Ba Uwaibukila pa lwa Kulembesha mu October
1 Ulupungu lwa kwa Kalinda na Loleni! fyakwatamo ubukombe bwa kusansamusha kabili ubwa kukoselesha ubwa mbila nsuma iya muyayaya. Ukuba uwaibukila pa lwa kulembesha kubimbamo ukusendako inshita ya kubelenga bamagazini mu kusakamanishisha no kulanguluka ifyo ifipande pambi fingepukisha ku bantu mu cifulo cesu ica kubombelamo.
2 Intanshi, ba uwabeleshanya ne fipande fileebekeshiwa pa nkupo. Ifikope fili pa nkupo ifine fyeka ilingi line fikashalika bamagazini. Soobolapo ifipande ifyo pambi uleyumfwe fyo kuti fyacebusha abantu mu cifulo cobe ica kubombelamo. Bushe abantu baba apakalamba aba cisumino cimo ica butotelo? Cinshi caba ukwangwako kwabo ukukalamba? Mu kuba na ya matontonkanyo, ulingile ukuba na maka ya kupekanya imipeelele ya kufumamo cimo. Mona iyi itantikwe pe samba.
3 Nga ca kuti uletambika “Ulupungu lwa kwa Kalinda” ulwa October 1, kuti pambi walangisha icipande “Baibolo—Cinshi Caba Ubucindami bwa Iko Ubwine Bwine?” Kuti pambi watila:
◼ “Kuti mwasanga Baibolo mupepi na mu ŋanda iili yonse mu bwikashi bwesu. Abengi abaikwata bayumfwa ukuti yakwatamo icintu cimo ica bucindami bwaibela.” Lyene kuti pambi waipusha icipusho ca kulungatika, pamo nge ci: “Cinshi cintu muletontonkanya cilenga Baibolo ukuba iyaibela?” nelyo, “Cinshi cintu muletontonkanya cikaafwa abantu bafulilako ukunonkelamo ukufuma muli Baibolo?” Ukukonka pa kwankulako kwa kwa mwine ŋanda, kuti pambi waba na maka ya kutwalilila mu kuba no kulandapo kwalinga, pamo ngo ku: “Kwalibako ubushininkisho bwakulisha ku kushinina ukuti Baibolo yalipuutwamo kuli Lesa kabili yaba ca kutungulula cashintililwapo kuli ifwe. Yakwatamo ukwishiba uko kwingatungulula ku bumi bwa muyayaya. [Belenga Yohane 17:3.] Abantu abengi balicindika yene lelo tabaishiba ifya kubomfya yene. Ici cipande mu Ulupungu lwa kwa Kalinda cilelondolola fintu imwe pa lwenu mwingabomfya Baibolo ku kusanga ifyasuko ku fipusho fyenu pa lwa nshita ya ku ntanshi. Kuti natemwa ukumushiila uyu kope.” Lyene belenga sentensi wasalilwa libela umo nelyo babili kabili konkanyapo ukulondolola ukulembesha.
4 Ukubomfya “Ulupungu lwa kwa Kalinda” ulwa October 15, kuti pambi wasalapo imitununukile yayanguka ukupala iyi:
◼ “Mupepi no uuli onse alilufyapo umutemwikwa mu mfwa. Ici cipande cileimya icipusho ca kuti, ‘Cinshi Caba Imibele ya Bafwa?’ Cinshi muletontonkanya cicitika lintu umuntu afwa? [Suminisha ukwankulako.] Nga mwingatemwa ukwishiba fintu Baibolo yasuka ico cipusho, kuti naba uwasekelela ukumushiila uyu kope wa magazini. Nga mwingatemwa aba bamagazini ukulatumwa kuli imwe imiku ibili mu mweshi pa mwaka uutuntulu, kuti mwalembesha pali K5,000 epela.”
5 “Loleni!” wa November 8 alebebeta ubushininkisho na bumbi pa bwafulisha ubulangisha ukufilwa kwa butotelo bwa bufi. Ukubomfya ifipande pa “Lintu Ubutotelo Bwabisha Ulubali Lumo mu Nkondo,” kuti waimya ici cipusho:
◼ “Nga ca kuti Yesu ali pano lelo, ni shani fintu muletontonkanya engayumfwa pa lwa lukaakala lonse ulutushingulwike? [Suminisha ukwankulako.] Yesu atusambilishe ukutemwa uuli onse, nelyo fye balwani besu. Nalyo line, amabutotelo ayengi ayatunga ukuba Abena Kristu balabisha ulubali lumo mu fikansa fya mapolitiki. Ni shani fintu muletontonkanya ico cambukila abantu abafwaya ukwikalila ku cintu Yesu asambilishe? [Suminisha ukwankulako.] Uyu Loleni! alelanda pali ico cipusho no kulondolola fintu Ubufumu bwa kwa Lesa bukapayanya icasuko.”
6 Pa mbali ya kutambika bamagazini umo umo pa mwinshi uuli onse, shininkisha ukutambika ukulembesha na ko kwine. Umusangulo ni K5,000 pa mwaka umo.