Bushe Abena Kristu Balingile Ukulasefyako Isita?

Muli Encyclopaedia Britannica, Isita bailondolola ukuti “mutebeto uwacindama sana umo Abena Kristu basefya Ukubuuka kwa Yesu Kristu.” Nomba bushe Abena Kristu balingile ukulasefyako Isita?

Umuntu nga apanga icintu ico mulefwaya ukushita, ilyo mushilashita mufwile intanshi ukucibebeta bwino. Na ifwe bene pa kuti twishibe nga ca kuti Abena Kristu balingile ukulasefyako Isita nelyo iyo, tufwile intanshi ukwishiba ifishinka fyonse pali Isita.

Ica kubalilapo, Yesu taebele abasambi bakwe ukulaibukisha ukubuuka kwakwe, lelo abebele ukulaibukisha imfwa yakwe. Paulo aitile ici icibukisho ca mfwa ya kwa Yesu ukuti, “Umulaalilo wa kwa Shikulu.”—1 Abena Korinti 11:20; Luka 22:19, 20.

Icitabo ca Britannica na co catila, ifingi ifyo bacita pa kusefya Isita “tafyayampana no kubuuka kwa kwa Yesu,” ifyo bacita “fyafuma ku ntambi sha bashali Bena Kristu.” Ku ca kumwenako, umfweni ifyo icitabo ca Encyclopedia of Religion calanda pa mani na tukalulu ifyo balebomfya pa kusefya Isita, catila: “Amani yapilibula ubumi ubupya kabili ubwakosa.” Calanda no kuti: “Kalulu aishibikwe ukuti alikwete sana ubufyashi, kanshi ukubomfya kalulu calepilibula ukupalama kwa nshita ya mwaka ilyo ifintu fitendeka ukupuuka.”

Kalemba wa fitabo uwaishibikwe sana ku kale, Philippe Walter alilandile icalengele abantu balekonka intambi sha musango yu pa kusefya Isita. Alembele ukuti: “Ilyo Abena Kristu na basenshi batendeke ukupepela pamo, abasenshi abalesefya ukupalama kwa nshita ilyo ifintu fitendeka ukupuuka,” ba-ampenye ukusefya kwabo ku kubuuka kwa kwa Yesu. Kalemba Walter alandile no kuti, ici calengele ukuti “abasenshi batendeke ukusefya uko Abena Kristu balesefyako, ukucita ifi kwalengele ukuti canguke ukubongola.

Ilyo abatumwa bashilafwa, Abena Kristu na basenshi tabaleba pamo, pantu Abena Kristu ‘balecincintila’ abasenshi. (2 Abena Tesalonika 2:7) Umutumwa Paulo alandile ukuti ilyo “nkafumapo” kukema “abantu abakalasambilisha ifyanyongana pa kuti bongole abasambi, balebakonka.” (Imilimo 20:29, 30) Umutumwa Yohane alembele ukuti ilyo abatumwa abengi bafwile, ninshi abaume bamo balitampa kale ukulufya abantu. (1 Yohane 2:18, 26) Apa pene e patendekele ne fisambilisho fya basenshi.

Bamo kuti batila filya Abena Kristu batendeke ukukonka fimo ifyo abasenshi balecita pa kusefya Isita cali fye bwino, pantu calengele ukuti abasenshi beshibe ifyo ukubuuka kwa kwa Yesu kwacindama. Lelo ifi te fyo Paulo atontonkenye, nangu ca kuti alishibe intambi sha basenshi ishingi ilyo aleshimikila mu buteko bwa bena Roma, talemona ukuti nga aleshikonka e lyo engashimikila bwino abantu pali Yesu. Lelo asokele Abena Kristu ukuti: “Mwiba kwi koli limo line na bashatetekela pantu tamwaba cimo cine. Bushe ubulungami na bumpulamafunde kuti fyaumfwana shani? Napamo ulubuuto ne mfifi kuti fyaikala shani pamo? ‘E ico fumenimo muli bena, no kuipaatulako,’ e fyasosa Yehova, ‘kabili mwi-ikatako ku cishasanguluka.’”—2 Abena Korinti 6:14, 17.

Finshi mwasambililako kuli ifi twalondolola pali Isita? Cailanga fye apabuuta tuutu ukuti Abena Kristu tabalingile ukulasefyako Isita.