Programu wa Bushiku bwa Kulongana Kwaibela Ukupya

¹ Mulandu nshi tulingile ukubilishisha imbila nsuma ukwabulo kuleka? Finshi fyaba e fifwaikwa fya kuba kashimikila wa mbila nsuma? Ni shani fintu aba nsoni nangu fye bantu ba mwenso bengaitendekelako ukwakana imbila nsuma na bambi? Ifi fipusho fya kubimbula itontonkanyo ukusanshako ne fipusho fimbi fikasukwa muli programu wa bushiku bwa kulongana kwaibela ukupya uukatampa mu September, uukwete umutwe uuleti “Ukufikapo nga Batumikishi ba Mbila Nsuma.”—Linganyako 2 Abena Korinti 3:5.

² Pamo nga abantu ba kwa Yehova, tufwile ukuba abashilimuka pa lwa myendele yesu. Ifya kukumanya fya kukoselesha fikashimikwa ku bacaice abakashimika ifyo baacincintila ukutitikisha kwa banabo. Abafyashi bakapayanishiwilwa ukukoselesha kwabamo kutemwa ukukuma ku kukabila kwa kukansha abana babo pamo nga abatumikishi ba kwa Lesa. Ifwe bonse tukaafwiwa ukutesekesha ukukabila kwa kushimikila na mapaalo ayesa kuli fwe bene na kuli abo abatumfwa.—1 Tim. 4:16.

³ Mu kushininkisha ulubatisho lukaba ca kucitika cikalamba ica bulya bushiku. Pa ntanshi ya ici, ilyashi lyashimpwa pali Baibolo likatontwa maka maka ku baipeela abapya. Kwena, bonse abakasangwako bafwile ukupeepeka ilyo ilyashi lya lubatisho lilepeelwa no kulondolola ubupilibulo bwa lubatisho mu kulengama. Bonse abalefwaya ukubatishiwa pa bushiku bwa kulongana kwaibela balingile ukwishibisha kangalila wabo uwa kutangilila mu kubangilila pa kuti engasangako inshita ya kutantika baeluda ku kupituluka na bakalaya ku lubatisho mu fipusho fyatantikwa.

⁴ Ica kucitika cikalamba na cimbi cikaba lyashi likalamba ilikapeelwa na kalanda umutandashi. Likalati “Abafikapo Kabili Abaipangasha nga Batumikishi ba kwa Lesa.” Ukupayanya kukalamba kune ukutupangasha nga batumikishi kukalandwapo, kabili ilyashi likasanshamo ifya kukumanya fya kukuulilila icitetekelo.

⁵ Pekanya nomba pa kuti ukasangwe kuli programu onse. Shininkisha ukulaalikako abalesekelela na masambililo ya Baibolo pa kuti na bo bengamwenamo muli ubu bushiku bwa masomo ya teokrasi. Muli iyi nshila kuti twashininkisha ukuti ‘twalifikapo’ pamo nga abatumikishi ba mbila nsuma.