Twalilileni Ukuba aba ‘Mushilo mu Kutiina Lesa’

PA KULANGA ukuti Yehova Lesa wa mushilo icine cine, Baibolo itila: “Wa mushilo, wa mushilo, wa mushilo, Yehova.” (Esa. 6:3; Ukus. 4:8) Amashiwi ya mu ciHebere ne ciGriki ayo bapilibula ukuti “bumushilo” yapilibula ukusanguluka, imipepele yasanguluka, nelyo ukukanaikowesha. Bumushilo bwa kwa Lesa bulosha ku mibele yakwe iyapwililika.

Apo Yehova, ni Lesa wa mushilo, bushe te kuti enekele abamupepa ukuba aba mushilo, e kutila ukuba ne mibili ya busaka ne mibele isuma pa kuti babe ifibusa fyakwe? Baibolo ilanda fye mu kulungatika ukuti Yehova afwaya abantu bakwe ukuba aba mushilo. Pali 1 Petro 1:16, tubelengapo ukuti: “Beni aba mushilo, pantu ine ndi wa mushilo.” Bushe kwena abantunse abashapwililika kuti baba aba mushilo nga filya Yehova aba? Ee kuti baba aba mushilo, lelo te kuti babe abapwililika nga filya fine Yehova aba. Nga tuli abasanguluka ilyo tulepepa Lesa kabili nga twaba ifibusa fyakwe, Lesa akalatumona ukuti tuli ba mushilo.

Nomba bushe kuti twacita shani pa kuti tube ne mibele isuma muli cino calo umwaba abantu abakwata imibele yabipa? Misango nshi tufwile ukulasengauka? Milandile nshi ne mibele ifyo tulingile ukuleka? Lekeni kanshi tusambilileko fimo ku fyo Lesa aleenekela abaYuda ukuba ilyo balefuma ku Babiloni no kuya ku calo cabo mu 537 B.C.E.

‘Kukaba Inshila ya Mushilo’

Yehova asobele ukuti abantu bakwe abali mu busha mu Babiloni bakabwelelamo ku calo cabo. Mu kusesema kulanda pa kubwelelamo ukwa bantu bakwe mwaba no bu bulayo butila: “Kukaba na cinkwente, inshila, iketwe Nshila ya mushilo.” (Esa. 35:8a) Aya mashiwi yalanga ukuti Yehova tali na kupelela fye pa kufumya abaYuda mu Babiloni, lelo ali no kubacingilila ilyo balebwelelamo ku mwabo.

Yehova aiswile “Inshila ya Mushilo” ku babomfi bakwe aba muno nshiku ilyo abafumishe muli Babiloni Mukalamba, e kutila ukupepa kwa mu calo conse ukwa bufi. Mu 1919 alubwile Abena Kristu basubwa mu kupepa kwa bufi, kabili panono panono balisangulwile ukupepa kwabo, balekele ukukonka ifisambilisho fyonse ifya bufi. Muno nshiku, fwe Nte sha kwa Yehova tuli bantu abasanguluka, aba mutende, kabili tulaipakisha bucibusa busuma na Yehova e lyo na Bena Kristu banensu.

Ababa mwi bumba lya “mukuni unono” ilya Bena Kristu basubwa na ba mwi “bumba likalamba” ilya “mpaanga shimbi” ilileya lilekulilako, basalapo ukulaenda mu nshila ya mushilo kabili balebako na bambi ukuti nabo batampe ukwenda muli iyi ine nshila. (Luka 12:32; Ukus. 7:9; Yoh. 10:16) Umuntu onse kuti aenda mu “Nshila ya Mushilo” nga ca kuti fye aitemenwa ‘ukutuula umubili wakwe ilambo ilituntulu, ilya mushilo, kabili ilingapokelelwa kuli Lesa.’—Rom. 12:1.

