Bwelelako ku Balangishe Ubuseko

¹ Pa kukakula icitabo cipya, Ukwishiba Uko Kutungulula ku Mweo wa Muyayaya, kalanda wa pe bungano alondolwele ukuti “abasambi ba mitima ya bufumacumi balingile ukusambilila ifyalinga muli cene ica kuti kuti bapingulapo ukwiminina ku lubali lwa kwa Yehova no kubatishiwa.” Icitabo capekanishiwa ku kusambilisha icine mu kwangufyanya. Cipayanya ifyebo fya kulungatika mu kwipifya ifyo fingakunta abasambi ukuti balunduluke lwa ku mupashi. Cilondolola icine mu nshila yashininkishiwa ukwabula ukulanda sana pa fifundisho fya bufi. Pa kutunguluka mu kubomfya ici cibombelo cipya, tulingile ukubwelela kuli bonse abalangishe ubuseko.

² Nga ca kuti walandile ku muntu uushacetekela muli Lesa lelo uwalangisheko ubuseko, kuti pambi watendeka pa kukupukula icitabo ku cikope cisangwa pa mabula 4 na 5 no kusoso kuti:

◼ “Lintu nali pano umuku wafumako, twaloleshe pali ici cikope cishaiwamina icabapo ubwikalo bwayemba. Amashiwi yasangwapo yepusha ukuti, ‘Cinshi ulingile ukucita nga uli no kuipakisha bwene?’ Ni shani fintu mwingasuke co? [Leka asuke.] Baibolo mu kumfwika ilondolola cimo ica fifwaikwa fikalamba. [Belenga Yohane 17:3.] Ukwishiba kulakabilwa pa kuti tucetekele Lesa. Inshila yawamisha twingasambililamo ico tulekabila ukwishiba yaba kusambilila Baibolo mu nshila yatantikwa bwino.” Kupukula pa cipandwa 1 kabili londolola amatontonkanyo yamo aya kukoselesha mu maparagrafu 1 ukufika ku 5. Londolola fintu isambililo lya Baibolo litungululwa, kabili mulaye ukuti ukabwelelako ku kulanshanya ifyalundwako.

³ Nga ca kuti wabwelela ku kutwalilila ukulanshanya umulandu Lesa asuminishisha ukucula, kuti pambi watila:

◼ “Inshita yalekelesheko nali pano, twalandile pa lwa [landa pa co mwalandilepo]. Kwalimineko ne cipusho ukukuma ku mulandu Lesa asuminishisha ukucula kwafule fi mu calo. Cinshi mwasangile? [Leka asuke.] Caliba ica kukoselesha ukwishiba ukuti Lesa te washingamwa ne mibele ya kubombomanika iya musango yu.” Kupukula pa mabula 71-2 mu citabo ca Ukwishiba Uko Kutungulula ku Mweo wa Muyayaya, no kulanshanya amatontonkanyo ya mu Malembo yamo ayalandwapo mu maparagrafu 3 ukufika ku 5. Mulaye ukuti ukabwelelako na kabili ku kulondolola umulandu twingashininkishisha ukuti ukusuminisha kwa kwa Lesa ukwa kucula kuli no kupwa mu kwangufyanya.

⁴ Nga ca kuti wabwelela ku kutandalila umufyashi uuli uwasakamikwa pa lwa mpika sha mu lupwa, kuti pambi wasose ci:

◼ “Nalishiba ukuti imwe, pamo nga bafyashi, mulafwaisha abana benu ukukwata ifyawamisha. Apantu te kuti cicitikeko ukubacingilila ku bubi bonse, mufwile ukubasambilisha ifya kubomba ne mpika sha mu bumi mu kutunguluka. Bushe muletontonkanya ifyo ni nshila nshi ici cingacitilwamo? [Leka asuke.] Cimo ica fintu fyacindamisha umufyashi engapayanya caba kukansha.” Kupukula pa mabula 145-6 mu citabo ca Ukwishiba, kabili tonta ukusamana pa kufunda kwa mu Baibolo ukubomba, ukukomaila pa bucindami bwa kuko na fintu ukukonka kwene kwingaba lipaalo. Mulaye ukubwelelako ku kumulanga ifya kubomfya ici citabo ku kusambilila ifyafulilako pa fya kukwata ubumi bwa lupwa ubwa nsansa.

⁵ Nga ca kuti watandalila uko walandile fye mu kwipifya, kuti watila:

◼ “Tacali mifwaile ya kwa Lesa ukuti tulekota no kufwa. Alefwaya ukuti twikale kuli pe na pe mwi sonde lya paradise.” Langisha icikope pa mabula 188-9. Belenga paragrafu 11 pe bula 184. Panganeni ilyo ukabwelelako na kabili.

⁶ Mu kushininkisha ici citabo cipya cili kupayanya na kumbi ukufuma kuli Yehova ku ‘kukalakasha’ umulimo wa kulonganika muli shino nshiku sha kulekelesha. (Esa. 60:22) Nga ca kuti twacibomfya mu kufumamo cimo, kuti twapeela ukwishiba uko kwingaafwa umuntu ukulola ku kunonka umweo wa muyayaya.