Bushe Mulelungika Ukusosa Icebo ca kwa Lesa?

¹ Yesu Kristu aali e kasambilisha wakulisha uwabalile abako uwa mweo. Inshila alandilemo yakuntile imitima ya bantu, ukukumbamo inkuntu shabo, no kubakunta ukucita imilimo isuma. (Mat. 7:28, 29) Lyonse abomfeshe Icebo ca kwa Lesa pamo nga ishinte lya kusambilisha kwakwe. (Luka 24:44, 45) Acindike Yehova Lesa pali conse cintu aishibe na cintu aali na maka ya kusambilisha. (Yoh. 7:16) Yesu aimikile abakonshi bakwe ica kumwenako cawamisha mu kulungika ukusosa Icebo ca kwa Lesa.—2 Tim. 2:15.

² Umutumwa Paulo na o wine alibombele pamo nga ica kumwenako capulamo mu kulungika ukusosa Icebo ca kwa Lesa mu nshila ibomba bwino. Talebelenga fye Amalembo kuli bambi, lelo acitile ifingi; alondolwele cintu abelengele no kupelulula pali cene, ukushinina ukufuma mu Cebo ca kwa Lesa ukuti Yesu aali e Kristu. (Imil. 17:2-4) Mu kupalako, umusambi Apolo inkolobwa, aali “uwa maka mu kwishiba amalembo,” kabili alilungike ukuyasosa ilyo alelanda amalyashi ya maka aya cine.—Imil. 18:24, 28.

³ Beni Kasambilisha wa Cebo ca kwa Lesa: Bakabilisha ba Bufumu aba muno nshiku balitunguluka mu mibombele yawamisha iya kusambilisha abantu ba mitima ya bufumacumi pa kulosha kuli Baibolo no kupelulula ukufuma muli yene. Ica kumwenako cimo, munyina abomfeshe Esekiele 18:4 na Malembo yayampanako ku kupelulula pa lwa cikaponena ababifi ne co abalungami bakaipakisha na pasita ne filundwa fye calici lyakwe fitatu. Pa mulandu wa uko kulanshanya, ifilundwa fimo ifye calici fyalitendeke ukusambilila, kabili umo uwa bene mu kupelako alipokelele icine. Mu ca kumwenako na cimbi, nkashi umo aebelwe ukulondolwela umulume walekaanya uwa muntu walesekelela umulandu Inte sha kwa Yehova bashisefesha Krisimasi ne nshiku sha kufyalwa. Ilyo alebelenga ifyasuko fya mu Malembo mu kulungatika ukufuma mu citabo ca Ukupelulula, uyu mwaume alumbulwile ukuti alesuminisha. Umukashi wakwe alicankilwe pa kuti umulume alisumine, ica kuti atile: “Tukalaisa ku kulongana kwenu.” Kabili umulume alisuminisheko!

⁴ Bomfyeni Ukwaafwa Kwabako: Ubutumikishi Bwesu Ubwa Bufumu na programu wa Kulongana kwa Mulimo filapeela amakambisho yawamisha ku kutwaafwa ukulungika ukusosa Icebo ca kwa Lesa. Bakasabankanya abengi balilumbulula ukuti balatasha pa lwa mipeelele yatubululwa iyalekanalekana iyo isabankanishiwa no kulangililwa pa kuti tumwenemo kabili iyo isa pa nshita yalinga nga nshi kabili iibomba bwino. Icitabo ca Ukupelulula Ukufuma Mu Malembo cakwatamo ifyebo ifingi nga nshi pa fya kulungika ukukolobonda mu malyashi yakalamba ayacila pali 70 ayalandwapo mu Cebo ca kwa Lesa. Icitabo ca Ukwishiba Uko Kutungulula ku Mweo wa Muyayaya casupawila ifisambilisho fya Baibolo fikalamba fyonse ifyo abapya balekabila ukumfwikisha. Amasambililo 24 na 25 mu Citabo ca Kutungulule Sukulu lya Butumikishi bwa Teokratiki citulangilila fintu bakasambilisha balamuka balondolola amalembo, ukuyabelenga, no kuyabomfya. Tulingile ukubomfya uku kwaafwa konse ukwapayanishiwilwa ifwe.

⁵ Lintu twalungika ukusosa Icebo ca kwa Lesa, tukasanga ukuti “ca mweo, kabili caliluma . . . cilingulula amatontonkanyo na mapange ya mutima” wa abo tushimikilako. (Heb. 4:12) Ukutunguluka kwesu mu mibombele yawamisha ilyo tulecibomfya kukatukunta ukulanda icine no kushipa kwakulilako lyonse!—Imil. 4:31.