Abafwa Bakabuuka

Bushe mwalisumina filya Baibolo ilanda ukuti abafwa bakabuuka?a Cikawama nga nshi ukumonana na bantu besu abafwa. Bushe caliba fye bwino ukucetekela ukuti abafwa bakabuuka? Pa kuti twasuke ici cipusho, twalalanda pa batumwa ba kwa Yesu Kristu abasumine mu kubuuka.

Abatumwa balicetekele sana ukuti abafwa bakabuuka. Mulandu nshi? Kwali ifintu fibili ifyalengele ukuti bacetekele. Ica kubalilapo, ni co balimwene ukuti Yesu alibukiile ku bafwa. Abatumwa na “ba bwananyina abacilile imyanda isano (500)” balimwene uko Yesu abuukile. (1 Abena Korinti 15:6) Kabili ifyalembwa mu mabuuku ya Mbila Nsuma filanga ukuti abantu abengi balisumiine kabili balilandilepo ukuti ca cine Yesu alibuukile.—Mateo 27:62–28:20; Marko 16:1-8; Luka 24:1-53; Yohane 20:1–21:25.

Ica bubili ca kuti, abatumwa balimweneko uko Yesu abuushishe abantu batatu, umo ku Naini, umbi ku Karpenahumu e lyo umbi ku Betani. (Luka 7:11-17; 8:49-56; Yohane 11:1-44) Umuntu uo Yesu alekeleshe ukubuusha pali aba batatu, ali munankwe sana. Lekeni tumone ifyo cali.

“NINE KUBUUKA”

Yesu aebele Marita uo ndume yakwe afwile ninshi napapita inshiku 4 ati, “Ndume yobe alabuuka.” Marita taumfwile umo aya mashiwi yalolele e ico atile, “Ninjishiba ukuti akema,” lelo aletontonkanya ukuti Lasaro akabuuka ku ntanshi. Ilyo Yesu aebele Marita ukuti, “Nine kubuuka kabili umweo,” kabili ilyo amwene uko Yesu abuushishe ndume yakwe, alipapile.—Yohane 11:23-25.

Bushe Lasaro ali kwi pa nshiku 4 ilyo afwile? Lasaro talandilepo icili conse icilanga ukuti alikelepo kumo pali shilya nshiku afwile. Lasaro alifwile e co taile ku muulu. Ilyo Yesu amubuushishe, tamufumishe ku muulu uko twingatila aleipakisha ukwikala capamo na Lesa. Nomba ninshi Lasaro ali kwi pali shilya nshiku 4? Ali mu nshiishi.—Lukala Milandu 9:5, 10.

Yesu alingenye ukufwa ku kulaala utulo. Uufwile kuti abuuka nga filya fine uleele utulo engabuuka. Baibolo itila: “‘Lasaro umunensu nalaala utulo, lelo ndeya mu kumubuusha.’ E ico abasambi bamwebele ati: ‘Mwe Shikulu, nga nalaala utulo, alaba fye bwino.’ Lelo ico Yesu alelanda ca kuti Lasaro nafwa. Kabili bena baleti alelanda pa kulaala fye utulo. Na o Yesu e pa kubeba fye icishinka ati: ‘Lasaro nafwa.’” (Yohane 11:11-14) Yesu alibuushishe Lasaro kabili ilyo amubuushishe alitwalilile ukwikala na balupwa lwakwe. Balupwa lwa kwa Lasaro balitemenwe sana ilyo Yesu abuushishe Lasaro!

Filya Yesu abuushishe abafwa ilyo ali pano calo, filanga ifyo akacita mu Bufumu bwa kwa Lesa ilyo akalateka.b Ilyo Yesu akalateka, akabuusha abafwa abalaala mu manda. E co alandiile ati: “Nine kubuuka.” Ala cikawama ukumona abo twatemwa baba no mweo na kabili! Abakabuuka na bo bakaba ne nsansa icine cine!—Luka 8:56.

TUFWILE UKUBA NE CITETEKELO PA KUBA NO MWEO WA MUYAYAYA

Yesu aebele Marita ati: “Uuntetekela, nangu afwa, akaba no mweo na kabili; na onse uuli no mweo kabili antetekela, takafwe nakalya.” (Yohane 11:25, 26) Bonse abo Yesu akabuusha ilyo akalateka pa myaka ikana limo (1000), bakekala umuyayaya nga bakatwalilila ukuba ne citetekelo.

Ilyo Yesu alandile amashiwi ya kusansamusha aya kuti abafwa bakabuuka, aipwishe Marita icipusho cacindama ati: “‘Bushe wasumina ifi?’ Na o amwaswike ati: ‘Ee, mwe Shikulu; nasumina ukuti ni mwe Kristu, Umwana wa kwa Lesa.’” (Yohane 11:26, 27) Bushe na imwe kuti mwatemwa ukucetekela ukuti abafwa bakabuuka nga filya Marita acetekele? Nga mulefwaya, ninshi kuti cawama mwasambilila pa fyo Lesa afwaya ukucitila abantunse. (Yohane 17:3; 1 Timote 2:4) Ukusambilila pali Lesa kukalenga mukabe ne citetekelo. Kuti cawama mwaeba ba Nte ukulasambilila nenu ifyo Baibolo yalandapo pali ili lyashi. Bakatemwa sana ukulanshanya na imwe pali ili isubilo lya kubuuka.