Peela Ukusakamana kwa Lyonse ku Kusambilisha Kobe

¹ Programu mupya uwe Sukulu lya Butumikishi bwa Teokratiki akatendeka mu January 1995. Cinshi cili icipya muli programu? Icitabo, “Amalembo Yonse Yantu Yapuutwamo Kuli Lesa, Kabili ya Kunonsha,” cikaba e citabo ca malyashi ya kufunda yonse. Mu kati ka mwaka, amabuuku ya Baibolo 16 yakalangulukwa. Apantu kukalabako ifipusho fya kupitulukamo pa numa ya lyashi lya kufunda, cinshi twingacita pa kupeela ukusakamana ku kusambilisha kwesu no kunonkelamo mu kukumanina ukufuma muli ici citabo?—1 Tim. 4:16, NW.

² Nangu cingati bamo kale kale balibelenga icitabo ca Amalembo Yonse, ukulanguluka ifyebo mu kutantika kwe sukulu kukaafwa bonse ukutesekesha mu kucilanapo Icebo ca kwa Lesa icapuutwamo. (2 Tim. 3:16, 17) Mulandu nshi te kupaatwilako inshita imo cila mulungu ukupituluka mu fyebo fili no kupeelwa mu citabo ca Amalembo Yonse?

³ Amalyashi ya Kufunda Ayabamo Ubumi Kabili aya Kulengo Buseko: Amalyashi ya kufunda ukufuma mu citabo ca Amalembo Yonse yalingile ukupeelwa mu nshila yabamo ubumi kabili iya kulengo buseko. Na kabili yalingile ukwebekesha ubucindami bubomba ubwa fyebo, ukubomfya fyene ku kulenga umucinshi wa ku Cebo ca kwa Lesa icapuutwamo no kutesekesha ici cuma cesu nga babomfi ba kwa Lesa ukushikilako. Nga ca kuti ulupwa lumo lumo ululesangwa kwi Sukulu lwasenda kope wa citabo ca Amalembo Yonse ku kulongana, ifilundwa fya lupwa kuti fyakonka ilyashi lya kufunda mu kupalamisha nga nshi no kunonkelamo ukufuma muli ici citabo.

⁴ Ukubelenga Baibolo Ukwa Kubimbula Itontonkanyo: Ukubelenga bwino, mu kuba no kwebekesha kwalinga no kuyumfwa, kwaba lubali lwacindama ulwa kusambilisha kwa kufumamo cimo. Mu kulundapo, ubwingi bwa fyebo fipeelwa ku kubelengwa mu Lyashi No. 2 tafyafula, e co inshita yalinga ilingi line ikalabako ku mitendekele no kulandapo kwa kusondwelela kuli kalanda. Imitendekele ilingile ukwimya ubuseko mu fyebo fipeelwe no kupekanishisha ibumba ukwiluka ubucindami bwa fiko ububomba. Insondwelelo kuti pambi yasanshamo ukulandapo kwa kulondolola no kubomfya ifyebo, mu kuba na kalanda ukubomfya inshita yapeelwa mu kukumanina.

⁵ Ifyebo fyalundwapo ifya programu we sukulu na fintu imbali shili no kulabombwapo kuti fyasangwa mu “Ukutantika kwe Sukulu lya Butumikishi bwa Teokratiki Ukwa 1995.” Tulapeela ukusakamana ku kusambilisha kwesu pa kupituluka mu makambisho yaba muli fi fyebo, pa kupekanya imbali shesu bwino, na pa kubombela pa kufunda uko twapeelwa, pa kuti twingawamyako mu kulamuka kwa kulanda no kusambilisha. Abo abashilati balembeshe mwi sukulu balelaalikwa mu kukaba ukucite fyo.