Nga Muleumfwa Kwati no Kufwa Kwawama

Ba Adriana aba ku Brazil batile: “Naleumfwa sana ububi ica kuti natendeke ukutontonkanya pa kuipaya.”

BUSHE mwalyumfwapo sana ububi ica kuti mwalamona kwati no kufwa kwawama? Nga ca kuti mwalyumfwapo ifya musango uyu ninshi kuti mwaishiba ifyo ba Adriana baleumfwa. Ba Adriana balesakamikwa sana, baleba sana no bulanda kabili balifuupwilwe. Ilyo baile ku cipatala bailesanga ukuti icalelenga baleumfwa ifi ni co balilwele ubulwele ubulenga abantu ukulaumfwa sana ubulanda inshita ili yonse.

Ba Kaoru aba ku Japan balesakamana abafyashi babo abakoloci kabili abalelwalilila. Batile: “Pali ilya nshita imilimo ku ncito yalekosa sana. Nshalefwaya ukulya kabili nalefilwa ukulaala bwino. Natendeke ukutontonkanya ukuti ukufwa kuti kwawama pantu ninshi amafya yapwa.”

Ba Ojebode aba ku Nigeria nabo batile: “Naleba sana no bulanda ica kuti nalelila, kabili nalefwaya fye no kuipaya.” Icaweme ca kuti ba Ojebode, ba Kaoru na ba Adriana tabaipeye. Na lyo line, abantu abengi balaipaya cila mwaka.

ABENGAMWAFWA

Abaume balaipaya sana ukucila abanakashi, pantu bena balomfwa insoni sha kweba abantu ukuti babafwe. Yesu alandile ukuti abalwele balakabila uwa kubondapa. (Luka 5:31) Kanshi nga ca kuti mulomfwa sana ububi ica kuti mulafwaya no kuipaya, mwilaumfwa insoni ukwebako bambi ukuti bamwafwe. Abengi abalwala amasakamika basanga ukuti ukuya ku cipatala mu kundapwa kulalenga baumfwako bwino kabili kulabafwa ukushipikisha. Ba Ojebode, ba Kaoru na ba Adriana balile ku cipatala pa kuti babafwe kabili ifyo babafwile fyalilenga batwalilila ukushipikisha.

Badokota kuti bapeela uulwele amasakamika umuti nelyo kuti balanshanya fye nankwe pa kuti bamwafwe ukutendeka ukumfwako bwino. Balupwa ne fibusa kuti basansamusha uwalwala amasakamika nga ca kuti balekutika ilyo alelanda, bali abatekanya, kabili balemusakamana bwino. Yehova Lesa e cibusa umusuma sana uo twingakwata, kabili alatwafwa ukubomfya Icebo cakwe Baibolo.

BUSHE KUKABA INSHITA ILYO ABANTU BAKALEKA UKULWALA AMASAKAMIKA?

Abalwala amasakamika balakabila ukubondapa pa nshita iikalamba, kabili balingile ukwaluka muli fimo pa kuti bengatwalilila ukushipikisha. Icisansamusha ba Ojebode kutontonkanya pa nshita ilyo ifintu fikawama, kabili na imwe kuti mwasansamuka nga mulecita cimo cine. Ba Ojebode batile: “Ndafwaisha ukwisamona uko ilembo lya kwa Esaya 33:24 likafikilishiwa, ililanda pa nshita ilyo takwakabe umuntu pe sonde uukatila ‘nindwala.’” Nga filya ba Ojebode bacita, na imwe muletontonkanya pa fyo Lesa atulaya ukuti akatupeela “icalo cipya” umushakabe “ukukalipwa.” (Ukusokolola 21:1, 4) Ilyo Lesa akafikilisha ubu bulayo takwakabe umuntu uukalaumfwa ububi. Na kabili fyonse ifilenga muleumfwa ububi “fikalabwa, kabili tafyakese na mu mutima [wenu].”—Esaya 65:17.

Amalembo ya mu Baibolo Ayengamwafwa Ukulaumfwako Bwino

Lesa alishiba ifyo mumfwa.

“Ine, ne Yehova Lesa obe, ndeikata ukuboko kobe ukwa ku kulyo, ndekweba ati, ‘Witiina. Ine nkakwafwa.’”—Esaya 41:13.

Yehova alishiba bwino ifyo tumfwa ukucila umuntu uuli onse, kabili alafwaya ukutwafwa.

Muletontonkanya sana pa fyaba mu Baibolo.

‘[Eliya] alombele ukufwa. Atile: “ . . . mwe Yehova lekeni fye mfwe.”’—1 Ishamfumu 19:4.

Ba Ojebode batile: “Ukutontonkanya sana pa fyaba mu Cebo ca kwa Lesa kwalingafwile. Nalimwene ukuti na kasesema Eliya aleumfwa nge fyo naleumfwa.”

Mulesambililako ku balembwa mu Baibolo.

“[Ine ne Yesu] ninkupepelako [Petro] ukuti icitetekelo cobe cinenuka.”—Luka 22:32.

Ilyo umutumwa Petro akeene Yesu imiku itatu, alyumfwile sana ububi kabili alililile. Ba Kaoru batile: “Ifyacitikiile Petro fyalilengele naishiba ukuti Yehova na Yesu balibikile amano ku fyo Petro aleumfwa, kabili ukwishiba ifi kwalinkoseleshe.”

Fyonse ifilenga muleumfwa ububi “fikalabwa, kabili tafyakese na mu mutima [wenu].” —Esaya 65:17