Ukufikilisha Umulapo Wesu Ubushiku no Bushiku

¹ Kemba wa malumbo Davidi alikuntilwe ukubilisha kuli Yehova ukuti: “Nkalumbe shina lyenu pe, ku kufishe milapo yandi ubushiku no bushiku.” (Ilu. 61:8) Davidi alishibe ukuti ukulapa waba mulandu wa kuitemenwa umupwilapo. Nangu cibe fyo, na kabili alitesekeshe ukuti nga alapa, alikakililweko ukufikilisha. Lelo, alitashishe Yehova pa mulandu we shuko lya kufikilisha imilapo yakwe ubushiku no bushiku.

² Lintu twaipeele kuli Yehova, mu kuitemenwa twalilapile ukucita ukufwaya kwakwe. Twaliikenye no kulenga ukubombela Yehova ukuba imibombele yacindamisha mu bumi. (Luka 9:23) E ico, na ifwe bene tufwile ukufisha umulapo wesu ubushiku no bushiku. (Luk. Mil. 5:4-6) Ukubilisha kwesu ukwa pa cintubwingi uko twacitile pa nshita ya lubatisho lwa mu menshi kulingile ukulamoneka mu mbali shonse isha bumi bwesu, apantu twalishiba ukuti “umuntu . . . ku kanwa alumbula no kupusuka.” (Rom. 10:10) Ici cisanshamo ukushimikila imbila nsuma. (Heb. 13:15) Imibele ya bantu yalilekanalekana apakalamba, lelo ubushiku no bushiku ifwe bonse kuti twayangwa ubucindami bwa kushimikilako imbila nsuma kuli bambi.

³ Fwayeni Utushita twa Kushimikila Cila Bushiku: Ukushimikilako imbila nsuma ku muntu umbi kwaba ca kukumanya ca buseko. Pa kuti twingacita ici cila bushiku, tufwile ukufwaya utushita twa kushimikila lyonse lintu imibele yesu yasuminisha. Abo abaitendekelako ubunte bwa mu lyashi ku bantu pa ncito nelyo pa sukulu na ku bena mupalamano nelyo bambi abo bakumanya cila bushiku, baliipakisha ifya kukumanya fya nsansa. Nangu fye kulemba amakalata nelyo ukubomfya telefoni kuti kwaba ni nshila ya kushimikilamo kuli bambi. Ukushukila ishi nshila shonse capamo no kupaatulako inshita lyonse iya kushimikila ku mwinshi no mwinshi no kucita ifipempu fya kubwelelamo kuti fyatungulula ku buseko bwaibela ubo tukwata ilyo tuletungulula isambililo lya Baibolo ilya pa ŋanda. Ee, cila bushiku kuti twaba na maka ya kufwaya utushita twa kushimikila.

⁴ Nkashi umo atendeke ukubelenga akatabo ka Ukubebeta Amalembo Cila Bushiku pa nshita ya kutuusha pa ncito. Alaalikeko untu babomba nankwe pa kuti babelengele ilembo lya bushiku capamo, kabili ico mu kwangufyanya catungulwile kwi sambililo lya Baibolo kuli uyo mwanakashi. Cila bushiku balesambilila pa maminiti 30, inshiku shisano mu mulungu umo. Untu babomba nankwe na umbi alemona isambililo lyabo ilya cila bushiku. Mu kupelako aliishibishe umwine ukuti ni munyina uwaleko kubomba. Pa kukuntwa no kupimpa kwa kwa nkashi, alandile na eluda pa kuti engapuupuutulwa. Uyu nkashi alengele abantu na bambi babili ukwambukilwako ku kufwaya ukusambilila pa mulandu wa mukoosha wakwe mu kufikilisha umulapo wakwe ubushiku no bushiku.

⁵ Lintu twakuntwa ne mitima yaisulamo ukutasha pa fintu fyonse ifisuma ifyo Yehova aatucitila, ukufikilisha umulapo wa kuipeela kwesu cila bushiku mu nshila yawamisha intu twingacitilamo kukatuletela ubuseko no kwikushiwa. Ukupala kemba wa malumbo, kuti twabilisha ukuti: “Ndemutootela, mwe Shikulu Lesa wandi, no mutima wandi onse, kabili nakulacindike shina lyenu umuyayaya.”—Ilu. 86:12.