Ukusakamana Ukukabila kwa ku Mupashi Ukwa Bankomamatwi
1 Bankomamatwi abengi baleisa kuli Kacema Musuma kabili baleba fibusa fya kwa Yehova Lesa ukupitila mu kuipeela kuli wene. (Yoh. 10:3, 11) Aba mu cilonganino, maka maka baeluda, bafwile ukuba abaibukila ku kukabila kwa ku mupashi ukwa bamunyinefwe na bankashi yesu bankomamatwi.
2 Ukukumanisha Ukukabila kwa Bankomamatwi: Ifilonganino ifyakwata abaishiba ukupilibula ululimi lwa kubomfya ifishibilo filateyanya ukuti bakapilibula balebapilibwilako ukulongana mu lulimi lwa kubomfya ifishibilo. Nga ca kuti mu cilonganino tamuli nangu umo uwaishiba ukupilibula ululimi lwa kubomfya ifishibilo, kuti cawama ukutungulula bankomamatwi ku cilonganino ca mupepi ukwaba abaishiba ululimi lwa kubomfya ifishibilo. Ca cine, nga ca kuti kuli iyo ncende mwabela takwaba imitantikile ya musango yo, nalimo kuti bakasabankanya abasalilwe ukulalembelako bankomamatwi ifishinka fikalamba ifya lyashi lilelandwa kuti balekomboshanya mu kucite fyo ilyo bekele apali bankomamatwi.
3 Imitantikile ya pa Kulongana kwa Muputule no kwa Cilonganino: Imitantikile ya kupilibwila bankomamatwi mu lulimi lwa fishibilo pa kulongana kwa muputule na pa kulongana kwaibela ukwa bushiku bumo yampanishiwa na kangalila wa muputule. Eluda nelyo umubomfi utumikila uwafikapo napamo e wingasalwa ukuba kampanya. Bamunyina na bankashi ababa ca kumwenako cisuma kuti bapeelwako umulimo wa kulapilibula amalyashi mu lulimi lwa kubomfya ifishibilo pa kulongana kukalamba. Inshila imo ine napamo e ingakonkwa na pa kulongana kwa cilonganino, ukushininkisha ukuti bankomamatwi balesakamanwa bwino.
4 Kuti caba bwino ukuti bankomamatwi baikalila pa ncende apa kuti balemona bakapilibula ba lulimi lwabo e lyo ne cisebele. Bafwile ukucita ici pa kulongana kwa cilonganino na pa kulongana kwa muputule. Pa kulongana kwa cilonganino kuti caba bwino nga ca kuti kapilibula wa lulimi lwa kubomfya ifishibilo aikalako nga ca kutila bankomamatwi abasangilwe ku kulongana bali fye abanono. Kuti cawama baeluda ukumonana na munyina nkomamatwi uwakosoka, nga ca kuti e po aba, pa lwa mitubululo ya mu kulungatika pa fya kwikala bwino.
5 Nga ca kuti kapilibula wafikapo ni eluda nelyo mubomfi utumikila kabili bamunyina na bankashi bankomamatwi bafwaya, baeluda kuti bapingulapo ukuti ukulongana kumo kulebako konse fye mu lulimi lwa kubomfya ifishibilo. Ukulongana kwe Sambililo lya Citabo pa Cilonganino e kulongana kwa cila mulungu ukwingabalilapo ukutantikwa. Nga ca kuti icilonganino cilefwaya ukulalongana ukulongana na kumbi pali kulya kusano mu lulimi lwa kubomfya ifishibilo, baeluda bafwile ukwishibisha Sosaite pali uyu mulandu.
6 Nangu ca kuti ukumfwana pali bankomamatwi e lyo na bomfwa kukabila ukuibikilishako ku mabumba yonse yabili, aba mu cilonganino bonse bafwile ukutukuta ukwishibana pa kuti paleba ukukoseleshanya kwine kwine. (Heb. 10:24) Ukuba no mupashi wa musango yu pali bamunyina kukalenga na bapya bonse ukulaumfwa abasengelwa.