“Tamwakapitemo Uwakowela”

AbaYuda abali no kubwelelamo ku Yerusalemu mu 537 B.C.E., balekabila ukucita icintu cimo icacindeme nga nshi. Esaya 35:8b, ilanda pa balingile ukwenda mu “Nshila ya Mushilo,” ukuti: “Tamwakapitemo uwakowela, na batumpa tabakalubantemo.” Apo Lesa alefwaya ukuti abaYuda babwelele ku Yerusalemu ku kutendeka cipya cipya ukupepa kwa cine, abantu abalefwaya ukuya mu kucita fye ifintu fimbi, abashacindike ifya mushilo, nelyo abalecita ifyabipa tabali na kusangwa pa baYuda balebwelelamo. Abali no kubwelelamo bali no kulakonka amafunde ya kwa Yehova. Na muno nshiku mwine, bonse abafwaya ukuti Lesa alebapaala bafwile ukulakonka amafunde yakwe. Balingile ukutwalilila ukuba aba ‘mushilo mu kutiina Lesa.’ (2 Kor. 7:1) E ico, mibele nshi iyakowela iyo tufwile ukulasengauka?

Umutumwa Paulo atile: “Imilimo ya bumubili naimoneka, ni yi, ubulalelale, ukukowela, imibele yakamuka.” (Gal. 5:19) Ishiwi lya kuti ubulalelale lilosha ku musango onse uo abantu abashaupana bengabomfeshamo ifya mfwalo. Ukukamuka nelyo imibele ya kuilekelesha kusanshamo “ukucite ca nsoni; icakowela; ukutemwisha ifya bwaume ne fya bwanakashi.” Ubulalelale ne mibele ya kuilekelesha fyalipusana sana na bumushilo bwa kwa Yehova. Kanshi bonse abatwalilila ukulacita ifya musango yu tabasuminishiwa ukuba mu cilonganino ca Bwina Kristu nelyo balabatamfya mu cilonganino. E fyo ciba na kubacita imilandu ya kukowela kwabipisha, e kutila “ukukowela konse [ukwa] mu bufunushi.”—Efes. 4:19.

Ishiwi lya kuti “ukukowela” lisanshamo imembu ishalekanalekana. Mu ciGriki ishiwi ilipilibula ukukowela lipilibula ukukanasanguluka ukwa misango yonse, e kutila mu mibele, mu milandile, na mu mipepele. Kusanshamo ifintu fimo ifyakowela ifyo umuntu engacita ifyo nalimo te kuti bamupangile komiti ya bupingushi.a Nomba, umuntu nga alecita ifintu fya musango yu bushe ninshi aletwalilila ukuba uwa mushilo?

Tutile Umwina Kristu atendeka ukulatamba ifye shiku mu bumfisolo. Ulunkumbwa lwa kufwaya ukucita ifyakowela lulatendeka ukukula panono panono, kabili ukufwaisha kwakwe ukwa kutwalilila ukuba uwasanguluka mu menso ya kwa Yehova kulaya kulecepelako. Kwena, nangu ca kutila ifyo alecita tafilaba kukowela ukwabipisha, uyo muntu ninshi naleka ukulatontonkanya pa fintu ifyasanguluka, ifyawama, ifisuma kabili ifya kutasha. (Fil. 4:8) Ifye shiku filakowesha kabili ukulafitamba kuti kwalenga umuntu ukonaula bucibusa bwakwe na Lesa. Na kuba, fwe Bena Kristu tatulingile fye no kulumbula ukukowela kwa musango uuli onse apo tuli.—Efes. 5:3.

Tontonkanyeni pa ca kumwenako na cimbi. Tutile Umwina Kristu alitemwa ukwangasha ifya mfwalo ilyo aletamba ifye shiku na lintu taletamba pa kuti fye omfwe bwino. Nangu cingati mu Baibolo tamwaba amashiwi yatila “ukwangasha ifya mfwalo,” te kuti tutwishike no kutwishika ukuti ici cibelesho kuti calenga umuntontonkanya wa muntu ukukowela! Umuntu nga atwalilila ukulaangasha ifya mfwalo bushe te kuti onaule bucibusa bwakwe na Yehova no kuba uwakowela mu menso ya kwa Lesa? Natuleumfwila ukufunda kwa mutumwa Paulo ukutila, ‘muisangulule kuli fyonse ifikowesha umubili no mupashi’ kabili “mulenge fifwe ifilundwa fyenu ifya mubili ifya pano isonde ukukuma ku bulalelale, ukukowela, insuuna, ulunkumbwa lubi, no mufimbila.”—2 Kor. 7:1; Kol. 3:5.

