Umukululo Wa Fipusho

◼ Bushe calilinga ukusangwilako lintu bambi batusendako muli bamotoka babo?

Imibele yesu bamo ifwaya ukuti tushintilile pali bambi ku kutwafwilisha ukusangwa ku kulongana lyonse no kubombako umulimo wa mwi bala. Bamunyina abengi na bankashi mu cikuuku balabombesha apakalamba ku kutwaafwa kabili mu kutemwa balabomfya inshita yabo, bamotoka, ne fibombelo fimbi ku kutusendako muli bamotoka babo. Nangu cingati pambi bafwile ukupekanishisha ukwima mu kubangililako ukupusanako na fintu pambi cingaba nga tabeshile ku kutusenda kabili bashingilishiwa mu kubwelela ku ŋanda, balapayanya imyendele ya muli motoka no mutima wa kuitemenwa.

Nga fintu caba mu lubali ululi lonse ulwa butumikishi bwesu ubwa Bwina Kristu, icishinte cisangwa pa Abena Galatia 6:5 cilabomba icitila: “Umuntu onse ali no kusende cipe cakwe umwine.” E ico, nga ca kuti umo lyonse alatusendako muli motoka wakwe, tulingile ukulanga ukuti tulatasha te mu kulandapo fye lelo na kabili ku musangulo walinga ku kwafwilisha ukulipila ifya kushita fibimbilwemo, nga kuti twaba na maka ya kucite fyo.—Mat. 7:12; 1 Kor. 10:24.

Nangu cingati umuntu uulebomfya motoka wakwe tatwipwishe ukumwafwilisha ne ndalama kabili talemoneka ukuti aleshikabila, ukumutambika umusangulo mu kufumaluka kulatashiwa lyonse. Namutekenya kuti pambi akaana ukupokelela icili conse; kabili, kwena, ico cili kuli ena ukupingulapo. Lelo kuti cawama kuli iwe ukumutambika umusangulo. Nga ca kuti taukwete akali konse pali iyo nshita, taufwile ukulabako; kuti pambi waba na maka ya kutambika akalundwapo inshita yakonkapo wasumina ukuti akusendeko.—Luka 6:38.

Caliba kutemwa kuli abo abakwata bamotoka ukusendako bambi abo pambi bashingaba na maka ya kusangwa ku kulongana nelyo ukubombako ubutumikishi bwa mwi bala ukwabula motoka. (Amapi. 3:27) Pa nshita imo ine, na kabili calibamo ukutemwa kuli abo abanonkelamo mu cikuuku ca musango yo ukulangisha ukuti nabatasha pa kusangwilako ukulingana na papelele amaka yabo.—Kol. 3:15.