Amasambilisho Ya Cine—Ni Kwi Mwingayasanga?

UMWAUME umo ku Tibet aleshingulusha umupeto wa mapepo, e kutila idalamu umusangwa amapepo ayalembwa. Asumino kuti amapepo yakwe yalabwekeshiwapo ilyo lyonse ashingulusha uyu mupeto wa mapepo. Ku India na ko mu ng’anda imo iikalamba, mwaliba umuputule unono umo bapepela amapepo ayetwa puja. Puja kupepa ukusanshamo ukuninika ifye fungo, amaluba, ne fintu fimbi ku fipasho fya milungu iyalekanalekana. Na ku Italy ukushailepela, na ko namayo ali mwi calici ilya lulumbi nafukama pa ntanshi ya cipasho ca kwa Maria, nyina kwa Yesu, alepepa uku ninshi naikata ubulungu bwa kolona.

Nalimo mwaliimwena mwe bene ifyo imipepele yasonga sana abantu. Icitabo ca The World’s Religions—Understanding the Living Faiths citila: “Imipepele . . . yalibomba kabili icili ilebomba ulubali ulukalamba mu bwikashi bwa bantunse isonde fye lyonse.” Mu citabo ca God—A Brief History, kalemba John Bowker atile: “Mu bwikashi fye bonse abantu balisumina muli Lesa, kabili ilingi line basumino kuti e ulama kabili e wapanga fyonse. E fyo caba na ku batila Lesa takwaba.”

Ca cine, imipepele yalisonga imikalile ya bantu abengi. Ubu bushinino bwa kuti abantu baliba ne nsala ya ku mupashi. Mu citabo calembelwe na dokota uwaishibikwa sana Carl G. Jung ica mutwe wa kuti The Undiscovered Self, aloseshe ku nsala iyo abantu bakwata iya kufwaya ukupepa amaka yapulamo kabili atile “uku kufwaisha kwalimoneka mu bwikashi bwa bantunse bonse.”

Lelo, abantu abengi tabaitunga ukusumina muli Lesa nelyo fye ukusekelela mu mipepele. Icalenga sana ukuti abantu bamo baletwishika no kukaano kuti Lesa takwaba ni co imipepele yabo yalifilwa ukupwisha insala yabo iya ku mupashi. Lelo mupepi na bantu abali bonse, ukusanshako na batila Lesa takwaba, balaipeelesha ukukonka ifishinte fimo ifyo basuminamo, ifyaba kwati e mipepele yabo.

Imyaka ingi iyapita abantu balyesha ukupwisha insala yabo iya ku mupashi, ne ci calenga ukuti baleesha imipepele yalekanalekana. Ne cafumamo ca kuti abantu mwi sonde lyonse bamona imipepele mu nshila shalekanalekana. Ku ca kumwenako, nangu cingatila mupepi ne mipepele yonse batila balisumina mu maka yapulamo, lelo basambilisha ifyapusanako ku untu aya maka yaba nelyo ico ayo maka yaba. Imipepele iingi ilanda sana pa bucindami bwe pusukilo nelyo ukulubulwa. Lelo ifisambilisho fyabo fyalipusana ku cintu ipusukilo lyaba ne nshila umuntu engasangilamo ilyo ipusukilo. Apo kwaliba imintapendwa iya fisumino, ni shani twingeshiba amasambilisho ya cine ayateemuna Lesa?