Amepusho Ukufuma ku Babelenga

Bushe amashiwi yalandile Stefani pa Imilimo 7:59 yatulanga ukuti tufwile ukupepa kuli Yesu?

Pa Imilimo 7:59 patila: “Kabili balapoola Stefani amabwe ilyo alepapaata, ati: ‘Mwe Shikulu Yesu, pokeleleni umupashi wandi.’” Ayo mashiwi yalenga abantu bamo ukwipusha, pantu Baibolo itila Yehova ‘E umfwa ukupepa.’ (Amalumbo 65:2) Bushe cine cine Stefani ni kuli Yesu alepepa? Nga ni fyo, bushe ninshi ici cilanga ukuti Yesu e Yehova wine?

Baibolo wa King James Version atila Stefani “alilile kuli Lesa.” E mulandu wine abengi basondwelela nge fyasondwelele uwasoma Baibolo umo Matthew Henry, uwalandile ukuti: “Stefani pano alepepa kuli Kristu, kanshi na ifwe e fyo tufwile ukucita.” Lelo ukutontonkanya kwa musango yo kwalilubana. Mulandu nshi?

Ulupapulo lwa Barnes’ Notes on the New Testament na lo lutila ico calilubana ilyo lusosa aluti: “Ishiwi lya kuti Lesa talyabamo mu fyalembwa fya kubalilapo, kabili talyalingile no kubika muli ulya Baibolo. Nangu fye ni mu [fimfungwa] fya kale sana na mo talyabamo.” Lelo bushe ili shiwi lya kuti “Lesa,” lyabikilwemo shani muli ici cikomo? Uwasoma umo Abiel Abbot Livermore alandile ukuti ili shiwi lyaishilemo “pa mulandu wa kuti bakapilibula babikilemo ifyo abene basuminemo.” E ico bakapilibula wa maBaibolo ayengi aya mu muno nshiku balifumyamo ili shiwi lishalimo ilya kuti Lesa.

Na lyo line, amaBaibolo ayengi fye yatila Stefani ‘apepele’ kuli Yesu. Kabili amashiwi ya pe samba muli Baibolo wa New World Translation yalanga ukuti ishiwi lya kuti “alepapaata,” na kabili kuti lyapilibula “ukulomba nelyo ipepo.” Bushe ico tacilelanga ukuti Yesu ni Lesa Wa maka yonse? Iyo. Icitabo ca Vine’s Expository Dictionary of Old and New Testament Words cilondolola ukuti muli aya mashiwi, ishiwi lya cine cine ilya ciGriki e·pi·ka·leʹo lipilibula ukuti: “Ukulilila kuli wene, ukulomba ukwafwa . . . ukupaapaata ku wakwata amaka yamo.” Paulo na o abomfeshe ili ishiwi limo line ilyo atile: “Ndetwala umulandu kuli Kaisare!” (Imilimo 25:11) Kanshi e mulandu wine Baibolo wa The New English Bible alandila ukuti Stefani “akuutile” kuli Yesu.

Cinshi calengele Stefani ukupaapaata muli uyo musango? Pa Imilimo 7:55, 56, patila, Stefani “ilyo aiswilemo umupashi wa mushilo, atontele amenso mu muulu no kumona ubukata bwa kwa Lesa no bwa kwa Yesu naiminina ku kwa kulyo kwa kwa Lesa.” Kwena, Stefani nga alombele kuli Yehova ukupitila mwi shina lya kwa Yesu. Lelo ico amwene Yesu uwabuushiwa mu cimonwa, cimoneka kwati Stefani ayumfwile uwaangukililwa ukupaapaata kuli wene mu kulungatika, ati: “Mwe Shikulu Yesu, pokeleleni umupashi wandi.” Stefani alishibe ukuti Yesu alipeelwe amaka ya kubuusha abafwa. (Yohane 5:27-29) E ico alombele Yesu ukumusungila umupashi wakwe, nelyo amaka ya bumi, ukufikila ubushiku ubo Yesu aali no kumubuusha no kumupeela bumunshifwa mu muulu.

Bushe amashiwi yanono aya kwa Stefani yafwile ukulenga twatendeka ukupepa kuli Yesu? Awe iyo. Na kuba, Stefani alilekenye Yesu na Yehova bwino bwino, pantu icalembwa citila amwene Yesu “naiminina ku kwa kulyo kwa kwa Lesa.” Na kabili ukulanda muli uyu musango takwaseekele. Inshita fye imo na imbi iyo Yesu aitilwe fyo ni lintu umutumwa Yohane alandile kuli Yesu mu kulungatika ilyo amumwene mu cimonwa.—Ukusokolola 22:16, 20.

Nangu ca kuti Abena Kristu pali lelo balungatika amapepo yabo yonse kuli Yehova Lesa, na bo bene balikwata icitetekelo cakosa ica kuti Yesu e “kubuuka kabili ubumi.” (Yohane 11:25) Nge fyo cali kuli Stefani, ukutetekela ukuti Yesu akabuusha abakonshi bakwe ku bafwa kuti kwatukosha na ifwe bene mu nshita ya mesho.