Cino calo ico Satana ateka cilatekelesha ifyabipa, kabili cilakoselesha fye na bantu ukulacita ifyabipa. Kwena tacayanguka ukukaana amatunko ya kucita ifyabipa. Lelo Abena Kristu ba cine tabafwile ‘kulaenda ifyo abena fyalo benda mu buwelewele bwa mano yabo.’ (Efes. 4:17) Nga twaleka ukucita ifyabipa, nampo nga ni mu bumfisolo nelyo pa lwalala, e lintu fye Yehova akatusuminisha ukutwalilila ukulaenda mu “Nshila ya Mushilo.”

“Tamwakabe Nkalamo”

Pa kuti abantu bamo babe ifibusa fya kwa Lesa uwa mushilo, Yehova, bafwile ukuleka imibele ne milandile yabipa. Esaya 35:9 itila: “Tamwakabe nkalamo, tamwakasangwemo, icipondo ca cinama tacakaninemo,” e kutila, mu “Nshila ya Mushilo.” Nga kulandila mu mampalanya, abantu aba miponto kabili aba lukaakala baba kwati fiswango. Abantu ba musango yo tabakasuminishiwe ukwikala mu calo cipya ica kwa Lesa umukaba ubulungami. (Esa. 11:6; 65:25) Kanshi nacicindama kuli bonse abalefwaya ukuba ifibusa fya kwa Lesa ukuleka iyi mibele ya bunama no kulakonkelela imibele ya mushilo.

Baibolo itweba ukuti: “Ukusasuka konse ne cipyu no bukali no kootoka no musaalula fumyeni pali imwe pamo no bubi bonse.” (Efes. 4:31) Pa Abena Kolose 3:8, tubelengapo ukuti: “Pooseni fyonse, ubukali, icipyu, ububi, imiponto, kabili fumyeni ilyashi lya nsoni mu kanwa kenu.” Amashiwi ya kuti “umusaalula” ne “miponto” ayali muli aya malembo yapilibula ukulanda amashiwi ayabipa nelyo aya kukalifya.

Muno nshiku, abengi nabatemwa sana ukubomfya amashiwi ayabipa, aya miponto. Imilandile yabipa ilesangwa fye na mu mayanda mwine. Abaupana balabomfya amashiwi ya kukalifya, ayabi, nelyo ukusaalula abena mwabo na bana babo. Abena Kristu tabafwile ukubomfya amashiwi ya musango yo ilyo balelanda ku bena mwabo nelyo ku bana babo.—1 Kor. 5:11.

Ukutwalilila Ukuba aba ‘Mushilo mu Kutiina Lesa’ Lishuko Sana!

Ala lishuko nga nshi ukubombela Lesa wa mushilo, Yehova! (Yosh. 24:19) Paradaise ya mampalanya iyo Yehova atuletamo isuma nga nshi. Calicindama sana ukuba abasanguluka mu menso ya kwa Yehova.

Nomba line isonde lili no kuba Paradaise nga filya fine Lesa atulaya. (Esa. 35:1, 2, 5-7) Bonse abafwaya ukwikala mu paradaise kabili abatwalilila ukucita ifyo Lesa afwaya bakakwata ishuko lya kwikalamo. (Esa. 65:17, 21) E ico, kanshi, natutwalilile ukuba ne mibili ya busaka ne mibele yasanguluka ilyo tulepepa Lesa no kutwalilila ukulakosha bucibusa bwesu na Yehova.

[Futunoti]

[Icikope pe bula 26]

Cinshi abaYuda balingile ukucita pa kuti bende mu “Nshila ya Mushilo”?

[Icikope pe bula 27]

Ukutamba ifye shiku kulonaula bucibusa umuntu akwata na Yehova

[Icikope pe bula 28]

‘Ukootoka konse no musaalula fumyeni pali imwe’