Umukululo wa Cipusho

◼ Ni nshila nshi ilingile ukukonkwa pa kutambika ukusuminishanya ku cilonganino?

Ukusuminishanya kufwaikwa lintu ukupingulapo kufwile ukucitwa pa lwa milandu yakatama pamo ngo kushita icikuulwa, ukwalula imimonekele ya mikuulilwe ya Ŋanda ya Bufumu nelyo ukukuula Iŋanda ya Bufumu, ukutuma imisangulo yaibela ku Sosaite, nelyo ukusakamana ifipooswa fya kwa kangalila wa muputule. Ilingi line calicilapo ukuwamisha ukutambika ukusuminishanya ku kukwata ukusuminisha inshita iili yonse lintu indalama sha cilonganino shili no kubomfiwa.

Imilandu isanshishemo ukukabila kwaibela ukwalundana mu kulungatika ne milimo yakatama nelyo imibombele eingafumishiwako. Ku ca kumwenako, icilonganino kuti pambi capingulapo ukusangwilako ku Sosaite umuku umo icipimo capingulwa cila mweshi ku kwafwilisha umulimo wa kushimikila uwa mu kusaalala kwa calo. Na kabili, ifipooswa fya lyonse ifya Ŋanda ya Bufumu, pamo nge fya kubomfya ne fya kuwamisha, amalaiti na menshi, tafikabila ukusuminishanya.

Lintu ukukabila kwaba ukwamonekesha, ibumba lya baeluda lilingile ukulanshanya umulandu mu kukumanina. Nga ca kuti icinabwingi casuminishanya ukuti icintu cimo cilekabilwa ukucitwa, umo uwa baeluda, nakalimo icilundwa ca Komiti wa Mulimo uwa Cilonganino, alingile ukupekanya ukusuminishanya kwalembwa ku kubelengwa ku cilonganino pa Kulongana kwa Mulimo.

Eluda uulebomba nga ceyamani alingile ukulondolola mu kwipifya lelo mu kumfwika ukukabila ukuliko na cintu ibumba lya baeluda litashishe icingacitwa ku kusakamana kwene. Icilonganino lyene cilapeelwa ishuko lya mu nshita ku kwipusha ifipusho fyalinga. Nga ca kuti umulandu naupikana, kuti pambi cawamisha ukulalikisha ukupingulapo ukufikila Ukulongana kwa Mulimo ukuli no kukonkapo ku kupeela bonse inshita ya kutontonkanyapo. Ukupingulapo kwa cine cine kucitwa ukupitila mu kwimya amaboko.

Ifilundwa fya cilonganino abo fye beka abaipeela kabili ababatishiwa e bengapingulapo pa kusuminishanya kano nga ca kuti ififwaikwa fya mwi funde fyakabila icapusanako, nga fintu pambi cingaba lintu imilandu ya mabulashi nelyo amaloni ya Mayanda ya Bufumu fibimbilwemo. Te kuti cibe icalinga ku batandashi ukufuma ku filonganino fimbi ukwakanamo.

Pa numa ukusuminishanya kwapokelelwa, kulingile ukulembwapo ubushiku kwacitwa, ukusainwa, no kubikwa muli faelo wa cilonganino.