Afwa Bambi Ukunonka Ukwishiba Uko Kutungulula ku Mweo
1 Umutumwa Paulo alondolwele ukuti Lesa ‘afwaya abantu [ba misango yonse, NW] ukufika ku kwishibe Cine.’ (1 Tim. 2:4) Ni shani fintu twingaafwa bambi ukunonka uko kwishiba? Inshila imo yaba kubwelela ku bantu abo icitabo ca Ukwishiba Uko Kutungulula ku Mweo wa Muyayaya cacebusha. Ulu lupapulo lulondolola icine ca Baibolo mu mashiwi yaumfwika, ayayanguka, ayasalwa bwino. Pa kucisambilila, abantu ba misango yonse kuti batungululwa ku mweo. Cinshi twingasosa ico cikakoselesha bambi ukusambilila ici citabo na ifwe?
2 Kuli abo abasekelele muli Baibolo pamo nga ukutungulula kubomba, kuti wabwelelako ku kutambika isambililo, nakalimo ukusoso kuti:
◼ “Lintu nali pano inshita yafumako, twalanshenye umulandu twingacetekela Baibolo pamo nga intulo ya butungulushi bubomba. Pa mulandu wa kuti yalipuutwamo na Lesa, Baibolo na kabili yaba ni ntulo yashininkishiwa iya cisansamushi ne subilo, nga fintu fye umo uwa batumwa ba kwa Kristu alondolwele. [Belenga Abena Roma 15:4.] Pa mpela ya kulanshanya kwesu ukwafumineko, nalipwishe icipusho ca kuti, Ni shani fintu pa lwesu twinganonkelamo mu kwishiba kwaba muli Baibolo?” Belenga paragrafu 18 pe bula 11 mu citabo ca Ukwishiba. Londolola ukuti Inte sha kwa Yehova baletungulula amasambililo ya Baibolo amamilioni yasano mwi sonde lyonse, ukwaafwa abantu ukuli konse ukunonka ukwishiba uko kutungulula ku mweo wa muyayaya. Langilila mu kwipifya fintu isambililo litungululwa, ukubomfya amaparagrafu ya kubalilapo yasano mu cipandwa 1.
3Nga ca kuti ipepo lyali e mutwe mwalanshenye na umo mu kutendekelako, kuti pambi waesha iyi nshila mu kutukusha ukutendeka isambililo lya Baibolo:
◼ “Ndesubila mwaliipakisha ifyebo pa lwe pepo ifyo twasambilile ukufuma mu citabo ca Ukwishiba Uko Kutungulula ku Mweo wa Muyayaya. Nalaile ukubwela no kulanshanya capamo na imwe pa lwa fintu abo abapepa kuli Lesa, mu kukonkapo, bengakutika kuli wene. Moneni icalondololwa pe bula 158. [Belenga paragrafu 18.] Muli ifyo, pa kusambilila Baibolo pa lwesu, tulekutika ku cintu Lesa alelanda. Ukucita ifyo kulatupalamika kuli wene no kutwaafwa ukubomba na mafya ya cila bushiku ayo tupepela. Kuti naba uwa nsansa ukusambilila Baibolo na imwe.” Nga ca kuti umuntu natemwa, tendekeleni ne cipandwa ca kubalilapo mu citabo ca Ukwishiba.
4 Nga ca kuti wabomfeshe inshila ya kulungatika ku kutendeka isambililo, kuti pambi wasosa ifi ku kutwalilila ukulanshanya kwa kutendekelako:
◼ “Nacitila kwena nangu cibe shani nalapitako na kabili pantu ndefwaya ukumweba ifyafulilako pa lwa programu wesu uwe sambililo lya Baibolo. Namushilile ici citabo, Ukwishiba Uko Kutungulula ku Mweo wa Muyayaya, icaba ca kwaafwa ukusambilila ico tubomfya. Moneni fintu citukoselesha ukubelenga Icebo ca kwa Lesa. [Belenga paragrafu 23 pe bula 22.] Ndemulomba ukubuula icitabo cenu, pa kuti twingatwalilila ukusambilila ukutendekela apo twashilile inshita yafumako.” Nga ca kuti tamwatendeke ukusambilila pa kutandala kwa kubalilapo, kuti pambi watila: “Nakalimo iyi yalaba ni nshita isuma iya kuti imulangilile fintu tusambilila Baibolo.” Pa numa ya kusambilila amaparagrafu yanono, tantika inshita yashininkishiwa iya kubwela kwi sambililo lyakonkapo.
5 Ukubomfya bwino bwino icitabo ca Ukwishiba kukatulenga ukusalanganya ukwishiba kwalungikwa kabili abantu bambi bakamwenamo. (Amapi. 15:7) Ukwishiba kwa musango yo kukalenga aba mitima yalungama ukuba aba buseko, cikabalenga ukuba aba nsansa, kabili cikaba ca kutuninkisha cikalamba kuli bene ku kwikala umwabela ubulungami bwa kwa Yehova, ukutungulula mu kupelako ku mweo wa muyayaya.