Palameni Kuli Lesa
“Lesa Atemwa Uupeela ne Nsansa”
Bupe bwa musango nshi mwingatemwa sana? Kwena fwe bengi kuti twatemwa ukutupeela ica bupe te pa mulandu wa kuti uuletupeela afwile fye ukutupeela, lelo ni pa mulandu wa kuti natemwa ukutupeela. Ubupe ubusuma ni bulya umuntu apeela ukufuma pa nshi ya mutima. Tulomfwa bwino nga ca kuti umuntu atupeela ubupe bwa musango yu. Ne cacindama sana ca kuti Lesa na o alatemwa nga ca kuti tatulepeela no mutimako. Natulande pa mashiwi umutumwa Paulo alembele pali 2 Abena Korinti 9:7.
Mulandu nshi Paulo alembeele aya mashiwi? Alefwaya ukukoselesha Abena Kristu ba ku Korinti ukula-afwa Abena Kristu banabo aba mu Yudea abalekabila ubwafwilisho. Bushe Paulo alepatikisha abena Korinti ukuti bafwile ukwafwa bamunyinabo? Awe iyo, pantu na kuba alembele ukuti: “Onse acite umo apangile mu mutima wakwe, te kupeela na mutimako nangu mu kupatikishiwa, pantu Lesa atemwa uupeela ne nsansa.” Natumone umwalola aya mashiwi.
“Umo apangile mu mutima wakwe.” Ilyo Paulo alandile aya mashiwi, aloseshe mu kuti Umwina Kristu wa cine afwile ukulapeela pa mulandu wa kuti e fyo apangile “mu mutima wakwe.” Na kabili Umwina Kristu afwile ukumona no kwishiba bwino ifyo Abena Kristu banankwe balekabila pa kutila engabafwa. Uwasoma umo atile, ishiwi lya kuti “apangile,” “lipilibula ukutontonkanishisha libela ico umo alefwaya ukucita.” Kanshi Umwina Kristu afwile ukutontonkanya pa fyo Abena Kristu banankwe balekabila pa kuti eshibe ifyo engabafwa.—1 Yohane 3:17.
“Te kupeela na mutimako nangu mu kupatikishiwa.” Paulo alandile pa fintu fibili ifyo Abena Kristu bashilingile ukucita ilyo balefwaya ukupeela. Ne fi fintu, kupeela na mutimako nelyo mu kupatikishiwa. Icitabo cimo citila, umuntu uupeela na mutimako nelyo mu kupatikishiwa, apeela “ninshi mu mutima wakwe cilemukalipa pantu atontonkanya ukuti aleonaula indalama.” Kanshi umuntu uupeela na mutimako apeela pa mulandu wa kuti bamupatikisha fye ukupeela. Bushe kuti mwatemwa ukupokelela ica bupe ku muntu uulepeela na mutimako nelyo uo bapatikisha fye ukuti amupeele?
“Lesa atemwa uupeela ne nsansa.” Paulo atile Umwina Kristu nga alefwaya ukupeela, afwile ukupeela ne nsansa. Kanshi ukupeela ukufuma pa nshi ya mutima e kulenga uulepeela ukuba ne nsansa. (Imilimo 20:35) Uupeela ne nsansa alasekelela ica kuti na bantu bambi baleshiba ukuti natemwa pa kupeela. Na kuba, ishiwi lya kuti “insansa” lilondolola ifyo umuntu uulepeela ayumfwa mu mutima e lyo ne fyo amoneka nga alepeela. Tulomfwa bwino nga ca kuti uuletupeela ica bupe ali ne nsansa. Uupeela ne nsansa alasekesha na Lesa. Baibolo ya Contemporary English Version itila: “Lesa atemwa abantu abatemwa ukupeela.”
Ifyo umutumwa Paulo alandile, filalenga Abena Kristu baishiba bwino ifyo balingile ukucita ilyo balepeela. Kanshi ilyo tulebomfya inshita, amaka e lyo ne fyuma fyesu ku kwafwa bambi, maka maka abali mu kubulisha, tufwile ukucita ifyo mu kuitemenwa e lyo na pa mulandu wa kuti tulaba sana ne nsansa nga twabafwa. Ukupeela kwa musango uyu ku kalenga tuleba ne nsansa kabili ku katupalamika kuli Lesa, pantu Lesa “atemwa uupeela ne nsansa.”
Amalembo ya kubelenga mu September
[Amashiwi pe bula 13]
“Lesa atemwa abantu abatemwa ukupeela”