no Mupashi wa kwa Lesa uleika nge nkunda, no kwisa pali wene. Kabili moneni, ishiwi lya mu muulu aliti, Uyu e mwana wandi uwatemwikwa, umo mbekelwa.”—Mateo 3:16, 17.
Filya Yehova Lesa apokelele ukupeelwa kwa mubili wa kwa Yesu nge lambo calolele mu kuti icipailo icacilile pa cipailo ca mwi tempele lya mu Yerusalemu nomba calitendeke ukubomba. Ici cali cipailo icalingene no “kufwaya” kwa kwa Lesa, nelyo imitantikile ya kupokelela ubumi bwa kwa Yesu nge lambo. (AbaHebere 10:10) Ukusuba Yesu umupashi wa mushilo kwalangilile ukuti Lesa nomba alilengele itempele lya ku mupashi lyonse apo lyapela ukutendeka ukubomba.b E ico, pa nshita ya kubatishiwa kwa kwa Yesu, ubwikalo bwa kwa Lesa ubwa ku muulu bwalisubilwe, nelyo ukupaatulwako, ukuba “umwashilisha” mwi tempele likalamba ilya ku mupashi.
[Amafutunoti]
a Nga mulefwaya ifyebo fyalelanda pa mbali shalekanalekana ishe tempele lya ku mupashi ilya kwa Lesa, moneni Ulupungu lwa kwa Kalinda ulwa July 1, 1996, amabula 14-19.
b Ici e calandwapo pe bula 195 mu citabo icitila Angweniko ku Kusesema kwa kwa Daniele!
[Icikope pe bula 27]
“Umwashilisha” mwasubilwe ilyo Yesu abatishiwe