Ulubali 2—Nonkelamo mu Isukulu lya Butumikishi bwa Teokrasi Ilya 1996
1 Mu kwangufyanya pa numa ya kutendeka kwa Isukulu lya Butumikishi bwa Teokrasi mu 1943, umo uwa misambo ya Sosaite washimike ukuti: “Iyi mitantikile ishaiwamina yalitungulwike mu nshita fye iipi ku kwafwilisha bamunyina abengi abo baleelenganya ukuti tabakatale ababa bakalanda ba pa cintubwingi, ukuba abafikapo nga nshi pa cisebele no kubombesha mwi bala.” Isukulu lyalitwalilila ukupayanya ukukansha kwawamisha, uko ifwe bonse tukabila.
2 Ukubelenga Baibolo: Abo bapeelwa imbali sha kulanda te beka fye abamwenamo mwi sukulu. Mu cituntulu, ifwe bonse tulapeelwa ulubali—ukubelenga Baibolo ukwa mulungu no mulungu. Ukutantika kwe sukulu kulanga ifipandwa fya Baibolo ifili no kubelengwa cila mulungu. Kwalibako ifya kucinkulako ifingi ifya mu Malembo ifyo fyebekesha ubucindami bwa kubelenga Baibolo cila bushiku. (Yosh. 1:8; Ilu. 1:2; Imil. 17:11) Ukubelenga Baibolo kwalikatama ku butuntulu bwa ku mupashi ubusuma; kulaliisha umuntontonkanya no mutima. Nga ca kuti twabelenga Baibolo mupepi na maminiti yasano nelyo ukucilapo cila bushiku, tukaba na maka ya kwendela pamo no kutantika kwe sukulu. Pa kupwa kwa mwaka, tukaba natubelenga ukucila pa fipandwa 150 ifya Cebo ca kwa Lesa. Nga ca kuti tulekwata Baibolo mupepi, kuti tuleibelenga cila bushiku.
3 Ilyashi lya Kufunda: Pa kukunta bamunyina ukubomba umulimo wa bucishinka, uwapimpa, kalanda alepeela ilyashi lya kufunda alekabila ukubomfya inshila sha kusambilishishamo ishisuma, ukulenga ifyebo ukumfwika, no kulundulula ukutesekesha Yehova, Icebo cakwe, no kuteyanya kwakwe. Baeluda na babomfi batumikila kuti bapwishishisha ici pa kupekanya bwino, ukulundulula ilyashi lyabo pa kukomaila pa mutwe, ukulanda mu kushininkisha, no kulenga ifyebo ukuba ifya kucincimusha. (Heb. 4:12) Calicindama ukuti kalanda tacilile mu nshita apeelwa. Icitabo ca “Amalembo Yonse” calisulamo Amalembo kabili cipayanya ifyebo fya mu Baibolo ifya kucincimusha ifingi ifyo fingatunonsha lwa ku mupashi. Kwalibako ifingi ifya kusambilila pa lwa Baibolo ne nshila intu Yehova abombelemo na bantu bakwe mu nshita sha pa kale.
4 Ifishinka Fikalamba Ifya mu Baibolo: Bamunyina bapeelwa ili lyashi balingile ukusala ifikomo fya kulungatika ifyo fingabomfiwa mu nshila iibomba pa kuti icilonganino cinonkelemo. Ici cikabila ukubelenga ifipandwa ifyo fipeelwe, ukwetetula pali fyene, no kusapika ifikomo fisalilwe pa kusanga ifishinka ifyo fikalenga ubupilibulo bwa ayo malembo ukumfwika. Ku mabula ya kulekelesha aya Watch Tower Publications Index, kwalibako “Scripture Index,” (Icisontelelo ca Malembo) iyo ingaba iya kwaafwa pa kusanga ifyebo pa lwa fikomo fya mu Baibolo ifya mu kulungatika. Bamunyina balepeela ili lyashi balingile ukubomfya ukwiluka no kusengauka ukuletamo ifyebo ifishikumineko. Tabalingile ukupekanya ifyebo ifingi ifyacila pa fyo bengapeela bwino mu maminiti 6.
5 Ifwe bonse kuti twanonkelamo mu Isukulu lya Butumikishi bwa Teokrasi. Kuti lyatwaafwa ukuwamyako imilandile yesu na maka ya kusambilisha. Ukushukila uku kupayanya mu kukumanina mu kushininkisha kukatwaafwa ukulenga ‘ukulunduluka kwesu ukumoneka kuli bonse.’—1 Tim. 4:15.