Imfwa Te Mpela ya Bantu!

Betani wali mushi uunono. Ukufuma mu Betani ukufika ku Yerusalemu pali amakilomita yatatu. (Yohane 11:18) Imilungu iinono ilyo Yesu ashilafwa, icintu cimo icabipa calicitike. Lasaro cibusa wa kwa Yesu alilwalishe e lyo afwa no kufwa.

Ilyo Yesu bamwebele ifyacitike, aebele abasambi bakwe ukuti Lasaro alilele utulo kabili ali no kumubuusha. (Yohane 11:11) Lelo abasambi ba kwa Yesu tabaumfwikishe umo aloseshe, e co Yesu abebele ukwabula ukupita mu mbali ati: “Lasaro nafwa.”—Yohane 11:14.

Yesu aile ku Betani pa kuti asansamushe Marita, nkashi ya kwa Lasaro. Pali iyi nshita ninshi napapita inshiku 4 ukutula apo Lasaro afwilile. Marita aebele Yesu ati: “Mwe Shikulu, nga mwali kuno ndume yandi nga tafwile.” (Yohane 11:17, 21) Yesu amwebele ati: “Nine kubuuka kabili umweo. Uuntetekela, nangu afwa, akaba no mweo na kabili.”—Yohane 11:25.

Pa kuti bonse beshibe ukuti ifyo alandile fyali fya cine, Yesu aile ku nshiishi no kubilikisha ati: “We Lasaro, fuma!” (Yohane 11:43) Ilyo abantu bamwene Lasaro afuma mu nshiishi, balipapile nga nshi.

Pali iyi nshita ninshi Yesu alibuushapo kale abantu babili. Bushiku bumo abushiishe umwana mwanakashi wa kwa Yairo. Ilyo ashilamubuusha, alandile ukuti umukashana aleele fye utulo.—Luka 8:52.

Ilyo Yesu abushiishe Lasaro no mwana wa kwa Yairo, Yesu apashenye imfwa ku kulaala utulo. Kanshi ifyo Yesu alandile fyali fye bwino pantu umuntu nga nalaala teshiba kantu nangu kamo, tomfwa ubukali kabili tacula. (Lukala Milandu 9:5; belengeni akabokoshi kaletila, “Imfwa Yaba Kwati Kulaala Utulo.”) Abasambi ba kwa Yesu balishibe bwino ifyo abafwa baba. Icitabo ca Encyclopedia of Religion and Ethics citila: “Abasambi ba kwa Yesu balemona imfwa kwati kulaala utulo, e lyo inshiishi baleimona kwati mwa kutuushisha . . . abakwata icitetekelo.”a

Tulomfwa bwino ukwishiba ukuti abafwa baba fye nga baleele utulo kabili tabacula. Kanshi apo twaishiba icicitika nga twafwa, tatufwile ukulatiina imfwa.

“UMUNTU NGA AFWA, BUSHE KUTI ABA NO MWEO NA KABILI?”

Nangu ca kuti tulomfwa bwino ukulaala, bushe kuti twatemwa ukulaalilila fye ukwabula ukubuuka? Bushe twalicetekela ukuti abafwa bakabuuka nga filya Lasaro no mwana wa kwa Yairo babuukile?

Ilyo Yobo ali mupepi no kufwa, alipwishe ati: “Umuntu nga afwa bushe kuti aba no mweo na kabili?”—Yobo 14:14.

Yobo umwine alyaswike ici cipusho ilyo atile: “Muketa, na ine nkaasuka. Pantu mukafuluka umulimo wa minwe yenu.” (Yobo 14:15) Yobo alishininkishe ukuti Yehova alafwaisha ukubuusha ababomfi bakwe aba citetekelo. Bushe ifi Yobo aletontonkanya fyakwelenganya fye? Awe.

Nga twatontonkanya pa bantu Yesu abuushishe, kuti twamona ukuti Lesa alipeela Yesu amaka ya kubuusha abafwa. Na kuba, Baibolo ilanda ukuti Yesu alikwata “amakii ya mfwa.” (Ukusokolola 1:18) Kanshi filya Yesu abuushishe Lasaro filanga fye ukuti alikwata amaka ya kubuusha abafwa.

Baibolo yalilanda sana pe subilo lya kubuuka. Malaika aebele kasesema Daniele ati: “Ukatuusha, lelo ukema no kuya ku cipendwilo cobe ku mpela ya nshiku.” (Daniele 12:13) Yesu aebele abaSaduke, intungulushi sha baYuda abashasumine mu kubuuka ati: “Mwaliluba, pantu tamwaishiba Amalembo nelyo amaka ya kwa Lesa.” (Mateo 22:23, 29) Umutumwa Paulo na o atile: “Nalicetekela Lesa . . . ukuti kukaba ukubuuka kwa balungama na bashalungama.”—Imilimo 24:15.

NI LILALI ABAFWA BAKABUUKA?

Ni lilali kukaba ukubuuka kwa balungama na bashalungama? Malaika aebele Daniele ukuti akabuuka “ku mpela ya nshiku.” Marita na o alicetekele ukuti ndume yakwe, Lasaro, “akema ilyo kukaba ukubuuka pa bushiku bwa kulekelesha.”—Yohane 11:24.

Ubu “ubushiku bwa kulekelesha” Baibolo yalandapo, ni nshita ilyo Kristu akalateka. Paulo alembele ukuti: “Pantu ali [Kristu] no kuteka mpaka Lesa akabike abalwani bonse pe samba lya makasa yakwe. No mulwani wa kulekelesha ukonaulwa ni mfwa.” (1 Abena Korinti 15:25, 26) Uyu e mulandu uukalamba uo tufwile ukupepela Ubufumu bwa kwa Lesa ukwisa no kufwaya kwakwe ukucitika pano calo.b

Yobo alishibe ukuti Lesa alafwaisha ukubuusha abafwa. Ilyo iyi nshita ikafika, imfwa tayakabeko. Pali iyi inshita bonse bakeshiba ukuti imfwa te mpela ya bantu.