Ifyo Yesu Akuma Abantu Icalo Conse
KAPILIBULA wa Baibolo Edgar Goodspeed alembele ukuti: “Fyonse ifyo amalandwe yalanda pa fyo Yesu alandile, ku bantu abanono fye na pa cintubwingi, nga asosele fye mu ma-awala yabili. Lelo ifyebo fyacepe fyo ifyo Yesu asambilishe fyalicincishe no kukuma abantu icine cine, kanshi calilinga fye ukusoso kuti takwaba umuntu umbi uo imibombele yakwe yakuma abantu muli iyi nshila.”
Lintu Yesu apwishishishe umulimo wakwe uwa pe sonde mu mwaka wa 33 C.E., abakonshi bakwe abaume na banakashi bali mupepi na 120. (Imilimo 1:15) Lelo, abantu ukucila pa mabilioni yabili balaitunga ukuba Abena Kristu. Abantu na bambi abengi nga nshi baishiba Yesu ukuti ni kasesema. Ifyo asambilishe fyalikuma abantunse mu nshila yaibela.
Ifyo imibombele ya kwa Yesu yakuma abantu isonde lyonse fyalishibikwa fye na ku ntungulushi abashili Bena Kristu. Ku ca kumwenako, Hyman Enelow umurabbi wa ciYuda alembelo kuti: “Yesu e muntu walumbukisha, uwasambililwapo sana, uwakuma sana abantunse mu lyashi lya kale ilya mipepele.” Kabili Enelow alandile ukuti: “Cine cine Yesu alikuma sana abantunse ica kuti te kuti tukumemo no kutantawila inshila acitilamo ico. Ukutemwa uko acincisha, icisansamushi ico apeela, incitilo shisuma isho acita, isubilo ne nsansa ifyo acincisha—tafyatala aficitikapo ukutula apo abantunse babelako. Pa bantu abalumbuka na basuma abatalile ababako, takwaba uwalingana na fintu Yesu atemwikwa ne fyo akuma abantu mu calo conse. Alicila abantu bonse abatala ababako.” Intungulushi iya baHindu Mohandas K. Gandhi na o asosele ukuti: “Nalishiba ukuti takwaba nangu umo uwacitila abantu ifintu ukucila pa fyo Yesu acitile. Na kuba, takwaba nangu cimo icalubana no buKristu.” Lelo, alundilepo ati: “Ubwafya bwaba na imwe mwe Bena Kristu. Tamwikalila umwabela ifisambilisho fyenu.”
Kristedomu lyonse alifilwa ukwikalilila ku fisambilisho fya kwa Yesu. Kalemba we lyashi lya kale ilya buKristu Cecil John Cadoux atile, “ukulemenena kwe Calici lyonse ku kucite mibele yasekemuka ukwaleya kulefulilako panono panono kwalishibikwe na ku ntungulushi sha buKristu ku numa . . . muli ba140 A.D. Uku kunashako ukukonka imibele iisuma ukupusanako ne fyalecita Abena Kristu ba mu kubangilila kuti kwatungulula ku kukonka inshila sha calo.”
Ukonaika kwa mibele iisuma kwaleya kulekulilako muli ba300 C.E., ilyo Kateka umwina Roma Constantine asangwike Umwina Kristu. Cadoux alembele ukuti: “Bakalemba ba lyashi lya kale balimona, kabili bamo aba bene, balyumfwo bulanda pa kusuminishanya kukalamba uko Icalici lyapatikishiwe ukucita pa kuumana akapi na Constantinus.” Imyanda ya myaka iyapitapo ukutule lyo, abaitunga ukuba Abena Kristu balicita ifya nsoni ifingi ifisaalula ishina lya kwa Kristu.
Amepusho kanshi twingepusha ya kuti: Finshi Yesu asambilishe? Kabili imisambilishishe yakwe ifwile ukutukuma shani?
[Icikope pe bula 3]
“Nalishiba ukuti takwaba nangu umo uwacitila abantu ifintu ukucila pa fyo Yesu acitile.”—Mohandas K. Gandhi
[Icikope pe bula 3]
“Takwaba umuntu umbi uo imibombele yakwe yakuma abantu muli iyi nshila.”—Edgar Goodspeed
[Abatusuminishe]
Culver Pictures