Amepusho Ukufuma ku Babelenga

Bushe ishiwi lya kuti “napamo” ilisangwa pali Sefania 2:3, lyalola mu kuti ababomfi ba kwa Lesa tabafwile ukucetekela sana ukutila bakapokelela umweo wa muyayaya?

Pali Sefania 2:3 patila: “Fwayeni Yehova, mwe bafuuka ba mu calo bonse; mwe bacito bupingushi bwakwe, fwayeni ubulungami, fwayeni ubufuke; napamo kuti mwabelama mu bushiku bwa bukali bwa kwa Yehova.” Mulandu nshi muli ici cikomo mwabela ishiwi lya kuti “napamo”?

Pa kuti tumfwikishe ifyo Yehova akacita ku bantu bakwe aba cishinka pa Armagedone, natumone ifyo Baibolo isambilisha ukuti e fyo Lesa akacita kuli balya abakafwa ilyo Armagedone ishilaisa. Bamo bakabuukila ku muulu ne mibili ya bumupashi kabili bakaba no bumi ubushingafwa, e lyo bambi na bo bakabuukila pe sonde no kusuubila ukwikala ku ciyayaya muli Paradaise. (Yohane 5:28, 29; 1 Abena Korinti 15:53, 54) Nga ca kuti Yehova alebukisha no kulambula abantu bakwe aba cishinka abafwa ilyo Armagedone tailaisa, cine cine kuti aibukisha na babomfi bakwe abacili no mweo pa bushiku bwa bukali bwakwe.

Amashiwi yapuutwamo aya mutumwa Petro na yo yalatukoselesha. Alembele ati: “[Lesa] abakile Noa, kashimikila wa bulungami, pamo na bambi cinelubali (7) ilyo aletele ilyeshi pa ba pano calo abashipepa; kabili pa kulenga imisumba ya Sodomu na Gomora ukube mito alibapingwile, . . . kabili apokolwele Lote umulungami. . . . Yehova alishiba ukupokolola abaipeelesha kuli bukapepa ku ca kwesha, no kusunga abashalungama ku kuputulwa pa bushiku bwa bupingushi.” (2 Petro 2:5-9) Nangu ca kuti Yehova alyonawile ababifi ku kale, alipuswishe Noa na Lote, abalemubombela mu cishinka. E ico, Yehova na kabili akapususha abamupepa, ilyo akonaula abantu babipa pa Armagedone. “Ibumba likalamba” ilya bantu balungama likapusuka.—Ukusokolola 7:9, 14.

Kanshi, cilemoneka ukutila, ishiwi lya kuti “napamo” ilyaba pali Sefania 2:3, talyalola mu kutila Lesa kuti afilwa ukupususha abantu bakwe abo atemwa iyo. Lelo, lyalola mu kutila, umuntu kuti napamo abelama mu bushiku bwa bukali ubwa kwa Yehova nga ca kuti atendeka ukufwaya ubulungami pamo no bufuuke. Umuntu akapusuka fye nga ca kuti atwalilila ukufwaya ubufuuke no bulungami.—Sefania 2:3.

[Icikope pe bula 31]

“Yehova alishiba ukupokolola abaipeelesha kuli bukapepa ku ca kwesha”