“Awe Uyu E Mweo wa Muyayaya”
1 Amashiwi ya kwa Yesu ayalembwa pali Yohane 17:3 yafwile ukumonwa ayakatama. Apilibwile cintu asosele—ukuti, ukunonka ukwishiba Lesa na Kristu e mweo wa muyayaya! Lelo bushe ni ku kwishiba fye Yehova na Yesu e ko tukalambwilwa no mweo wa muyayaya? Iyo. Abena Israele balishibe ukuti Yehova aali ni Lesa wabo, lelo inshila yabo iya bumi tayalangishe uko kusumina. Pa mulandu wa ico, balufishe ububile bwakwe. (Hos. 4:1, 2, 6) Ilelo amamilioni ya bantu ‘kuti bakwata ukupimpa kwa kuli Lesa; lelo te kupimpa umwabelo kwishiba.’ (Rom. 10:2) Balekabila ukwishiba Yehova, ‘Lesa wa cine eka,’ no kusambilila fintu bengamubombela bwino. Ukulosha kuli ico, mu November tukalatambika icitabo ca Ukwishiba Uko Kutungulula ku Mweo wa Muyayaya. Ni nshila nshi mukabomfya pa kutambika icitabo ca Ukwishiba? Pano palipo imitubululo imo iingamwaafwa.
2 Apantu abantu abengi tabaumfwapo imfundo ya kwikala kuli pe na pe pe sonde, nakalimo iyi mitendekele kuti yabacebusha:
◼ “Tuleipusha abena mupalamano besu icipusho. Nga ca kuti mwalilaalikwe ukwikala kuli pe na pe mu calo capala ifi, bushe kuti mwasumina ubo bwite? [Langeni icikope pa mabula 4-5 mu citabo ca Ukwishiba. Lekeni asuke.] Ici mu cituntulu e cintu mwingaipakisha mu bumi. Lelo cinshi muletontonkanya mufwile ukucita pa kuti ici cingaba ica cine cine kuli imwe? [Lekeni asuke.] Moneni icilekabilwa ukucitwa ukulingana na Yohane 17:3. [Belengeni.] Ici citabo cileafwa abengi ukunonka uyu musango wa kwishiba uwaibela. Bushe kuti mwatemwa ukuikwatila icitabo ca pa lwenu ica kubelenga? [Lekeni asuke.] Ilyo nkatandala umuku ukakonkapo, kuti twaisalanshanya umulandu cabelamo ukupelulula ukusumina ifyo kuti twanonka umweo wa muyayaya pano pene pe sonde.”
3 Lintu mwabwelela ku kutandalila abo mwalanshenye na bo Yohane 17:3, nakalimo kuti mwatwalilila muli iyi nshila:
◼ “Ilyo natandele umuku walekelesheko, namubelengele amashiwi ya kucebusha aya kwa Yesu ayasangwa pali Yohane 17:3, apo atwebekeshe ukuti ukwishiba Lesa na wene e mweo wa muyayaya. Lelo abantu abengi basumina ifyo kuti banonka fye ubumi bwawaminako mu muulu epela. Mutontonkanyapo shani pa lwa ico? [Lekeni asuke.] Nga ca kuti icitabo cintu namushilile cili mupepi, kuti natemwa ukumulanga ifikomo fya mu Baibolo fimo ifyo fishininkisha ukuti Paradise akabweshiwa pe sonde. [Lanshanyeni amaparagrafu 11-16 pa mabula 9-10 mu citabo ca Ukwishiba.] Ilyo natandala umuku ukakonkapo, kuti natemwa ukumulangilila umulandu mwingacetekela aya malayo ayasangwa muli Baibolo. Pali ino nshita, nakalimo kuti mwabelenga icipandwa 2 mu citabo cenu.”
