Bonse Bacincimushiwa pa Kukakulwa kwa Citabo Icipya pe Bungano lya Citungu
Icitabo Icipya Caebekesha Ukwishiba Lesa
1 Pe bungano lyesu ilya citungu muli ulu lusuba lwapita, fintu twali abacincimushiwa pali programu onse! Mu cungulo kasuba ca bushiku bwalenga shibili ubuseko bwesu bwalisempawike lintu twaumfwile ukubilisha ukukuma ku citabo cipya, Ukwishiba Uko Kutungulula ku Mweo wa Muyayaya, ne fyebo fyaampanako ifyakonkelepo. Amabilioni ya bantu ba pe sonde balekabila ukwishiba uko Lesa fye eka e wingakupeela—ukwishiba Lesa no Mwana wakwe, Yesu Kristu.—Amapi. 2:1-6; Yoh. 17:3.
2 Fintu kalanda alondolwele ifiputulwa fya ici citabo mu kumonekesha! Imitwe ya fipandwa iya kucebusha, ifilangililo fibomba, imipeelele ya cine iyashininkishiwa, ifipusho fishapikana, na, pa mpela ya cipandwa cimo na cimo, umukululo uukwete umutwe wa kuti “Mona nga Nawishiba” fili pa kati ka mbali ishikacebusha bonse abakalabelenga cene. Lelo abasambi besu aba Baibolo bakanonkelamo ukucilisha ilyo mu kwangufyanya balenonka ifisambilisho fya Baibolo ifikalamba.
3 Mu malyashi ya kusondwelela pa bushiku bwalenga shibili no bwalenga shitatu, twakoseleshiwe ukukwata isambililo lya lupwa ukubomfya ici citabo cipya. Ukufika pali nomba, mu kupalishako natwishiba ifyabamo. Ukwabulo kutwishika na kabili mwalilanshanya ifishinka ifyo mulingile ukulaibukisha lintu muleshalika ici citabo cipya mwi bala.
4 Ifishinka fya Kupitulukamo: Kuti waibukisha ukuti ilyo alepeela ilyashi “Umulandu Umutundu wa Muntu Ulekabila Ukwishiba Lesa,” kalanda akomaile pa fishinka fyafulilako, ukusanshako ifyakonkapo: (1) Lintu mulebomfya ici citabo ku kutungulula amasambililo ya Baibolo, te kuti ciwame ukuletamo ifyebo ifishikumineko, ifyo fingafimbilisha ifishinka fikalamba; Tontomesheni fye pa kulondolola cintu icitabo cileshininkisha mu cipandwa cimo na cimo. (2) Ifipandwa fili ifya butali bwalinga ica kuti ilingi line mukaba na maka ya kupwisha icipandwa cimo inshita iili yonse mwasambilila. (3) Pa mpela ya cipandwa cimo na cimo, ifipusho mu mukululo uuleti “Mona nga Nawishiba” fikapayanya ukupitulukamo kwakumanina.
5 Ukubomfiwa mu Masambililo ya Baibolo: Bakasabankanya abengi baleipusha nga kuti cawama ukwalwila amasambililo yabo aya Baibolo kuli ici citabo cipya. Nga ca kuti mwalifika apatali mu citabo mulesambilila pali ndakai, kuti cabomba ukupwishishisha ukusambilila ulo lupapulo. Nga te ifyo, tuletasha ukuti mwalukile ku citabo ca Ukwishiba. Nga ca kuti mwabomfeshe broshuwa nelyo trakiti pa kutampa isambililo lya Baibolo, langisheni icitabo cipya pa nshita yalinga kabili cibomfyeni ku kusambililamo. Ifyebo fyalundwako pa fya kubomfya icitabo ca Ukwishiba fikamoneka mu Ubutumikishi Bwesu Ubwa Bufumu mu myeshi iileisa.
6 Yehova napayanya ici citabo cipya ku kutwaafwa ukusambilisha bambi pa lwa kwishiba ukutungulula ku mweo wa muyayaya. Nomba tulekabila ukupekanya bwino no kwakanamo mu kukumanina mu mulimo uucili no kucitwa.