Ubushiku bwa Kulongana Kwaibela Ukupya

“Ifintu Fyonse Citileni Imbila Nsuma” e mutwe wa bushiku bwa kulongana kwaibela ukupya ukukatendeka mu September. (1 Kor. 9:23) Imbila nsuma iya Bufumu e mbila yacindamisha pa mbila shonse ishibilwa ilelo. Programu akatwaafwa ukutesekesha ishuko lyaibela ilyo twakwata ilya kusenda iyi mbila iishaiwamina. Na kabili tukakoseleshiwa ukutwalilila ukubilisha imbila nsuma ukwabula ukuleka.—Imil. 5:42.

Programu akatulanga ifya kubomfya ukukanshiwa kwesu ukwa teokrasi mu kufikapo pa kuti twingapwishishisha ifingi mu butumikishi. Tukomfwa kuli bamo abateuluka mu kutanununa umulimo wabo, ukusanshako na banono abaipeelesha abene mu kutanununa imbila nsuma.—Linganyeniko Abena Filipi 2:22.

Ilyashi likalamba, ilikalandwa na kalanda umweni, likakomaila pa kuti tulekabila ukutwalilila ukuba ‘abalingwa ukuseekeshiwe mbila nsuma.’ (1 Tes. 2:4) Tukafwiwa ukumona ukuti nga tuli no kutwalilila ukuba ne shuko lya kubilisha imbila nsuma kuli bambi, tufwile lyonse ukufika pa fifwaikwa fya kwa Lesa na pa fipimo fyakwe mu kutontonkanya kwesu ne mibele. Amapaalo tuipakisha mu kucita ifi na yo yene yakalandwapo.

Mwipuswa kuli uyu programu wakatama. Abaipeela abapya abalefwaya ukubatishiwa pa bushiku bwa kulongana kwaibela balingile ukweba kangalila wa kutangilila mu kwangufyanya. Laalikeni bonse abo musambilila na bo ukusangwako. Natuleke Yehova atukoshe ku kucita ifintu fyonse pa mulandu wa mbila nsuma na muli ifyo ukupwishishisha umulimo wakulisha pali ino nshita ilyo Armagedone ashilaisa.