4 Pano pali imipeelele iyo nakalimo mwingatemwa ukubomfya ku bantu bakongamina ku fya mapepo:
◼ “Tulelanshanya na bena mupalamano besu pa lwa mulandu kwabela imipepele yapusanapusana iyafulisha ifi mu calo. Kwabako utubungwe twa fya mapepo mupepi na 96 mu Zambia mweka, kabili ukucila pali 10,000 mu calo conse. Lelo, kwabako fye Baibolo umo. Ukulingana na fintu mwingatontonkanya, mulandu nshi ici cimfulumfulu ca mipepele cabelako? [Lekeni asuke. Isuleni icitabo ca Ukwishiba pa cipandwa 5, no kubelenga paragrafu 1.] Mukakwata ifyasuko fya kwikusha kuli ifyo fipusho lintu mwabelenga ici cipandwa. Kuti naba uwa nsansa ukumushila ici citabo nga mwingafwaya ukucibelengamo.” Nga ca kuti icitabo capokelelwa, tantikeni mu kushininkisha ukubwelelako, kabili mutile: “Lintu nkabwela, nakalimo kuti twaisalanshanya nampo nga imipepele yonse yaba fye ni nshila shapusanapusana ishitungulula ku cifulo cimo cine.”
5 Lintu mwabwelelako ku kutwalilila ukulanshanya pa lwa mulandu kwabela imipepele yafulisha ifi, kuti mwatila:
◼ “Lintu nalandile na imwe umuku wafumineko, nalipwishe icipusho nampo nga imipepele yonse yaba fye ni nshila shapusanapusana ishitungulula ku cifulo cimo cine. Mutontonkanyapo shani pa lwa ico? [Lekeni asuke.] Kuti natemwa ukumulanga cintu Yesu asosele pali uyo mulandu mu citabo cintu namushilile. [Kupukuleni pa cipandwa 5 mu citabo ca Ukwishiba, kabili belengeni amaparagrafu 6-7, ukusanshako na Mateo 7:21-23.] Nakalimo kuti mwatwishika umulandu cabela icacindamisha ukwishiba bwino icaba ukufwaya kwa kwa Lesa. Mukasanga ukuti amaparagrafu yakonkelepo yali aya kufunda apakalamba. Napaapaata mukabelenge ifyebo fyashalako muli ici cipandwa. Inshita ikakonkapo lintu nkesa, nkaba uwa nsansa ukumulanga ubucindami bwa kunonka ukwishiba kwalungikwa ukwa Baibolo.”
6 Kuti mwatunguluka ilingi line ilyo mwabomfya inshila ya kulungatika mu kutendeka amasambililo ya Baibolo. Pano palipo imitendekele yatubululwa iyaba pe bula 12 mu citabo ca “Ukupelulula”:
◼ “Ndetandala ku kutambika kosi wa mu ŋanda uwa Baibolo uwa pa fye. Nga mwingansuminisha, kuti natemwa ukusendako fye amaminiti yanono ku kulangilila fintu abantu mu fyalo mupepi na 200 balanshanya Baibolo pa ŋanda pamo nga mabumba ya ndupwa. Kuti twabomfya ilili lyonse ilya aya malyashi nge cishinte ca kulanshanya. [Langeni umutande wa filimo mu citabo ca Ukwishiba.] Ni lili kwi ukucilisha lyamusekesha?” Pembeleleni umuntu asale icipandwa.” Kupukuleni pa cipandwa casalwa, kabili tendekeni isambililo mu paragrafu ya kubalilapo.
7 Pano palipo inshila na imbi iyo mwingatungulukamo, iyo mwingesha pa kutendeka amasambililo:
◼ “Ndasambilisha amasambililo ya Baibolo apa fye kabili ninkwata inshita ya kulundapo abasambi na bambi. Ici ca kwaafwa ukusambilila Baibolo e co tubomfya. [Langeni icitabo ca Ukwishiba.] Uyu kosi asenda fye imyeshi inono kabili alapayanya ifyasuko ku fipusho pamo nga: Mulandu nshi Lesa asuminishisha ukucula? Mulandu nshi tukotela no kufwa? Cinshi cicitika ku batemwikwa besu nga bafwa? Kabili ni shani fintu twingapalamina kuli Lesa? Lyene bepusheni ukuti, “Bushe kuti namulangilila ifyo tusambilila?” Nga ca kuti mwine ŋanda tasumine isambililo, tambikeni icitabo ca Ukwishiba kabili tantikeni ukubwelelako pa numa.
8 Mwandi cuma cintu ukwishiba kwalungikwa ukwa kwa Lesa na Kristu caba kuli bonse abacikwata! Ukucinonka mu cine cine e mweo wa muyayaya mu mibele yapwililika. Shi natubomfye akashita akali konse mu November ukusambilishako bambi pa lwa kwishiba uko kutungulula ku mweo wa muyayaya.